ଢେଙ୍କାନାଳ: ଶିକାର ଭାବି ସାଙ୍ଗକୁ ଗଳି କରିଦେଲା ସାଙ୍ଗ । ଏଭଳି ଏକ ଅଭାବନୀୟ ଘଟଣା ଘଟିଛି ଢେଙ୍କାନାଳ ହିନ୍ଦୋଳ ବ୍ଲକ ରାସୋଲ ଥାନା ଅଞ୍ଚଳରେ । ମୃତ ସାଙ୍ଗ ହେଲେ ମାନପୁର ଗାଁର ବାବୁଲା ନାୟକ । ଅଭିଯୁକ୍ତ ପ୍ରଶାନ୍ତ ନାୟକକୁ ପୋଲିସ ଅଟକ ରଖିଛି ।
ପ୍ରାପ୍ତ ସୂଚନା ମୁତାବକ, ରାସୋଲ ଥାନା ମାନପୁର ଗାଁର ପ୍ରଶାନ୍ତ ନାୟକ ଗତକାଲି ରାତିରେ ଶିକାର କରିବା ପାଇଁ ନିଜ ସାଙ୍ଗ ବାବୁଲା ନାୟକକୁ ଡାକି ସାଙ୍ଗରେ ନେଇଥିଲା । ଜଙ୍ଗଲରେ ଶିକାର କରଥିବା ସମୟରେ ସେ ତାଙ୍କ ସାଙ୍ଗକୁ ଗୁଳି କରି ହତ୍ୟା କରିଛି । ଖବର ପାଇ ରାସୋଲ ପୋଲିସ ଘଟଣା ସ୍ଥଳରେ ପହଁଚିଛି । ପ୍ରଶାନ୍ତକୁ ପୋଲିସ ଅଟକ ରଖି ପଚରା ଉଚରା କରୁଛି । ସେ ଅନ୍ଧାରରେ ଜାଣି ନ ପାରି ସାଙ୍ଗକୁ ଗୁଳି କରିଥିବା କହିଛି । ସେପଟେ ତା ନିକଟରୁ ଏକ ଦେଶୀ ବନ୍ଧୁକ ଓ ଅଫୁଟା ଗୁଳି ଜବତ କରିଛି । ପୋଲିସ ବାବୁଲାଙ୍କ ମୃତ ଦେହକୁ ବ୍ୟବଚ୍ଛେଦ ପାଇଁ ହିନ୍ଦୋଳ ଡ଼ାକ୍ତରଖାନାରେ ପଠାଇବା ସହ ତଦନ୍ତ ଆରମ୍ଭ କରିଛି ।