ବଲାଙ୍ଗୀର: ବଲାଙ୍ଗୀର ଜିଲ୍ଲା ଟିଟିଲାଗଡ଼ ମେଡ଼ିକାଲରୁ ରୋଗୀ ସ୍ଥାନାନ୍ତରବେଳେ ବଡ଼ ଅଘଟଣ ଘଟିଛି । ରୋଗୀକୁ ନେଇକି ଯାଉଥିବା ଏକ  ୧୦୮ ଆମ୍ବୁଲାନ୍ସର ଅକ୍ସିଜେନ୍ ସିଲିଣ୍ଡର ବିସ୍ଫୋରଣ ହୋଇଛି । ଫଳରେ ଜଣେ ସାମାନ୍ୟ ଆହତ ହୋଇଥିବାବେଳେ ଜଣେ ବୃଦ୍ଧା ଗୁରୁତର ହୋଇଛନ୍ତି । ସେମାନଙ୍କୁ ବଲାଙ୍ଗୀର ଭୀମଭୋଇ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଅନ୍ୟପକ୍ଷରେ ଆମ୍ବୁଲାନ୍ସରେ ଥିବା ଦୁଇ ଯାଆଁଳା ନବଜାତ ଶିଶୁ କନ୍ୟା ଅଳ୍ପକେ ରକ୍ଷା ପାଇଯାଇଛନ୍ତି । 

ମୁରିବାହାଲ ବ୍ଲକ୍ ଅଧିନସ୍ଥ ଚିକନୀ ବାହାଲି ଗାଁର ରାଧା ଯାନୀ ଟିଟିଲାଗଡ଼ ଏମସିଏଚ ମେଡ଼ିକାଲରେ ଆଜି ସକାଳ ଦୁଇଟି ଯାଆଁଳା ଶିଶୁକୁ ଜନ୍ମ ଦେଇଥିଲେ । ସମସ୍ତଙ୍କୁ ବଲାଙ୍ଗୀର ମେଡ଼ିକାଲକୁ ସ୍ଥାନାନ୍ତର କରିବାକୁ ଡାକ୍ତର ପରାମର୍ଶ ଦେଇଥିଲେ । ୧୦୮ ଆମ୍ବୁଲାନ୍ସରେ ସ୍ଥାନାନ୍ତର ପାଇଁ ଅକ୍ସିଜେନ୍ ସିଲିଣ୍ଡର୍ ସଂଯୋଗ କରାଯାଉଥିବାବେଳେ ହଠାତ୍ ବିସ୍ଫୋରଣ ହୋଇଥିଲା । ଫଳରେ ଆମ୍ବୁଲାନ୍ସରେ ପ୍ରସୂତୀଙ୍କ ସ୍ୱାମୀ ସାମାନ୍ୟ ଆହତ ହୋଇଥିବାବେଳେ ଅନ୍ୟ ଜଣେ ମହିଳା ଗୁରୁତର ହୋଇଛନ୍ତି । ଗୁରୁତର ମହିଳା ଜଣକ ହେଲେ ଦୁତୀୟା ଭୋଇ ତାଙ୍କର ଦୁଇଟି ଗୋଡ଼ ପୋଡ଼ି ଯାଇଛି । ତାଙ୍କୁ ଗୁରୁତର ଅବସ୍ଥାରେ ବଲାଙ୍ଗୀର ଭୀମ ଭୋଇ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଅନ୍ୟପକ୍ଷରେ ଦୁଇ ଯାଆଁଳା ଶିଶୁ କନ୍ୟା ଅଳ୍ପକେ ବର୍ତ୍ତି ଯାଇଛନ୍ତି ।