ମୁମ୍ବାଇ: ଆଇପିଏଲ ୨୦୨୫ରେ ଶୁକ୍ରବାର ଲକ୍ଷ୍ନୌ ସୁପରଜାଏଣ୍ଟ୍ସ ଏବଂ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଏକ କଡ଼ା ପ୍ରତିଯୋଗିତା ହୋଇଥିଲା । ଏଲ୍ଏସଜି ମ୍ୟାଚ୍କୁ ୧୨ ରନ୍ରେ ଜିତି ନେଇଥିଲା । ଦଳ ସିନା ଜିତିଗଲା କିନ୍ତୁ କ୍ୟାପଟେନଙ୍କ ପାଇଁ ଅଡ଼ୁଆ ବଢ଼ିଛି । ଆଇପିଏଲରେ ଲଗାତର ଖରାପ ପ୍ରଦର୍ଶନ ପାଇଁ ଅଧିନାୟକ ଋଷଭ ପନ୍ତଙ୍କୁ ଅନେକ ସମାଲୋଚନାର ଶୀକାର ହେବାକୁ ପଡ଼ୁଛି । ଅନ୍ୟପକ୍ଷରେ ବିଳମ୍ବ ଯୋଗୁଁ ତାଙ୍କ ଉପରେ ଜରିମାନା ଲଗାଇଛି ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ । ପନ୍ତଙ୍କ ସହିତ ଦଳର ସ୍ପିନର ଦିଗବେଶ ରାଠିଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯାଇଛି ।
ପୂର୍ବରୁ ଦିଲ୍ଲୀର କ୍ୟାପଟେନ୍ ଥିବା ଋଷଭଙ୍କୁ ଏଲ୍ଏସଜି ୨୭ କୋଟିରେ କିଣି ନିଜ ଦଳକୁ ଆଣିଥିଲା । କିନ୍ତୁ ଋଷଭ ପନ୍ତର ଲଗାତର ଖରାପ ପ୍ରଦର୍ଶନ କରି ଟିମକୁ ନିରାଶ କରୁଥିବା ଦେଖାଯାଇଛି । ଏହାରି ମଧ୍ୟରେ ତାଙ୍କ ଉପରେ ଆଉ ଏକ ସଙ୍କଟ ଦେଖାଦେଇଛି । ବୋଲିଂରେ ବିଳମ୍ବ ପାଇଁ ବିସିସିଆଇ ପନ୍ତଙ୍କ ଉପରେ ୧୨ ଲକ୍ଷ ଟଙ୍କା ଜରିମାନା ଲଗାଇଛି । ଆଇପିଏଲର ନିୟମ ଅନୁଯାୟୀ, ପ୍ରତ୍ୟେକ ଦଳକୁ ନିର୍ଦ୍ଧାରିତ ସମୟ ୯୦ ମିନିଟରେ ୨୦ ଓଭର ପୂରଣ କରିବାକୁ ପଡ଼ିବ । ଗତକାଲି ମୁମ୍ବାଇ ଇଣ୍ଡିଆନ୍ସ ସହିତ ଖେଳ ଚାଲୁଥିବାବେଳେ ଲକ୍ଷ୍ନୌ ଦଳ ନିର୍ଦ୍ଧାରିତ ସମୟରେ ଏହାର ୨୦ ଓଭର ବୋଲିଂ କରିପାରି ନ ଥିଲା। ଏହି କାରଣରୁ, ଲକ୍ଷ୍ନୌ ଶେଷ ଓଭରରେ ୩୦ ୟାର୍ଡ ବାହାରେ ଜଣେ ଫିଲ୍ଡର କମ୍ ରଖିବାକୁ ବାଧ୍ୟ ହୋଇଥିଲା । ଏହା ଆଇପିଏଲ ଆଚରଣ ସଂହିତାର ଧାରା ୨.୨୨ ଅନୁଯାୟୀ ସ୍ଲୋ ଓଭର-ରେଟ୍ ସମ୍ବନ୍ଧୀୟ ସିଜନରେ ତାଙ୍କ ଦଳର ପ୍ରଥମ ଅପରାଧ ଥିଲା, ତେଣୁ ରିଷଭ ପନ୍ତଙ୍କୁ ୧୨ ଲକ୍ଷ ଟଙ୍କା ଜରିମାନା କରାଯାଇଥିଲା।
ଅନ୍ୟପକ୍ଷେ ଆଇପିଏଲ ଆଚରଣ ସଂହିତାର ସ୍ତର ୧ ଉଲ୍ଲଂଘନ କରିବା ପରେ ଲକ୍ଷ୍ନୌ ସ୍ପିନର ଦିଗବେଶ ରାଠିଙ୍କୁ ଲଗାତାର ଦ୍ୱିତୀୟ ଥର ପାଇଁ ତାଙ୍କ ମ୍ୟାଚ୍ ଫି\'ର ୫୦ ପ୍ରତିଶତ ଜରିମାନା କରାଯାଇଛି । ନିଜର ଭୁଲରୁ କିଛି ଶିକ୍ଷା କରି ନ ଥିବା ପରି ଜଣାପଡ଼ିଛି । ପଞ୍ଜାବ କିଙ୍ଗସ୍ ବିପକ୍ଷରେ ସର୍ବାଧିକ ୱିକେଟ୍ ନେବାର ଉତ୍ସବ ପାଳନ କରିବା ପାଇଁ ରାଠିଙ୍କୁ ତାଙ୍କ ମ୍ୟାଚ୍ ଫିର ଅଧା ମଧ୍ୟ ଦେବାକୁ ପଡ଼ିଥିଲା । ସେ ନୋଟ୍ ବୁକ୍ ସେଲିବ୍ରେସନ ପାଇଁ ଦଣ୍ଡିତ ହୋଇଥିଲେ । ସେହିପରି ମୁମ୍ବାଇ ବ୍ୟାଟସମ୍ୟାନ୍ ନମନ ଧୀରଙ୍କୁ ଆଉଟ୍ କରିବା ପରେ ସେ ପୁନର୍ବାର ନୋଟବୁକ୍ ଲେଖା ଶୈଳୀରେ ଉତ୍ସବ ପାଳନ କରିଥିଲେ ।
ବିସିସିଆଇ ଅନୁଯାୟୀ, ଏହି ସିଜନରେ ଆଚରଣ ସଂହିତାର ଧାରା ୨.୫ ଅନୁଯାୟୀ ଏହା ତାଙ୍କର ଦ୍ୱିତୀୟ ଅପରାଧ ଥିଲା ଏବଂ ଏଥିପାଇଁ ତାଙ୍କ ଖାତାରେ ଆଉ ଏକ ଡିମେରିଟ୍ ପଏଣ୍ଟ ଯୋଡା ଯାଇଛି। ଏହିପରି, ତାଙ୍କ ନାମରେ ବର୍ତ୍ତମାନ ଦୁଇଟି ଡିମେରିଟ୍ ପଏଣ୍ଟ ଜମା ହୋଇଛି।