ନୂଆଦିଲ୍ଲୀ: ଆସନ୍ତାକାଲି ରାମ ନବମୀ । ଏହି ଅବସରରେ ସାରା ଦେଶରେ ବାହାରିବ ଶ୍ରଦ୍ଧାଳୁଙ୍କ ଶୋଭାଯାତ୍ରା । ରାମଙ୍କ ଶୋଭାଯାତ୍ରା ବାହାରିବାବେଳେ ଝାଡ଼ଖଣ୍ଡରେ ବିଜୁଳି କାଟ ହେବ । କୌଣସି ବି ବିଦ୍ୟୁତ ଜନିତ ଅଘଟଣକୁ ଏଡ଼ାଇବାକୁ ବିଦ୍ୟୁତ କାଟ୍ ପାଇଁ ଝାଡ଼ଖଣ୍ଡ ସରକାର କରିଥିବା ଆବେଦନକୁ ମାନ୍ୟବର ସର୍ବୋଚ୍ଚ ଅଦାଲତ ଅନୁମତି ପ୍ରଦାନ କରିଛନ୍ତି । ଫଳରେ ଝାଡ଼ଖଣ୍ଡରେ ଯେଉଁଠି ରାମଙ୍କ ଶୋଭାଯାତ୍ରା ବାହାରିବ ସେଠାରେ ବିଜୁଳି କାଟ୍ କରାଯିବ । 

ସୁପ୍ରିମକୋର୍ଟ ମୁଖ୍ୟ ବିଚାରପତି ସଞ୍ଜିବ ଖନ୍ନା, ବିଚାରପତି ସଞ୍ଜୟ କୁମାର ଏବଂ ବିଚାରପତି କେଭି ବିଶ୍ୱନାଥନଙ୍କ ଖଣ୍ଡପୀଠ ଝାଡ଼ଖଣ୍ଡ ହାଇକୋର୍ଟ ଦେଇଥିବା ରାୟର ବିରୋଧ କରି ରାଜ୍ୟ ସରକାର ଏବଂ ବିଦ୍ୟୁତ ବିପଣନ କମ୍ପାନୀ ପକ୍ଷରୁ କରାଯାଇଥିବା ଆବେଦନର ଶୁଣାଣି କରିଛନ୍ତି । ଝାଡ଼ଖଣ୍ଡ ହାଇକୋର୍ଟଙ୍କ ନିର୍ଦ୍ଦେଶକୁ ସୁପ୍ରିମକୋର୍ଟ ସଂଶୋଧନ କରିଛନ୍ତି । ରାମନବମୀ ଶୋଭାଯାତ୍ରା ସମୟରେ ବିଦ୍ୟୁତ କାଟ୍ କରିବାକୁ ସରକାର ଅପିଲ କରିଥିଲେ । ଯାହାକୁ ଅନୁମତି ପ୍ରଦାନ କରିଛନ୍ତି ଖଣ୍ଡପୀଠ । ବିଦ୍ୟୁତ ଆଘାତ ଘଟଣା ଏଡାଇବା ପାଇଁ ରାମନବମୀ ଶୋଭାଯାତ୍ରା ରାସ୍ତାରେ ବିଦ୍ୟୁତ ଯୋଗାଣ ବନ୍ଦ କରିବାକୁ ଅନୁମତି ଦେଇଛନ୍ତି । 

ରାଜ୍ୟ ସରକାରଙ୍କ ପକ୍ଷରୁ ବରିଷ୍ଠ ଓକିଲ କପିଲ ସିବଲଙ୍କ ଯୁକ୍ତି ଉପସ୍ଥାପନ କରିଥିଲେ । ସେ କହିଥିଲେ ଯେ ଏପରି ଶୋଭାଯାତ୍ରାରେ ଲୋକମାନେ ସାଧାରଣତଃ ଲମ୍ବା ଲମ୍ବା ପତାକା ଧରି ଚାଲନ୍ତି ଏବଂ ଏହା ବିଦ୍ୟୁତ୍ ଆଘାତର ଭଳି ଦୁର୍ଭାଗ୍ୟଜନକ ଘଟଣା ଘଟାଇପାରେ । ଖଣ୍ଡପୀଠ ଝାଡ଼ଖଣ୍ଡ ସରକାରଙ୍କୁ ବିଦ୍ୟୁତ୍ କାଟକୁ ସର୍ବନିମ୍ନ ସ୍ତରକୁ ରଖିବାକୁ ଏବଂ କେବଳ ଶୋଭାଯାତ୍ରା ରାସ୍ତାରେ ସୀମିତ ରଖିବାକୁ କହିଥିଲେ । କଟକଣା ସମୟରେ ହସ୍ପିଟାଲଗୁଡ଼ିକୁ ବିଦ୍ୟୁତ ଯୋଗାଣ ସୁନିଶ୍ଚିତ କରିବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦିଆଯାଇଛି ।