ନୂଆଦିଲ୍ଲୀ: ସଂଖ୍ୟା ଗରିଷ୍ଠତା ଦୃଷ୍ଟିରୁ ସଂସଦର ଉଭୟ ଗୃହରେ ୱକଫ୍ ସଂଶୋଧନ ବିଲ ସହଜରେ ପାରିତ ହୋଇଯାଇଥିବାବେଳେ ଏବେ କେନ୍ଦ୍ର ସରକାରଙ୍କ ପାଇଁ ଅଡ଼ୁଆ ବଢ଼ିବାର ଆଶଙ୍କା ସୃଷ୍ଟି ହୋଇଛି । ଏବେ ନ୍ୟାୟିକ ଲଢ଼େଇ ସାମ୍ନା କରିବ ୱକଫ୍ ସଂଶୋଧନ ବିଲ୍ । କଂଗ୍ରେସ ସାଂସଦ ମୋହମ୍ମଦ ଜାଭେଦ ସାମ୍ବିଧାନିକ ପ୍ରାବଧାନ ଉଲ୍ଲଂଘନ ଦର୍ଶାଇ ମାନବ୍ୟର ସର୍ବୋଚ୍ଚ ଅଦାଲତଙ୍କ ନିକଟରେ ଗୁହାରୀ କରିଛନ୍ତି । ତାଙ୍କ ପରେ ପରେ ଏଆଅସିଏମଆଇଏମର ଅଧ୍ୟକ୍ଷ ତଥା ସାଂସଦ ଅସଦୁଦ୍ଦୀନ ଓବୈସୀ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । 

ମହମ୍ମଦ ଜାଭେଦଙ୍କ ଆବେଦନରେ କୁହାଯାଇଛି ଯେ ଏହି ବିଲ୍ ୱାକଫ ସମ୍ପତ୍ତି ଏବଂ ସେଗୁଡ଼ିକର ପରିଚାଳନା ଉପରେ ମନଇଚ୍ଛା କଟକଣା ଲାଗୁ କରୁଛି, ଯାହାକି ମୁସଲିମ ସମ୍ପ୍ରଦାୟର ଧାର୍ମିକ ସ୍ୱାୟତ୍ତତାକୁ କ୍ଷୁର୍ଣ୍ଣ କରୁଛି । ସେହିପରି ଓବୈସୀ ବିଲର ବ୍ୟବସ୍ଥାଗୁଡ଼ିକ ମୁସଲମାନ ଏବଂ ମୁସଲିମ ସମ୍ପ୍ରଦାୟର ମୌଳିକ ଅଧିକାରକୁ ସ୍ପଷ୍ଟ ଭାବରେ ଉଲ୍ଲଂଘନ କରୁଥିବା ଆବେଦନରେ ଯୁକ୍ତି ବାଢ଼ିଛନ୍ତି । ଏହା ପୂର୍ବରୁ ଓବୈସୀ ସଂସଦରେ ଏହି ବିଲ୍ କାଗଜକୁ ଚିରି ଦେଇଥିଲେ ।  

ଏହି ବିଲ୍ ରାଜ୍ୟସଭାରେ ୧୨୮ ସଦସ୍ୟଙ୍କ ସମର୍ଥନରେ ଗୃହୀତ ହୋଇଥିଲା, ଯେତେବେଳେ ୯୫ ସଦସ୍ୟ ଏହାକୁ ବିରୋଧ କରିଥିଲେ। ଏହି ବିଲ୍ ଲୋକସଭାରେ ୩ ଏପ୍ରିଲରେ ଗୃହୀତ ହୋଇଥିଲା ଯେଉଁଥିରେ ୨୮୮ ଜଣ ସଦସ୍ୟ ଏହାକୁ ସମର୍ଥନ କରିଥିଲେ ଏବଂ ୨୩୨ ଜଣ ଏହାକୁ ବିରୋଧ କରିଥିଲେ ।