ନୂଆଦିଲ୍ଲୀ: ଲଖନଉ ସୁପର ଜାଏଣ୍ଟସ ମଙ୍ଗଳବାର ପଞ୍ଜାବ କିଙ୍ଗ୍ସ ହାତରୁ ନିଜ ଘରୋଇ ଗ୍ରାଉଣ୍ଡରେ ଶୋଚନୀୟ ପରାଜୟ ଭୋଗିଛି । ପ୍ରଥମେ ବ୍ୟାଟିଂ କରି ଏଲଏସଜି ୧୭୧ ରନ କରିଥିଲା । ଜବାବରେ ପଞ୍ଜାବ ୧୬.୨ ଓଭରରେ ଲକ୍ଷ୍ୟ ହାସଲ କରି ନେଇ ୮ ୱିକେଟରେ ମ୍ୟାଚକୁ ସହଜରେ ଜିତି ନେଇଥିଲା । ଏହା ଏଲଏସଜିର ଚଳିତ ସିଜିନରେ ଦ୍ୱିତୀୟ ପରାଜୟ । ମ୍ୟାଚ୍ ପରେ ସଞ୍ଜୀବ ଗୋଏଙ୍କା ଋଷଭ ପନ୍ତଙ୍କ ସହିତ ପଡିଆରେ କଥା ହେଉଥିବା ଦେଖିବାକୁ ମିଳିଛି । ଏହି ସମୟରେ ଗୋଏଙ୍କା ଅସନ୍ତୁଷ୍ଟ ଥିବା ଦେଖିବାକୁ ମିଳିଥିଲା । ଏପରିକି ଡ୍ରେସିଂ ରୁମର ଫଟୋ ମଧ୍ୟ ଭାଇରାଲ୍ ହୋଇଛି । ଯେଉଁଥିରେ ଗୋଏଙ୍କା ପନ୍ତଙ୍କୁ ହାତ ଦେଖାଇ କିଛି କହୁଥିବା ଦେଖିବାକୁ ମିଳିଛି । ଆଉ ପନ୍ତ ମୁଣ୍ଡ ତଳକୁ କରି ଶୁଣୁଛନ୍ତି ।
ଲଖନଉ ପାଇଁ ଚିନ୍ତାର ବିଷୟ ଏହା ଯେ, ଏହାର ଅଧିନାୟକ ଋଷଭ ପନ୍ତ ଖରାପ ଫର୍ମ ଦେଇ ଗତି କରୁଛନ୍ତି । ପଞ୍ଜାବ ବିପକ୍ଷ ମ୍ୟାଚରେ ପନ୍ତ ମାତ୍ର ୨ ରନ କରି ଆଉଟ୍ ହୋଇଥିଲ । ପ୍ରଥମ ମ୍ୟାଚରେ ୧୫ ରନ ଓ ଦ୍ୱିତୀୟ ମ୍ୟାଚରେ ପନ୍ତ ଖାତା ବି ଖୋଲି ପାରି ନ ଥିଲେ । ପନ୍ତ ଆଇପିଏଲ୍ ନିଲାମରେ ରେକର୍ଡ ଦରରେ ବିକ୍ରି ହୋଇଛନ୍ତି । ତାଙ୍କୁ ଏଲଏସଜି ଫ୍ରାଞ୍ଚାଇଜ ୨୭ କୋଟି ଟଙ୍କାରେ ନିଜ ଦଳରେ ସାମିଲ କରିଥିଲା । ଆଉ ସେ ଆଇପିଏଲ୍ ଇତିହାସରେ ସବୁଠୁ ମହଙ୍ଗା ଖେଳାଳି ହେବାର ରେକର୍ଡ କରିଥିଲେ ।
ସଞ୍ଜୀବ ଗୋଏଙ୍କା ମ୍ୟାଚ୍ ପରେ ପଡିଆରେ ଋଷଭ ପନ୍ତଙ୍କ ସହିତ ଯେଉଁ ଶୈଳୀରେ କଥା ହୋଇଛନ୍ତି, ସେହି ଦୃଶ୍ୟ ଗତ ବର୍ଷ କେଏଲ ରାହୁଲଙ୍କ ସହ ଘଟିଥିବା ଘଟଣାକୁ ମନେ ପକାଇ ଦେଇଛି । ସେହି ସମୟରେ ସଞ୍ଜୀବ ଗୋଏଙ୍କାଙ୍କ ଖୁବ୍ ସମାଲୋଚନା କରାଯାଇଥିଲା । ମଙ୍ଗଳବାର ଗୋଏଙ୍କା ଋଷଭ ପନ୍ତଙ୍କୁ କଣ କହିଲେ ତାହା ସ୍ପଷ୍ଟ ହୋଇ ନାହିଁ । ମାତ୍ର ଏହା ସ୍ପଷ୍ଟ ଯେ, ସେ ପନ୍ତଙ୍କ ପ୍ରଦର୍ଶନରେ ଆଦୌ ଖୁସି ନାହାନ୍ତି । ସୋସିଆଲ ମିଡିଆରେ ମଧ୍ୟ ଲୋକେ ଏହାକୁ ନେଇ ଅନେକ ପ୍ରକାରର ପ୍ରତିକ୍ରିୟା ଦେଉଛନ୍ତି ।