ନୂଆଦିଲ୍ଲୀ: ସଂସଦର ଅଷ୍ଟାଦଶ ବଜେଟ ଅଧିବେଶନ ଦୁଇ ଦିନ ପୂର୍ବରୁ ଶେଷ ହୋଇଛି । ଉଭୟ ଗୃହକୁ ଅନିର୍ଦ୍ଧିଷ୍ଟ କାଳ ପାଇଁ ମୁଲତବୀ ଶୁକ୍ରବାର ମୁଲତବୀ ଘୋଷଣା କରାଯାଇଛି । ବାଚସ୍ପତି ଓମ୍ ବିର୍ଲା ଲୋକସଭା ଗୃହ କାର୍ଯ୍ୟକୁ ଅନିର୍ଦ୍ଧିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି । ଅନ୍ୟପକ୍ଷରେ ଶେଷ ପର୍ଯ୍ୟାୟରେ ବିରୋଧୀ ସଦସ୍ୟମାନେ ଗୃହରେ ନାରାବାଜି କରୁଥିବା ଦେଖିବାକୁ ମିଳିଛି । ଏକଛତ୍ରବାଦ ଶାସନ ବନ୍ଦ କର ବୋଲି ନାରା ଦେଇଥିଲେ । ସେହିପରି ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ ମୁଲତବୀ ଘୋଷଣା କରିଛନ୍ତି । 

୩୧ ଜାନୁୟାରୀ, ୨୦୨୫ରେ ଲୋକସଭାର ଅଷ୍ଟାଦଶ ବଜେଟ ଅଧିବେଶନ ଆରମ୍ଭ ହୋଇଥିଲା । ଆସନ୍ତା ଏପ୍ରିଲ ୬ ତାରିଖରେ ଶେଷ କାର୍ଯ୍ୟ ଦିବସ ରହିଥିବାବେଳେ ଦୁଇ ଦିନ ପୂର୍ବରୁ ବାଚସ୍ପତି ଗୃହକୁ ଅନିର୍ଦ୍ଧିଷ୍ଟ କାଳ ପାଇଁ ସ୍ଥଗିତ ଘୋଷଣା କରିଛନ୍ତି । ଏହି ଅଧିବେଶନରେ ମୋଟ ୨୬ଟି ବୈଠକ ହୋଇଥିବାବେଳେ ସଂସଦର ଉତ୍ପାଦତା ୧୧୮ ପ୍ରତିଶତ ଅଧିକ ରହିଥିଲା । ମାନନୀୟ ରାଷ୍ଟ୍ରପତିଙ୍କ ଧନ୍ୟବାଦ ପ୍ରସ୍ତାବ ଉପରେ ୧୭୩ ଜଣ ସଦସ୍ୟ ଅଂଶ ଗ୍ରହଣ କରିଥିଲେ । ସେହିପରି କେନ୍ଦ୍ରୀୟ ବଜେଟ ଆଲୋଚନାରେ ୧୬୯ ସଦସ୍ୟ ଭାଗ ନେଇଥିଲେ । ଚଳିତ ଅଧିବେଶନରେ ୧୦ଟି ସରକାରୀ ବିଧେୟକ ଆଗତ ହୋଇଛି । ସେହିପରି ୱକଫ୍ ସଂଶୋଧନ ବିଲ ଭଳି ଗୁରୁତ୍ୱପୂର୍ଣ୍ଣ ବିଧେୟକ ସହିତ ମୋଟ ୧୬ଟି ବିଧେୟକ ପାରିତ ହୋଇଛି ବୋଲି କହିଛନ୍ତି ବାଚସ୍ପତି । 

ଅନ୍ୟପକ୍ଷରେ ଚଳିତ ବଜେଟ ଅଧିବେଶନ ରେକର୍ଡ ସୃଷ୍ଟି କରିଛି । ଏପ୍ରିଲ ୧ ତାରିଖରେ ଶୂନ୍ୟକାଳ ଆଲୋଚନାରେ ୨୦୨ ଜଣ ସଦସ୍ୟ ଲୋକମତକୁ ନେଇ ପ୍ରଶ୍ନ ଉଠାଇଥିଲେ । ଯାହାକି ଏବେ ଯାଏଁ ଉଠାଯାଇଥିବା ପ୍ରଶ୍ନର ସର୍ବକାଳୀନ ରେକର୍ଡ ଅଟେ । ପରିଶେଷରେ ବାଚସ୍ପତି ରାଷ୍ଟ୍ରପତି, ପ୍ରଧାନମନ୍ତ୍ରୀ ଏବଂ ସମସ୍ତ ସଦସ୍ୟଙ୍କୁ ଧନ୍ୟବାଦ ଜଣାଇବା ସହିତ ଗୃହକୁ ଅନିର୍ଦ୍ଧିଷ୍ଟ କାଳ ପାଇଁ ମୁଲତବୀ ଘୋଷଣା କରିଛନ୍ତି । 

ସେପଟେ ଶେଷ ଦିନରେ ମଧ୍ୟ ବିରୋଧୀଙ୍କ ହଙ୍ଗାମା ଲାଗି ରହିଥିଲା । ୱକଫ ବିଲକୁ ବିରୋଧ କରି ନାରାବାଜି କରିଥିଲେ । ଏକ ଛତ୍ରବାଦ ଶାସନ ଚଳିବ ନାହିଁ ବୋଲି ନାରା ଦେଇଥିଲେ । ଅଧିକାଂଶ ସଦସ୍ୟ ବାଚସ୍ପତିଙ୍କ ପୋଡ଼ିୟମ ନିକଟକୁ ଆସି ହୋହାଲ୍ଲା କରିଥିଲେ ।