ଲଖନଉ: ମୁମ୍ବାଇ ଇଣ୍ଡିଆନ୍ସ ବନାମ ଲଖନଉ ସୁପର ଜାଏଣ୍ଟସ ମଧ୍ୟରେ ଖେଳା ଯାଇଥିବା ମ୍ୟାଚରେ ତିଳକ ବର୍ମା ରିଟାୟର୍ଡ ହାଉଟ୍ ହେବା ଚର୍ଚ୍ଚାର ବିଷୟ ପାଲଟିଛି । ଏମିତି ନିଷ୍ପତ୍ତି ସେହସ ସମୟରେ ନିଆଯାଇଛି ଯେତେବେଳେ ତିଳକ ବର୍ମା ବ୍ୟାଟିଂରେ ସଂଘର୍ଷ କରୁଥିଲେ । ଶେଷ ଓଭର ଗୁଡିକରେ ମୁମ୍ବାଇକୁ ବିସ୍ଫୋରକ ବ୍ୟାଟିଂର ଆବଶ୍ୟକତା ଥିବା ବେଳେ ତିଳକ ବର୍ମା ଏଥିରେ ବିଫଳ ହୋଇଥିଲେ । ଆଉ ୨୩ ବଲରୁ ସେ ୨୫ ରନ କରିଥିଲେ । ମ୍ୟାଚକୁ ଲଖନଉ ୧୨ ରନରେ ଜିତି ନେଇଛି । ତେବେ ପ୍ରଶ୍ନ ଉଠୁଛି ଯେ, ତିଳକଙ୍କ ରିଟାୟର୍ଡ ଆଉଟ୍ ହେବା ନିଷ୍ପତ୍ତି କାହାର ଥିଲା । ମ୍ୟାଚ୍ ପରେ ଜଣା ପଡିଛି ଯେ ଏହି ନିଷ୍ପତ୍ତି ହାର୍ଦ୍ଦିକ ପାଣ୍ଡ୍ୟାଙ୍କର ନ ଥିଲା । 

୨୦୪ ରନର ବିଜୟ ଲକ୍ଷ୍ୟ ପିଛା କରିଥିବା ମୁମ୍ବାଇ ଇଣ୍ଡିଆନ୍ସର ଆରମ୍ଭ ବହୁତ ନୈରାଶ୍ୟଜନକ ଥିଲା । ରୋହିତଙ୍କ ଅନୁପସ୍ଥିତିରେ ୱିଲ ଜ୍ୟାକ୍ସ(୫) ଓ ରିୟାନ ରିକଲଟର(୧୦) ଇନିଂସ ଆରମ୍ଭ କରିଥିଲେ ହେଁ ୧୭ ରନ ସ୍କୋରରେ ଉଭୟ ଆଉଟ୍ ହୋଇଥିଲେ । ଏହା ପରେ ନମନ ଧୀର ୨୪ ବଲରୁ ୪୬ ରନ ବିସ୍ଫୋରକ ଇନିଂସ ଖେଳିଥିଲେ । ସୂର୍ଯ୍ୟକୁମାରଙ୍କ ସହ ତୃତୀୟ ୱିକେଟରେ ୬୯ ରନ ଯୋଡିଥିଲେ । 

ସୂର୍ଯ୍ୟକୁମାର ଯାଦବ ୪୩ ବଲରୁ ୧ ଛକା ଓ ୯ ଚୌକା ସହ ୬୭ ରନ କରିଥିଲେ । ସେ ତିଳକ ବର୍ମାଙ୍କ ୬୬ ରନ ଯୋଡିଥିଲେ । ହେଲେ ତିଳକ ବର୍ମା ବଡ ସଟ୍ ଖେଳିବାରେ ବିଫଳ ହୋଇଥିଲେ । ଦଳକୁ ୨୪ ବଲରୁ ୫୨ ରନ ଦରକାର ଥିବା ବେଳେ ସୂର୍ଯ୍ୟ ୧୭ତମ ଓଭରର ପ୍ରଥମ ବଲରେ ଆଉଟ୍ ହୋଇଥିଲେ । ଏହା ପରେ ହାର୍ଦ୍ଦିକ ପାଣ୍ଡୟା କ୍ରିଜକୁ ଆସିଥିଲେ । ତିଳକ ବର୍ମା ସେଟ୍ ହୋଇଥିଲେ ସୁ୍‌ଦ୍ଧା ବଡ୍ ସଟ୍ ଖେଳି ପାରୁ ନ ଥିଲେ । ଶେଷରେ ୧୯ତମ ଓଭରର ପଞ୍ଚମ ବଲରେ ତିଳକ ରିଟାୟର୍ଡ ହଟ୍ ହୋଇଥିଲେ ।

କାହାର ଥିଲା ଏହି ନିଷ୍ପତ୍ତି

ମୁୁମ୍ବାଇ ଇଣ୍ଡିଆନ୍ସର ହେଡ୍ କୋଚ୍ ମୋହେଲେ ଜୟବର୍ଦ୍ଧନେ ମ୍ୟାଚ୍ ପରେ ସ୍ୱୀକାର କରିଛନ୍ତି ଯେ, ତିଳକ ବର୍ମାଙ୍କୁ ରିଟାୟର୍ଡ ହଟ୍ କରିବାର ନିଷ୍ପତ୍ତି ଆଉ କାହାର ନ ଥିଲା ବରଂ ତାଙ୍କର ହିଁ ଥିଲା । ଯେତେବେଳେ ତିଳକ ପାଭିଲିୟନ ଫେରିଲେ ସେତେବେଳେ ମୁମ୍ବାଇକୁ ବିଜୟ ପାଇଁ ୭ ବଲରୁ ୨୪ ରନ ଦରକାର ଥିଲା । 

ଜୟବର୍ଦ୍ଧନେ କହିଛନ୍ତି, ତିଳକଙ୍କୁ ଦ୍ରୁତ ରନ କରିବାର ଥିଲା । କିନ୍ତୁ ସେ ବିଫଳ ହୋଇଥିଲେ । ଆମେ ଶେଷ ଓଭର ପର୍ଯ୍ୟନ୍ତ ଅପେକ୍ଷା କଲୁ । ପଡିଆରେ ବି ଆଲୋଚନା କଲୁ । ତାଙ୍କୁ ବଡ ସଟ୍ ଖେଳିବାର ଥିଲା । ମୋତେ ଲାଗିଲା ଶେଷ ଆଡକୁ ନୂଆ ବ୍ୟାଟର ଆସିବା ଉଚିତ୍ ହେବ । କାରଣ ତିଳକ ସଂଘର୍ଷ କରୁଥିଲେ ।