କୋଲକାତା: କୋଲକାତା ହାଇକୋର୍ଟରୁ ଶୁକ୍ରବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ବଡ ଝଟକା ଲାଗିଛି । କୋର୍ଟ ହିନ୍ଦୁ ସଂଗଠନ ଅଞ୍ଜନୀ ପୁତ୍ର ସେନାକୁ ହାୱଡାରେ ପ୍ରସ୍ତାବିତ ରୁଟରେ ରାମ ନବମୀରେ ରାଲି ବାହାର କରିବାକୁ ଅନୁମତି ଦେଇଛନ୍ତି । ଆରମ୍ଭରୁ ପଶ୍ଚିମବଙ୍ଗ ସରକାର ଏହି ରାଲିକୁ ଅନୁମତି ଦେବାକୁ ମନା କରି ଦେଇଥିଲେ । କୋର୍ଟ ମାମଲାର ଶୁଣାଣି କରି ଏପ୍ରିଲ ୬ ରାମ ନବମୀରେ ରାଲି ବାହାର କରିବାକୁ ଉକ୍ତ ସଂଗଠନକୁ ଅନୁମତି ଦେଇଛନ୍ତି ।

କୋର୍ଟ ହିନ୍ଦୁ ସଂଗଠନକୁ ଶାନ୍ତିପୂର୍ଣ୍ଣ ରାଲି ସୁନିଶ୍ଚିତ କରିବା ପାଇଁ କିଛି ସର୍ତ୍ତ ମଧ୍ୟ ରଖିଛନ୍ତି । ଏହି ରାଲି ନରସିଂହ ମନ୍ଦିରରୁ ଆରମ୍ଭ ହୋଇ ଜିଟି ରୋଡ୍ ଦେଇ ହାୱଡା ମଇଦାନରେ ସମାପ୍ତ ହେବ । ପ୍ରତି ବର୍ଷ ରାମ ନବମୀ ଅବସରରେ ଏହି ଧାର୍ମିକ କାର୍ଯ୍ୟକ୍ରମ ଆୟୋଜିତ ହୋଇଥାଏ । କୋର୍ଟ କିଛି ସର୍ତ୍ତ ଲଗାଇ କହିଛନ୍ତି ଯେ, ଏହି ରାଲି ଶାନ୍ତିପୂର୍ଣ୍ଣ  ହେବ ଏବଂ କୌଣସି ବ୍ୟକ୍ତି ହାତରେ ଅସ୍ତ୍ରଶସ୍ତ୍ର ଧରିବେ ନାହିଁ । ପତାକା ଓ ପ୍ଲାଷ୍ଟିକର ଗଦା ରାଲିରେ ଧରି ପାରିବେ । ରାଲିର ଆଗରେ ଓ ପଛରେ ପୋଲିସ ଗାଡି ମୁତୟନ ରହିବ । 

ସକାଳ ସାଢେ ୮ଟାରୁ ମଧ୍ୟାହ୍ନ ୧୨ଟା ଭିତରେ ରାଲି ସାରିବାକୁ ପଡିବ । ଏଥିରେ ୫୦୦ ଲୋକ ସାମିଲ ହୋଇ ପାରିବେ । ସମସ୍ତଙ୍କୁ ନିଜର ଆଧାରକାର୍ଡ, ପାନ କାର୍ଡ ଜମା କରିବାକୁ ହେବ । ଏହା ପୂର୍ବରୁ ପଶ୍ଚିମବଙ୍ଗ ପୋଲିସ ଅଞ୍ଜନୀ ପୁତ୍ର ସେନାକୁ ଏପ୍ରିଲ ୬ରେ ଉକ୍ତ ମାର୍ଗରେ ରାମ ନବମୀ ରାଲି ବାହାର କରିବାକୁ ମନା କରି ଦେଇଥିଲା । ସୁରକ୍ଷା ଚିନ୍ତା ଏବଂ ଅଦାଲତ ଆଦେଶର ଉଲ୍ଲଂଘନ କାରଣ ଦର୍ଶାଇ ପୋଲିସ ଦୁଇଟି ଅନ୍ୟ ବିକଳ୍ପ ମାର୍ଗରେ ରାଲି ବାହାର କରିବାକୁ ପ୍ରସ୍ତାବ ଦେଇଥିଲା । ଏହା ପରେ ସଂଗଠନ ହାଇକୋର୍ଟରେ ଏହାକୁ ଚ୍ୟାଲେଞ୍ଜ ଦେଇଥିଲେ ।

ପୋଲିସ ହିନ୍ଦୁ ସଂଗଠନକୁ ଜଣାଇଥିଲେ ଯେ, ଗତ ବର୍ଷ ଏପ୍ରିଲ ୧୭ରେ ବାହାର କରାଯାଇଥିବା ରାମ ନବମୀ ଶୋଭା ଯାତ୍ରାରେ ହାଇକୋର୍ଟଙ୍କ ନିୟମର ଉଲ୍ଲଂଘନ ହୋଇଥିଲା । ରାଲିରେ ୨୦୦ ଲୋକ ସାମିଲ ହୋଇ ପାରିବେ ବୋଲି କୋର୍ଟ କହିଥିଲେ । ହେଲେ ସେଥିରୁ ଅଧିକ ଲୋକ ସାମିଲ ହୋଇ ହାଇକୋର୍ଟଙ୍କ ନିୟମର ଉଲ୍ଲଂଘନ କରାଯାଇଥିଲା ।