ହାଇଦ୍ରାବାଦ: ଉତ୍ତର ପ୍ରଦେଶରର ମେରଠରେ ମୁସ୍କାନ ନିଜର ସ୍ୱାମୀ ସୌରଭ ଭରଦ୍ୱାଜଙ୍କୁ ଏଥିପାଇଁ ହତ୍ୟା କଲା କାରଣ ସେ ନିଜର ଅବଶିଷ୍ଟ ଜୀବନ ନିଜର ପୁରୁଣା ପ୍ରେମିକ ସାହିଲ ସହ ବିତାଇବାକୁ ଚାହୁଁଥିଲା । ଠିକ୍ ସେହିପରି ତେଲେଙ୍ଗାନାର ସଙ୍ଗାରେଡୀରେ ଏଥିରୁ ଆହୁରି ଜଘନ୍ୟ ଓ ଅମାନବୀୟ ଘଟଣା ସାମ୍ନାକୁ ଆସିଛି । ଏଥିରେ ଜଣେ ମହିଳା ନିଜର ତିନି ପିଲାଙ୍କୁ ହତ୍ୟା କରିଛି । ଯଦ୍ୱାରା ସେ ନିଜର ସହପାଠୀ ଶିବା ସହିତ ଜୀବନ ସାରା ରହି ପାରିବ । ଦୁହେଁ ନବମ ଓ ଦଶମରେ ଗୋଟିଏ ଶ୍ରେଣୀରେ ପାଠ ପଢୁଥିଲେ । ଆଉ ଦୀର୍ଘ ସମୟ ପରେ ପରସ୍ପରକୁ ଭେଟିଥିଲେ । ପୋଲିସ ଏହି ମାମଲାରେ ଅଭିଯୁକ୍ତ ୩୦ ବର୍ଷୀୟ ମହିଳା ରଜିତା ଓ ତାର ପ୍ରେମିକ ସୁରୁ ଶିବକୁମାରଙ୍କୁ ଗିରଫ କରିଛି । ପୋଲିସ ମାମଲାର ଖୁଲାସା କରିବା ପରେ ସଭିଏ ଆଚମ୍ବିତ ହୋଇ ପଡିଛନ୍ତି । ପୋଲିସର କହିବା କଥା ଶିବକୁମାର ଓ ରଜିତା କିଛି ମାସ ପୂର୍ବେ ଦଶମ ଶ୍ରେଣୀ ବ୍ୟାଚର ବନ୍ଧୁମିଳନ ଉତ୍ସବରେ ଭେଟିଥିଲେ ।

ପୋଲିସ ଅନୁଯାୟୀ, ରଜିତାଙ୍କ ଚେନ୍ନେୟା ସହିତ ୨୦୧୩ରେ ବିବାହ ହୋଇଥିଲା । ୩୦ ବର୍ଷୀୟ ରଜିତାଙ୍କ ତୁଳନାରେ ଚେନ୍ନେୟାଙ୍କ ବୟସ ବହୁତ ଅଧିକ ଥିଲା । ଏବେ ତାଙ୍କ ବୟସ ୫୦ ବର୍ଷ । ଆଉ ଉଭୟଙ୍କ ମଧ୍ୟରେ ଏହି ବୟସ ବ୍ୟବଧାନ  ଘଟଣାର ସବୁଠୁ ବଡ କାରଣ ବୋଲି ଜଣା ପଡିଛି । ରଜିତା ଓ ଚେନ୍ନେୟା ସର୍ବଦା ଝଗଡା କରୁଥିଲେ । ଏହା ମଧ୍ୟରେ ଛଅ ମାସ ପୂର୍ବେ ଦଶମ ଶ୍ରେଣୀର ବନ୍ଧୁମିଳନ ଉତ୍ସବରେ ରଜିତା ପୂର୍ବତନ କ୍ଲାସମେଟ୍ ଶିବାଙ୍କୁ ଭେଟିଥିଲେ । ଆଉ ଏହି ସମୟରେ ଦୁହିଁଙ୍କ ମଧ୍ୟରେ ଥିବା ପୁରୁଣା ଭଲ ପାଇବା ପୁଣି ଥରେ ଜାଗି ଉଠିଥିଲା । ଦୁହିଁଙ୍କ ମଧ୍ୟରେ ସଂପର୍କ ନିବିଡ ହେବା ପରେ ଉଭୟ ବିବାହ କରିବା ଏବଂ ନୂଆ ଜୀବନ ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ । ଏଥିପାଇଁ ରଜିତା ନିଜର ତିନି ପିଲାକୁ ହତ୍ୟା କରିବାକକୁ ପଛାଇ ନ ଥିଲା । 

ପୋଲିସ ଅନୁଯାୟୀ, ଶିବା ରଜିତା ସହ ରହିବା ପାଇଁ ଗୋଟିଏ ସର୍ତ୍ତ ରଖିଥିଲା ଯେ, ସେ ନିଜ ପିଲାଠୁ ଅଲଗା ରହୁ । ତେବେ ଯାଇ ଉଭୟଙ୍କ ବିବାହ ହୋଇ ପାରିବ । ରଜିତା ନିଜର ଇଚ୍ଛା ପୂରଣ କରିବା ପାଇଁ ନିଜ ପିଲାଙ୍କୁ ହତ୍ୟା କରିବା ପାଇଁ ଯୋଜନା କରିଥିଲା । ସେ ଶିବାକୁ ନିଜ ନିଷ୍ପତ୍ତି ବିଷୟରେ ମାର୍ଚ୍ଚ ୨୭ରେ ଜଣାଇଥିଲା । ଆଉ ଶିବା ଏଥିରେ ସହମତି ପ୍ରକାଶ କରିଥିଲା । 

ଏହା ପରେ ରଜିତା ନିଜ ପିଲାଙ୍କୁ ଏକ ତଉଲିଆ ଜରିଆରେ ମୁହଁ ବନ୍ଦ କରି ହତ୍ୟା କରିଥିଲା । ଏହିପରି ସେ ଗୋଟିଏ ପରେ ଗୋଟିଏ ପିଲାକୁ ହତ୍ୟା କରିଥିଲା । ୱାଟର ଟ୍ୟାଙ୍କର ଚଲାଉଥିବା ଚେନ୍ନେୟା ଯେବେ ବିଳମ୍ବିତ ରାତ୍ରିରେ ଘରକୁ ଫେରିଲେ ରଜିତା ପେଟ କାଟୁଥିବା ବାହାନା କରିଥିଲା । ପିଲାମାନେ ମଧ୍ୟ ଅଚେତ ଅଛନ୍ତି, ଯେବେଠୁ ସେମାନଙ୍କୁ ଭାତ ଓ ଦହି ଖାଇବାକୁ ଦେଇଛି ଏମିତି ଘଟଣା ଘଟିଥିବା ରଜିତା ଚେନ୍ନେୟାକୁ ଜଣାଇଥିଲା । 

ପୋଲିସ ଅନୁସାରେ, ପେଟ ଯନ୍ତ୍ରଣା ହେଉଥିବା କହିବା ପରେ ଚେନ୍ନେୟା ଓ ପଡୋଶୀ ରଜିତା ଓ ସବୁ ପିଲାଙ୍କୁ ନେଇ ହସ୍ପିଟାଲରେ ପହଞ୍ଚିଥିଲେ । ଘଟଣାରେ ଯେବେ ହସ୍ପିଟାଲର କର୍ମଚାରୀଙ୍କ ମନରେ ସନ୍ଦେହ ଉପୁଜିଲା ସେମାନେ ପୋଲିସକୁ ସୂଚନା ଦେଇଥିଲେ । ପୋଲିସ ହସ୍ପିଟାଲ ପହଞ୍ଚିବାରୁ ହିଁ ମାମଲାର ଖୁଲାସା ହୋଇଥିଲା । ରଜିତା ନିଜ ପିଲାଙ୍କ ହତ୍ୟା କରିଥିବା ସ୍ୱୀକାର କରିଥିଲା । ତିନି ପିଲାଙ୍କ ବୟସ ୧୨, ୧୦ ଓ ୮ ବର୍ଷ ହେବ ।