ରାୟଗଡା ; ବିବାହ ଏକ ପବିତ୍ର ବନ୍ଧନ । ଯେଉଁଥିରେ ଯୋଡି ହୁଏ ଦୁଇ ଅଜଣା ହୃଦୟ । ଟୋପାଏ ସିନ୍ଦୂର ଆଉ ଦୁଇ ପଟ ଶଂଖାରୁ ଆରମ୍ଭ ହୁଏ ନାରୀର ଆଉ ଏକ ଜୀବନ । ଦୁହେଁ ଏକାଠି ହୋଇ ବେଦୀରେ ବସି ଅଗ୍ନିକୁ ସାକ୍ଷୀ ରଖି ସାତ ଜନ୍ମର ସାଥୀ ହେବା ପାଇଁ ଶପଥ ନେଇଥାନ୍ତି । ଯେକୈାଣସି ପରିସ୍ଥିତି ଆସୁ ନା କାହିଁକି ଦୁହେଁ ସାରା ଜୀବନ ଏକାଠି ରହିବା ପାଇଁ ସଂକଳ୍ପ କରିଥାନ୍ତି । 

ଠିକ ସେହିପରି ସାଗରିକା ଆଉ ସମୀର ମଧ୍ୟ ଅଗ୍ନୀକୁ ସାକ୍ଷୀ ରଖି ସାତ ଜନ୍ମର ସାଥୀ ହୋଇ ରହିବା ପାଇଁ ପ୍ରତିଶ୍ରୃତି ନେଇଥିଲେ ଯେତେବେଳେ ଅଧାରାସ୍ତାରେ ସ୍ୱାମୀଙ୍କୁ ସେ ଛାଡି ଦେବେ ବା କେମିତି । ମୃତ୍ୟୁ ପରେ ବି ଭୁଲିପାରିନାହାନ୍ତି ସ୍ତ୍ରୀ । ସେଥିପାଇଁ ନିଜ ପାଖରେ ସ୍ୱାମୀଙ୍କ ସ୍ମୃତିକୁ ରଖିଛନ୍ତି ସ୍ତ୍ରୀ ସାଗରିକା । 

କିନ୍ତୁ ଆପଣ ଦେଖୁଥିବା ଏହି ମୂତ୍ତୀ ଜୀବନ୍ତ ନୁହେଁ । ଦୁଇ ବର୍ଷ ପୂର୍ବରୁ ସେ ଆରପାରିକୁ ଚାଲିଯାଇଛନ୍ତି । ହେଲେ ମୃତ୍ୟୁ ପରେ ବି ଆଜି ସେ ନିଜ ପରିବାର ଗହଣରେ ଅଛନ୍ତି । ଆଉ ସାଧାରଣ ଲୋକଙ୍କ ପରି ସୋଫାରେ ବସିଛନ୍ତି । ଦେଖିଲେ ଲାଗୁଛି ସତେଯେପରି ଜୀବନ୍ତ ମଣିଷଟିଏ ହସ ହସ ମୁହଁରେ ସମସ୍ତଙ୍କୁ ଚାହିଁଛନ୍ତି । ହଁ ଦର୍ଶକବନ୍ଧୁ ଏ ମୁର୍ତ୍ତି ହେଉଛି ରାୟଗଡା ଜିଲ୍ଲା ମୁନିଗୁଡ଼ାର ଜଣେ ଡାକ୍ତର ସମୀର ରାୟଙ୍କର । ସ୍ଵାମୀଙ୍କ ବିୟୋଗ ପରେ ଏତେ ବଡ ଦୁନିଆରେ କେମିତି ଏକା ବଞ୍ଚିବେ ଭାବି ପତ୍ନୀ ସାଗରିକା ରାୟ ସ୍ୱାମୀଙ୍କର ଏପରି ଏକ ସିଲିକନ ପ୍ରତିମୂର୍ତ୍ତି ନିର୍ମାଣ କରିଛନ୍ତି । କେବଳ ଯେ ନିର୍ମାଣ କରିଛନ୍ତି ତା’ ନୁହେଁ ମୁର୍ତ୍ତିରେ ପ୍ରାଣ ପ୍ରତିଷ୍ଠା ମଧ୍ୟ କରିଛନ୍ତି । 

ତେବେ ବିଗତ ୨୦୦୧ ରେ କଲିକତାରେ ସାଗରୀକା ରାୟ ଓ ସମୀର ରାୟଙ୍କର ବୈଦିକ ରୀତିନୀତି ଅନୁଯାୟୀ ବାହାଘର ହୋଇଥିଲା । ଦୀର୍ଘ ୨୨ ବର୍ଷ ପରେ ବି ସ୍ବାମୀ ସ୍ତ୍ରୀଙ୍କ ପ୍ରେମରେ ଟିକେବି ମଳିନ ପଡ଼ିନଥିଲା। ପରିବାରର ଦୁଇ ପିଲାଙ୍କ ଦାୟିତ୍ୱ ସହ ଖୁସିରେ ସଂସାର ରଥ ଗଡି ଚାଲିଥିଲା । ସମୀର ପଶ୍ଚିମବଙ୍ଗରୁ ଆସି ମୁନିଗୁଡା ତଥା ଆଖପାଖ ଅଞ୍ଚଳରେ ଗାଁକୁ ଗାଁ ବୁଲି ଲୋକଙ୍କ ବିଭିନ୍ନ ରୋଗର ଚିକିତ୍ସା କରୁଥିଲେ । କିନ୍ତୁ ଗତ ଦୁଇ ବର୍ଷ ତଳେ ଏକ ସାଧାରଣ ରୋଗରେ ପଡି ହଠାତ ତାଙ୍କର ମୃତ୍ୟୁ ଘଟିଥିଲା। ହେଲେ ସ୍ବାମୀଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରିନଥିଲେ ସାଗରୀକା ।

ଜଣେ ପୁଅ ଆଉ ଜଣେ ଝିଅର ମାଆ ହିସାବରେ ତାଙ୍କ ଉପରେ ଥିଲା ଅନେକ ଦାୟିତ୍ୱର ବୋଝ । ହାତରୁ ଭାଙ୍ଗିଯାଇଥିବା ଶଙ୍ଖା ଓ ସିନ୍ଦୁର ଧାରଣ କରି ଜଣେ ସଧବା ମାତୃଶକ୍ତି ବନିଥିଲେ ସାଗରିକା। କଲିକତାରେ ସ୍ବାମୀଙ୍କ ସିଲିକନ୍ ପ୍ରତିମୂର୍ତ୍ତି ତିଆରିକରି ମୁନିଗୁଡା ସ୍ଥିତ ନିଜ ବାସଭବନରେ ସ୍ଥାପନା କରି, ପୁରୋହିତଙ୍କ ଉପସ୍ଥିତିରେ ହୋମ ଯଜ୍ଞ ସହ ମୂର୍ତ୍ତିର ପ୍ରାଣ ପ୍ରତିଷ୍ଠା କରି ପୁନର୍ବାର ହିନ୍ଦୁ ରୀତିନୀତି ଅନୁଯାୟୀ ଵିଵାହ କରି ଶଙ୍ଖା ସିନ୍ଦୁର ଧାରଣ କରିଛନ୍ତି। ପିଲାମାନେ ବି ବାପାଙ୍କ ମୂର୍ତ୍ତି ଉପସ୍ଥିତିରେ ବେଶ ଖୁସି। ବେଦିରେ ଶପଥ ନେଇଥିବା ସାତଜନ୍ମର ସାଥିଙ୍କୁ ସ୍ତ୍ରୀ ଜଣଙ୍କ ଗୋଟେ ଜନ୍ମରୁ ଅଧାରୁ ଛାଡ଼ିଥାନ୍ତେ ବା କେମିତି । ଏହା ବୋଧେ ସ୍ବାମୀ ସ୍ତ୍ରୀଙ୍କର ପ୍ରକୃତ ଶାଶ୍ଵତ ଚିରନ୍ତନ ସମ୍ପର୍କ । ଆଉ ଏହିଭଳି ଘଟଣା ବର୍ତ୍ତମାନ ପୁରା ଜିଲ୍ଲାରେ ଚର୍ଚ୍ଚାର କେନ୍ଦ୍ରବିନ୍ଦୁ ସାଜିଛି।