ଭୁବନେଶ୍ୱର: ହିନ୍ଦୀ ଚଳଚ୍ଚିତ୍ର ଅଭିନେତା ଓ ନିର୍ଦ୍ଦେଶକ ମନୋଜ କୁମାରଙ୍କର ବିୟୋଗ ହୋଇଛି । ଏହି ମହାନ୍ତ ଅଭିନେତାଙ୍କ ଦେହାନ୍ତରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶୋକ ବ୍ୟକ୍ତ କରିଛନ୍ତି । ଏହା ସହିତ ସେ ମନୋଜଙ୍କ ଶୋକ ସନ୍ତପ୍ତ ପରିବାରକୁ ଗଭୀର ସମବେଦନା ଜଣାଇଛନ୍ତି । 

ମୁଖ୍ୟମନ୍ତ୍ରୀ ତାଙ୍କ ସୋସିଆଲ ମିଡିଆ ଆକାଉଣ୍ଟ ଏକ୍ସରେ କହିଛନ୍ତି ଯେ କିମ୍ବଦନ୍ତୀ ଅଭିନେତା ଏବଂ ନିର୍ଦ୍ଦେଶକ ମନୋଜ କୁମାରଙ୍କ ଦେହାନ୍ତରେ ମୁଁ ଗଭୀର ମର୍ମାହତ । ଭାରତୀୟ ସିନେମାରେ ତାଙ୍କର ଅବଦାନ, ବିଶେଷକରି ଦେଶପ୍ରେମକୁ ପ୍ରେରଣା ଦେବାରେ ତାଙ୍କର ଅବଦାନକୁ 'ଭାରତ କୁମାର' ଭାବରେ ତାଙ୍କ ପ୍ରଶଂସକଙ୍କ ମଧ୍ୟରେ ଚୀର ସ୍ମରଣୀୟ ହୋଇ ରହିବେ । ତାଙ୍କ ପରିବାର ଏବଂ ପ୍ରଶଂସକମାନଙ୍କ ପ୍ରତି ମୋର ଗଭୀର ସମବେଦନା । ତାଙ୍କ ଆତ୍ମାକୁ ଶାନ୍ତି ମିଳୁ ।

ଅଭିନେତା ମନୋଜ କୁମାର ୮୭ ବର୍ଷ ବୟସରେ ମୁମ୍ବାଇର କୋକିଲାବେନ ଧୀରୁଭାଇ ଅମ୍ବାନୀ ହସ୍ପିଟାଲରେ ପରଲୋକ ଘଟିଛି । ସେ ୨୪ ଜୁଲାଇ ୧୯୩୭ରେ ଜନ୍ମଗ୍ରହଣ କରିଥିଲେ । ମନୋଜ ଅନେକ ଚଳଚ୍ଚିତ୍ର ଅଭିନୟ କରିବା ସହିତ ନିର୍ଦ୍ଦେଶନା ମଧ୍ୟ ଦେଇଛନ୍ତି । ଦେଶାତ୍ମବୋଧକ ଚଳଚ୍ଚିତ୍ର ପାଇଁ ସେ ବେଶ ପରିଚିତ । "ଶହିଦ୍" (୧୯୬୫), "ଉପକାର" (୧୯୬୭), "ପୂରବ ଅର୍ ପଶ୍ଚିମ୍" (୧୯୭୦) ଏବଂ "ରୋଟି କପଡା ଅର୍ ମକାନ୍" (୧୯୭୪) ଭଳି ଦେଶ ପ୍ରେମ ଚଳଚ୍ଚିତ୍ର ଲୋକଙ୍କ ମନ କିଣି ଥିଲା । ଦେଶପ୍ରେମୀ ଚଳଚ୍ଚିତ୍ର ବ୍ୟତୀତ ସେ "ହରିୟାଲୀ ଅର୍ ରାସ୍ତା", "ୱୋ କୌନ୍ ଥି", "ହିମାଳୟ କି ଗୌଦ୍ ମେ", "ଦୋ ବଦନ୍", "ପୃଥ୍ୱୀ କେ ସାନମ୍", "ନୀଲ୍ କମଲ୍" ଏବଂ "କ୍ରାନ୍ତି" ଭଳି ଅଭିନୟ କରିଥିଲେ ଏବଂ ନିର୍ଦ୍ଦେଶନା ଦେଇଥିଲେ । ଭାରତୀୟ ସିନେମାରେ ଅବଦାନ ପାଇଁ ମନୋଜ କୁମାରଙ୍କୁ ୧୯୯୨ ମସିହାରେ ପଦ୍ମଶ୍ରୀ ଏବଂ ୨୦୧୫ ମସିହାରେ ଦାଦାସାହେବ ଫାଲକେ ପୁରସ୍କାରରେ ସମ୍ମାନିତ କରାଯାଇଥିଲା।