ନୂଆଦିଲ୍ଲୀ: ବହୁ ଚର୍ଚ୍ଚିତ ୱକଫ୍ ସଂଶୋଧନ ବିଲ୍ ସଂସଦର ଉଭୟ ଗୃହରେ ପାରିତ ହୋଇଯାଇଛି । ଦୁଇ ଦିନରେ ବ୍ୟାପକ ଆଲୋଚନା ପରେ ଶେଷରେ ବିଲ ପାରିତ ହୋଇଛି । ଏବେ ବିଲକୁ ରାଷ୍ଟ୍ରପତିଙ୍କ ଅନୁମୋଦନ ପାଇଁ ପଠାଯିବ । ରାଷ୍ଟ୍ରପତିଙ୍କ ଅନୁମୋଦନ ପରେ ଏହା ଆଇନରେ ପରିଣତ ହେବ । ସେପଟେ ହଁ ନାଇଁ ମଧ୍ୟରେ ଶେଷରେ ବିଜୁ ଜନତା ଦଳ ୱକଫ୍ ସଂଶୋଧନ ବିଲ ସପକ୍ଷରେ ଭୋଟ୍ ଦେଇଛି । ଏ ନେଇ ସୂଚନା ଦେଇଛନ୍ତି ବିଜେଡ଼ି ରାଜ୍ୟସଭା ସାଂସଦ ତଥା ଦଳର ମୁଖପାତ୍ର ଡାକ୍ତର ସସ୍ମିତ ପାତ୍ର । 

ସାଂସଦ ସସ୍ମିତ ପାତ୍ର ସମ୍ବାଦ ସରବରାହ ସଂସ୍ଥା ଏଏନ୍ଆଇକୁ ୱାକଫ୍ ସଂଶୋଧନ ବିଲ ସପକ୍ଷରେ ଭୋଟ ଦେଇଥିବା ପ୍ରତିକ୍ରିୟା ଦେଇଛନ୍ତି । ସେହିପରି ଦଳର ଅନ୍ୟ କିଛି ସାଂସଦ ମଧ୍ୟ ବିଲ୍ ସପକ୍ଷରେ ମତଦାନ କରିଥିବା ସେ କହିଛନ୍ତି । ଅନ୍ୟପକ୍ଷରେ ବିଲକୁ ବିରୋଧ କରୁଥିବା ସାଂସଦ ମୁନ୍ନା ଖାଁ ବିପକ୍ଷରେ ହିଁ ମତଦାନ କରିଛନ୍ତି । 

ଏହା ପୂର୍ବରୁ ସସ୍ମିତ ପାତ୍ର ଏହି ବିଲରେ ଅନେକ ସଂଶୋଧନର ଆବଶ୍ୟକତା ଥିବା କହିଥିଲେ । କିଛିଟା ପ୍ରାବଧାନ ଉଚିତ ନୁହେଁ ଏବଂ ଏହା ଅଳ୍ପ ସଂଖ୍ୟଙ୍କ ସପକ୍ଷରେ ନୁହେଁ ବୋଲି ସେ ମତ ରଖିଥିଲେ । ସେହିପରି ଗତକାଲି ରାଜ୍ୟସଭାରେ ମଧ୍ୟ ସାଂସଦ ମୁନ୍ନା ଖାଁ ମଧ୍ୟ ତୀବ୍ର ସମାଲୋଚନା କରିଥିଲେ । କିନ୍ତୁ ପରବର୍ତ୍ତୀ ସମୟରେ ସସ୍ମିତ ପାତ୍ର ପୁଣି ଏକ୍ସରେ ସୂଚନା ଦେଇଥିଲେ ଯେ ସମସ୍ତ ସଦସ୍ୟ ନିଜ ବିବେକ ଅନୁଯାୟୀ ମତ ଦେଇ ପାରିବେ ଏବଂ ଦଳ କୌଣସି ହ୍ୱିପ ଜାରି କରି ନାହିଁ । 

ଏଠାରେ ଉଲ୍ଲେଖ ଯୋଗ୍ୟ, ସଂସଦର ଉଭୟ ସଦନରେ ୧୨- ୧୨ ଘଣ୍ଟାରୁ ଅଧିକ ସମୟ ଧରି ମାରାଥନ୍ ବିତର୍କ ପରେ ୱକଫ୍ ସଂଶୋଧନ ବିଲ୍ ପାରିତ ହୋଇଛି । ରାଜ୍ୟସଭାରେ ବିଲ୍ ସପକ୍ଷରେ ୧୨୮ଟି ଭୋଟ୍ ପଡ଼ିଥିବାବେଳେ ବିପକ୍ଷରେ ୯୫ଟି ଭୋଟ୍ ପଡ଼ିଥିଲା ।