କୋଲକାତା: ଇଣ୍ଡିଆନ ପ୍ରିମିୟର ଲିଗ୍ ୨୦୨୫ର ୧୫ତମ ମୁକାବିଲା କୋଲକାତା ନାଇଟ୍ ରାଇଡର୍ସ ଓ ସନରାଇଜର୍ସ ହାଇଦ୍ରାବାଦ ମଧ୍ୟରେ ଖେଳାଯିବ । ଦୁଇ ଦଳ ଗତ ଆଇପିଏଲର ଫାଇନାଲ୍ ମ୍ୟାଚରେ ମୁହାଁମୁହିଁ ହୋଇଥିଲେ । ଏହି ମ୍ୟାଚକୁ ଜିତି କେକେଆର ଚାମ୍ପିଅନ ହୋଇଥିଲା । ତେଣୁ ଆଜିର ମ୍ୟାଚରେ ପ୍ରତିଶୋଧ ନେବା ଲକ୍ଷ୍ୟ ନେଇ ମଇଦାନକୁ ଓହ୍ଲାଇବ ଏସଆରଏଚ । ଇଡେନ ଗାର୍ଡେନ୍ସରେ ଖେଳା ଯିବାକୁ ଥିବା ଏହି ମ୍ୟାଚ୍ କେକେଆର ପାଇଁ ଗୁରୁତ୍ୱପୂର୍ଣ୍ଣ ରହିଛି । କାରଣ ସିଜିନର ପ୍ରଥମ ମ୍ୟାଚ୍ ଦଳ ନିଜର ଘରୋଇ ଗ୍ରାଉଣ୍ଡ ଇଡେନ ଗାର୍ଡେନ୍ସରେ ହିଁ ହାରିଥିଲା । ଆସନ୍ତୁ ଜାଣିବା ଆଜିର ମ୍ୟାଚରେ କେମିତି ରହିବ ଇଡେନର ପିଚ୍ ? ବୋଲର ନା ବ୍ୟାଟର କାହାକୁ ମିଳିବ ଫାଇଦା ? ଟସ୍ ଜିତିବା ଦଳ କଣ ନିଷ୍ପତ୍ତି ନେବା ଉଚିତ୍ ?

ଦୁଇ ଦଳ ଅଙ୍କ ତାଲିକାରେ ସ୍ଥିତି ଭଲ ନୁହେଁ । କେକେଆର ପ୍ରଥମ ମ୍ୟାଚରେ ଆରସିବଠୁ ହାରିଥିବା ବେଳେ ଦ୍ୱିତୀୟ ମ୍ୟାଚରେ ରାଜସ୍ଥାନ ରୟାଲ୍ସକୁ ହରାଇଥିଲା । ଏହା ପରେ ତୃତୀୟ ମ୍ୟାଚରେ ମୁମ୍ବାଇ ଇଣ୍ଡିଆନ୍ସଠୁ ଶୋଚନୀୟ ପରାଜୟ ଭୋଗିଥିଲା । ଏବେ ଦଳ ଅଙ୍କ ତାଲିକାରେ ଦଶମ ସ୍ଥାନରେ ରହିଛି । ହାଇଦ୍ରାବାଦ ପ୍ରଥମ ମ୍ୟାଚରେ ଧମାକାଦାର ବିଜୟ ହାସଲ କରିଥିଲେ ହେଁ ପରବର୍ତ୍ତୀ ଦୁଇଟି ମ୍ୟାଚରେ  ପରାଜିତ ହୋଇଛି । ଦଳ ପଏଣ୍ଟ ଟେବୁଲରେ ଅଷ୍ଟମ ସ୍ଥାନରେ ରହିଛି ।

ଇଡେନ ଗାର୍ଡେନ୍ସରେ ଆଇପିଏଲର ଏ ପର୍ଯ୍ୟନ୍ତ ୯୪ଟି ମ୍ୟାଚ୍ ଖେଳା ଯାଇଛି । ଏଥିରୁ ୩୮ ଥର ପ୍ରଥମେ ବ୍ୟାଟିଂ କରିଥିବା ଦଳ ମ୍ୟାଚ୍ ଜିତିଛି । ଆଉ ୫୬ ଥର ଦ୍ୱିତୀୟ ଇନିଂସରେ ବ୍ୟାଟିଂ କରିଥିବା ଦଳ ବିଜୟୀ ହୋଇଛି । ଆଉ ୫୦ ଥର ଟସ୍ ଜିତିଥିବା ଦଳ ୪୪ ଥର ମ୍ୟାଚ୍ ଜିତିଛି । ଏହି ଗ୍ରାଉଣ୍ଡରେ ସର୍ବୋଚ୍ଚ ସ୍କୋର ୨୬୨ ରନ ରହିଛି । ୨୦୨୪ରେ କୋଲକାତା ନାଇଟ୍ ରାଇଡର୍ସ ପଞ୍ଜାବ କିଙ୍ଗ୍‌ସ ବିପକ୍ଷରେ ଏହି ରନ କରିଥିଲା ।  ଆଉ ସର୍ବନିମ୍ନ ସ୍କୋର ୪୯ ରହିଛି ।

ଇଡେନ ଗାର୍ଡେନ୍‌ସରେ ଭଲ ବାଉନ୍ସ ଦେଖିବାକୁ ମିଳିଥାଏ । ହେଲେ ଏହି ପିଚ୍ ବୋଲରଙ୍କ ତୁଳନାରେ ବ୍ୟାଟରଙ୍କୁ ବେଶ ସୁହାଇଥାଏ । ସ୍ପିନରଙ୍କୁ ମଧ୍ୟ ପିଚରୁ ସହାୟତା ମିଳିଥାଏ । ଏଠାକାର ଆଉଟ ଫିଲ୍ଡ ବହୁତ ଦ୍ରୁତ ରହିଛି । ପ୍ରଥମେ ବ୍ୟାଟିଂ କରୁଥିବା ଦଳକୁ ୨୨୦ କିମ୍ବା ୨୩୦ ରନ କରିବା ଦରକାର । ଏଥିରୁ କମ ରନ କଲେ ଦ୍ୱିତୀୟ ବ୍ୟାଟିଂ କରୁଥିବା ଦଳର ବିଜୟ ସମ୍ଭାବନା ଅଧିକ ରହିଥାଏ ।