କୋଲକାତା: ଯେଉଁ ସନରାଇଜର୍ସ ହାଇଦ୍ରାବାଦ ପ୍ରଥମ ୬ ଓଭରରେ ୧୦୦ ରନ କରୁଥିଲା, ଆଜି ଏହି ଦଳ ୧୨୦ ରନରେ ଅଲଆଉଟ୍ ହୋଇଛି । ଆଇପିଏଲ ୨୦୨୫ର ୧୫ତମ ମ୍ୟାଚରେ କୋଲକାତା ନାଇଟ୍ ରାଇଡର୍ସ ଇଡେନ ଗାର୍ଡେନ୍ସରେ ହାଇଦ୍ରାବାଦକୁ ୮୦ ରନରେ ହରାଇଛି । ଆଉ ଦଳ ବିଜୟରେ ହିରୋ ସାଜିଛନ୍ତି ଭେଙ୍କଟେଶ ଆୟର ଓ ବୋଲର । ବିଜୟ ସହ କୋଲକାତା ପଏଣ୍ଟ ଟେବୁଲର ପଞ୍ଚମ ସ୍ଥାନକୁ ଉଠିଥିବା ବେଳେ ହାଇଦ୍ରାବାଦ ୧୦ମ ସ୍ଥାନକୁ ଖସି ଆସିଛି । ଚଳିତ ସିଜିନରେ ଲଗାତାର ତୃତୀୟ ମ୍ୟାଚ୍ ହାରିଛି ହାଇଦ୍ରାବାଦ । ଏପରିକି ଆଇପିଏଲ୍ ଇତିହାସରେ ହାଇଦ୍ରାବାଦର ଏହା ସବୁଠୁ ବଡ  ପରାଜୟ ।  ମ୍ୟାଚରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିବା ହାଇଦ୍ରାବାଦକୁ ଏହା ବୁମେରାଂ ସାବ୍ୟସ୍ତ ହୋଇଛି ।

ପ୍ରଥମେ ବ୍ୟାଟିଂ କରିଥିବା କୋଲକାତା ଦମଦାର ବ୍ୟାଟିଂ କରି ୬ ୱିକେଟ୍ ହରାଇ ୨୦୦ ରନ କରିଥିଲା । ଦଳ ପକ୍ଷରୁ ଅଧିନାୟକ ଆଜିଙ୍କ୍ୟ ରାହାଣେ ୩୮ ରନ କରିଥିବା ବେଳେ ଅଙ୍ଗକୃଷ ରଘୁବଂଶୀ ୫୦ ରନର ଉଲ୍ଲେଖନୀୟ ଇନିଂସ ଖେଳିଥିଲେ । ତେବେ ଦଳକୁ ୨୦୦ ରନ ସ୍କୋରରେ ପହଞ୍ଚାଇଥିଲେ ଭେଙ୍କଟେଶ ଆୟର ଓ ରିଙ୍କୁ ସିଂ । ଆୟର ବିସ୍ଫୋରକ ବ୍ୟାଟିଂ କରି ମାତ୍ର ୨୯ ବଲରୁ ୭ ଚୌକା ଓ ୩ ଛକା ସହ ୬୦ ରନ କରିଥିଲେ । ରିଙ୍କୁ ୧୭ ବଲରୁ ୪ ଚୌକା ଓ ୧ ଛକା ସହ ୩୨ ରନ କରି ଅପରାଜିଥିଲେ ।

ଜବାବରେ ସନରାଇଜର୍ସ ହାଇଦ୍ରାବାଦ ଆରମ୍ଭରୁ ବ୍ୟାଟିଂ ବିପର୍ଯ୍ୟୟ ଭୋଗିଥିଲା । ଦଳ ନିୟମିତ ୱିକେଟ୍ ହରାଇ ୧୨୦ ରନରେ ଅଲଆଉଟ୍ ହୋଇଥିଲା । ହେନରିକ କ୍ଲାସେନ ୩୩ ରନ କରିଥିବା ବେଳେ କାମିନ୍ଦୁ ହସରଙ୍ଗା ୨୭ ରନ କରିଥିଲେ । ନୀଶିତ କୁମାର ରେଡ୍ଡୀ ୧୯ ଓ ଅଧିନାୟକ ପାଟ୍ କମିନ୍ସ ୧୪ ରନ ଦୁଇ ଅଙ୍କ ଛୁଇଁଥିଲେ । କୋଲକାତା ପକ୍ଷରୁ ବୋଲିଂରେ ବରୁଣ ଚକ୍ରବର୍ତ୍ତୀ ଓ ବୈଭବ ଆରୋରା ୩ଟି ଲେଖାଏଁ ୱିକେଟ ନେଇଛନ୍ତି ।