ବେଙ୍ଗାଲୁରୁ: ଆଇପିଏଲର ୧୩ତମ ମ୍ୟାଚରେ ଗୁଜରାଟ ଟାଇଟନ୍ସ ଦମଦାର ପ୍ରଦର୍ଶନ କରି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ୮ ୱିକେଟରେ ହରାଇଛି । ବୋଲିଂରେ ମହମ୍ମଦ ସିରାଜ ଓ ବ୍ୟାଟିଂରେ ଜୋସ ବଟଲର ଚମତ୍କାର ପ୍ରଦର୍ଶନ କରି ଦଳକୁ ବିଜୟୀ କରାଇଛନ୍ତି । ବଡ କଥା ବେଙ୍ଗାଲୁରୁକୁ ତାରି ମାଟିରେ ହରାଇଛି ଗୁଜରାଟ । ଏହି ବିଜୟ ସହ ଗୁଜରାଟ ନିଜର ତୃତୀୟ ମ୍ୟାଚରେ ଦ୍ୱିତୀୟ ବିଜୟ ହାସଲ କରିଥିବା ବେଳେ ବେଙ୍ଗାଲୁରୁ ଚଳିତ ସିଜିନରେ ପ୍ରଥମ ପରାଜୟ ଭୋଗିଛି । ଏହି ମ୍ୟାଚର ଫଳାଫଳ ପରେ ବେଙ୍ଗାଲୁରୁ ଶୀର୍ଷରୁ ତୃତୀୟ ସ୍ଥାନକୁ ଖସିଥିବା ବେଳେ ଗୁଜରାଟ ଟାଇଟନ୍ସ ଚତୁର୍ଥରେ ରହିଛି ।

ପ୍ରଥମେ ବ୍ୟାଟିଂ କରିଥିବା ଆରସିବି ନିର୍ଦ୍ଧାରିତ ଓଭରରେ ୮ ୱିକେଟ୍ ହରାଇ ୧୬୯ ରନ କରିଥିଲା । ଦଳ ପକ୍ଷରୁ ଲିୟାମ ଲିଭିଙ୍ଗଷ୍ଟୋନ ସର୍ବାଧିକ ୫୪ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ । ତାଙ୍କ ବ୍ୟତୀତ ଜିତେଶ ଶର୍ମା ୩୩ ରନ ଓ ଟିମ୍ ଡେଭିଡ ୩୨ ରନ କରିଥିଲେ । ବିରାଟ କୋହଲି ୭ ରନ କରି ନିରାଶ କରିଥିଲେ । ଫିଲ ସଲ୍ଟ ୧୪ ରନ ଓ ଅଧିନାୟକ ରଜତ ପାଟିଦାର ୧୨ ରନ କରିଥିଲେ । ବୋଲିଂରେ ଗୁଜରାଟ ପକ୍ଷରୁ ମହମ୍ମଦ ସିରାଜ ୪ ଓଭରରେ ୧୯ ରନ ଦେଇ ୩ଟି ୱିକେଟ୍ ନେଇଥିଲେ ।  ସାଇ କିଶୋରଙ୍କୁ ୨ଟି ସଫଳତା ମିଳିଥିବା ବେଳେ ଅର୍ଶଦ ଖାନ, ପ୍ରସିଦ୍ଧ କୃଷ୍ଣ ଓ ଇଶାନ୍ତ ଶର୍ମା ପ୍ରତ୍ୟେକଙ୍କୁ ଗୋଟିଏ ଲେଖାଏ ସଫଳତା ମିଳିଛି । 

ଜବାବରେ ଗୁଜରାଟର ବ୍ୟାଟର ଦମଦାର ବ୍ୟାଟିଂ କରି ୧୭.୫ ଓଭରରେ ମାତ୍ର ୨ ୱିକେଟ୍ ହରାଇ ମ୍ୟାଚ୍ ଜିତି ନେଇଛି । ଓପନର ସାଇ ସୁଦର୍ଶନ ପୁଣି ଥରେ ଚିତ୍ତାକର୍ଷକ ବ୍ୟାଟିଂ କରି ୪୯ ରନ କରିଥିଲେ । ଗିଲ୍ ୧୪ ରନ କରି ଆଉଟ୍ ହୋଇଥିଲେ । ଜୋସ ବଟଲର ବିସ୍ଫୋରକ ବ୍ୟାଟିଂ କରି ୩୯ ବଲରୁ ୫ ଚୌକା ଓ ୬ ଛକା ସହ ୭୩ ରନ କରି ଅପରାଜିତ ଥିଲେ । ଶେରଫେନ ରଦରଫର୍ଡ ୩୦ ରନ କରି କ୍ରିଜରେ ଥିଲେ ।