କର୍ଣ୍ଣାଟକରେ ବନ୍ଦ ହେବ ବାଇକ୍ ଟ୍ୟାକ୍ସି ଓଲା, ଉବେରୋ, ଓ ରାପିଡୋ। ଏନେଇ ବୁଧବାର କର୍ଣ୍ଣାଟକ ହାଇକୋର୍ଟ ଆପ୍ ଆଧାରିତ ରାଇଡ୍ ସେବାକୁ ବନ୍ଦ କରିବାକୁ ନିର୍ଦ୍ଦେଶ ଦେଇଛି। ଏହି ସମୟରେ, ବାଇକ୍ ଟ୍ୟାକ୍ସି ଚଳାଚଳ ବନ୍ଦ କରିବାକୁ ଛଅ ସପ୍ତାହ ସମୟ ଦେଇଛି କର୍ଣ୍ଣାଟକ ହାଇକୋର୍ଟ। 

ଜୁଲାଇ ୨୦୨୧ରେ, କର୍ଣ୍ଣାଟକ ସରକାର ବାଇକ୍ ଟ୍ୟାକ୍ସି ସେବା ଉପରେ ପ୍ରତିବନ୍ଧକ ଲଗାଇବା ପାଇଁ ଏକ ଆଦେଶ ଜାରି କରିଥିଲେ । ଏହା ବିରୁଦ୍ଧରେ ରାପିଡୋ, ଉବର ଏବଂ ଓଲା ହାଇକୋର୍ଟରେ ଏକ ଆବେଦନ ଦାଖଲ କରିଥିଲେ । ଶୁଣାଣି ସମୟରେ, ହାଇକୋର୍ଟ ଏହି ପ୍ଲାଟଫର୍ମଗୁଡ଼ିକ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାରୁ ସରକାରଙ୍କୁ ସାମୟିକ ଭାବରେ ବାରଣ କରିଥିଲେ । ଜଷ୍ଟିସ୍ ଶ୍ୟାମ ପ୍ରସାଦ ବୁଧବାର ପ୍ଲାଟଫର୍ମଗୁଡ଼ିକୁ ଛଅ ସପ୍ତାହ ମଧ୍ୟରେ ସେମାନଙ୍କର କାର୍ଯ୍ୟ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି । ଏହା ବ୍ୟତୀତ, ଏହି ସମୟ ସୀମା ପରେ ସମସ୍ତ ବାଇକ୍ ଟ୍ୟାକ୍ସି ସେବାକୁ ସମ୍ପୂର୍ଣ୍ଣ ବନ୍ଦ କରିବାକୁ ସେ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ସେପଟେ କର୍ଣ୍ଣାଟକ ହାଇକୋର୍ଟର ନିଷ୍ପତ୍ତିକୁ ସ୍ୱାଗତ କରି ପରିବହନ ମନ୍ତ୍ରୀ କହିଛନ୍ତି, ଆପ୍-ଆଧାରିତ ପ୍ଲାଟଫର୍ମଗୁଡ଼ିକ କୌଣସି ନିୟମ ବିନା କାର୍ଯ୍ୟ କରୁଛି, ଯାହା ଏହି ସେବା ବ୍ୟବହାର କରୁଥିବା ଲୋକଙ୍କ ସୁରକ୍ଷା ପ୍ରତି ଚିନ୍ତା ସୃଷ୍ଟି କରୁଛି ।

ବୁଧବାର ରାୟ ଶୁଣାଇବା ସମୟରେ ଜଷ୍ଟିସ୍ ବିଏମ୍ ଶ୍ୟାମ ପ୍ରସାଦ କହିଛନ୍ତି ଯେ ରାଜ୍ୟ ସରକାର ମୋଟର ଯାନ ଆଇନ, ୧୯୮୮ର ଧାରା ୯୩ ଅନୁଯାୟୀ ନିୟମ ନ କରିବା ପର୍ଯ୍ୟନ୍ତ  ବାଇକ୍ ଟ୍ୟାକ୍ସି ଚାଲିପାରିବ ନାହିଁ । ରାପିଡୋ, ଉବର ଇଣ୍ଡିଆ ଏବଂ ଓଲା ଦ୍ୱାରା ଦାୟର କରାଯାଇଥିବା ଆବେଦନ ଉପରେ ଏହି ନିର୍ଦ୍ଦେଶ ଦିଆଯାଇଛି, ଯେଉଁଥିରେ ସରକାରଙ୍କୁ ଏଗ୍ରିଗେଟର ଲାଇସେନ୍ସ ଜାରି କରିବାକୁ ଏବଂ ବାଇକ୍ ଟ୍ୟାକ୍ସିକୁ ପରିବହନ ସେବା ଭାବରେ ପଞ୍ଜୀକୃତ କରିବାକୁ ଦାବି କରାଯାଇଥିଲା ।