ନୂଆଦିଲ୍ଲୀ: ସଂପ୍ରତି ପାକିସ୍ତାନ କ୍ରିକେଟ୍ ଦଳ ନିଜର ଅତି ଦୁର୍ଦ୍ଦିନ ସମୟ ଦେଇ ଗତି କରୁଛି । ଚାମ୍ପିଅନ୍ସ ଟ୍ରଫି ୨୦୨୫ରେ ଲଜ୍ଜାଜନକ ପରାଜୟ ପରେ ପାକିସ୍ତାନ ଦଳ ବିଜୟ ଆଶା ନେଇ ନ୍ୟୁଜିଲାଣ୍ଡ ପହଞ୍ଚିଥିଲା । ହେଲେ ସେଠାରେ ମଧ୍ୟ ଦଳର ଅବସ୍ଥା ବହୁତ ଖରାପ । ପାକିସ୍ତାନ ଟିମ୍ ପ୍ରଥମେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ହାରିଲା । ଆଉ ଏବେ ଦିନିକିଆ ସିରିଜରେ ମଧ୍ୟ ଶୋଚନୀୟ ପରାଜୟ ଭୋଗିଛି । ନ୍ୟୁଜିଲାଣ୍ଡ ପାକିସ୍ତାନକୁ ଦ୍ୱିତୀୟ ଦିନିକିଆରେ ୮୪ ରନରେ ହରାଇଛି । ଏହିପରି ପାକିସ୍ତାନକୁ ଲଗାତାର ପଞ୍ଚମ ଦିନିକିଆରେ ପରାଜୟର ମୁହଁ ଦେଖିବାକୁ ପଡିଛି । ଦିନିକିଆ ସିରିଜ୍ ବ୍ୟାକ ଟୁ ବ୍ୟାକ୍ ହାରିବା ପୂର୍ବରୁ ପାକିସ୍ତାନ ଟିମ୍ ଚାମ୍ପିଅନ୍ସ ଟ୍ରଫିରେ ଦୁଇଟି ଓ ତ୍ରିରାଷ୍ଟ୍ରୀୟ ସିରିଜର ଫାଇନାଲରେ ପରାଜିତ ହୋଇଥିଲା ।

ହାମିଲଟନର ସେଡନ ପାର୍କରେ ଖେଳା ଯାଇଥିବା ଦ୍ୱିତୀୟ ଦିନିକିଆରେ ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୫୦ ଓଭରରେ ୮ ୱିକେଟ୍ ହରାଇ ୨୯୨ ରନ କରିଥିଲା । ନ୍ୟୁଜିଲାଣ୍ଡ ପାଇଁ ୱିକେଟ କିପର ବ୍ୟାଟର ମିଚେଲ୍ ସର୍ବାଧିକ ରନ କରିଛନ୍ତି । ମିଚେଲ୍ ୭୮ ବଲରେ ୭ ଚୌକା ଓ ୭ ଛକା ସହ ଅପରାଜିତ ୯୯ ରନର ଇନିଂସ ଖେଳିଛନ୍ତି । ସେ ନିଜର ପ୍ରଥମ ଦିନିକିଆ ଶତକରୁ ମାତ୍ର ଗୋଟିଏ ରନ ଦୂରରେ ରହିଗଲେ । ପାକିସ୍ତାନ ପକ୍ଷରୁ ମହମ୍ମଦ ୱାସିମ ଜୁନିୟର ଓ ସୁଫିୟାନ ମୁକିମ ପ୍ରତ୍ୟେକଙ୍କୁ ଦୁଇଟି ଲେଖାଏଁ ୱିକେଟ୍ ମିଳିଛି ।

୨୯୩ ରନର ବିଜୟ ଲକ୍ଷ୍ୟ ପିଛା କରିବାକୁ ଓହ୍ଲାଇଥିବା ପାକିସ୍ତାନର ଆରମ୍ଭ ବହୁତ ନିରାଶଜନକ ଥିଲା । ଅଧା ଦଳ ୧୧.୪ ଓଭରରେ ୩୨ ରନ ଭିତରେ ପାଭିଲିୟନ ଫେରିଥିଲେ । ପାକିସ୍ତାନର ଶୀର୍ଷ ୫ ବ୍ୟାଟର ଦୁଇ ଅଙ୍କ ବି ଛୁଇଁ ପାରି ନ ଥିଲେ । ଏଥିରେ ଅଧିନାୟକ ମହମ୍ମଦ ରିଜୱାନ ବି ସାମିଲ । ଏହା ପରେ ବି ବ୍ୟାଟରଙ୍କ ଆଉଟ୍ ହେବା ପ୍ରକ୍ରିୟା ଜାରି ରହିଥିଲା । ଅନ୍ୟପଟେ ଫହିମ ଅଶ୍ରଫ ଗୋଟିଏ ପଟେ ମୋର୍ଚ୍ଚା ସମ୍ଭାଳି  ନିଜର ଅର୍ଦ୍ଧଶତକ ପୂରଣ କରିଥିଲେ । 

ପାକିସ୍ତାନ ୮ ୱିକେଟ ହରାଇ ୧୧୪ ରନ କରିଥିଲା । ନ୍ୟୁଜିଲାଣ୍ଡ ଏକ ବିଶାଳ ବିଜୟ ଅଭିମୁଖେ ବଢୁଥିଲା । ମାତ୍ର ଫହିମ ଅଶ୍ରଫଙ୍କ ସହିତ ନସିମ ଶାହ ନବମ ୱିକେଟ ପାଇଁ ୬୦ ରନ ଯୋଡିଥିଲେ । ଏହି ଭାଗିଦାରୀ ବଳରେ ପାକିସ୍ତାନର ସ୍କୋର ୨୦୦ ପହଞ୍ଚିଥିଲା । ଅଶରଫ ୭୩ ରନ କରି ଆଉଟ୍ ହୋଇଥିଲେ । 

ନସୀମ ଶାହ ନିଜର ପ୍ରଥମ ଅର୍ଦ୍ଧଶତକ ପୂରା କରିବାରେ ସଫଳ ହୋଇଥିଲେ । ମାତ୍ର ନିଜ ଦଳକୁ  ଜିତାଇ ପାରି ନ ଥିଲେ । ଏହିପରି ପାକିସ୍ତାନ ୨୦୮ ରନରେ ଅଲଆଉଟ୍ ହୋଇଛି । ଏହିପରି ପାକିସ୍ତାନ ନ୍ୟୁଜିଲାଣ୍ଡ ମାଟିରେ ଟି-୨୦ ପରେ ଦିନିକିଆ ସିରିଜ୍ ମଧ୍ୟ ପରାଜୟ ଭୋଗିଛି । ନ୍ୟୁଜିଲାଣ୍ଡର ବୋଲର ବେନ ସିୟର୍ସ ପାକିସ୍ତାନର ୫ ବ୍ୟାଟରଙ୍କୁ ଆଉଟ୍ କରିଥିଲେ ।