ଚଣ୍ଡିଗଡ: ପଞ୍ଜାବ କିଙ୍ଗସର ବିଜୟ ରଥ ରୋକିଲା ରାଜସ୍ଥାନ ରୟାଲ୍ସ । ଆଇପିଏଲ୍ ୨୦୨୫ର ୧୮ତମ ମ୍ୟାଚରେ ରାଜସ୍ଥାନ ୫୦ ରନରେ ପଞ୍ଜାବକୁ ହରାଇ ନିଜର ଚତୁର୍ଥ ମ୍ୟାଚରୁ କ୍ରମାଗତ ଦ୍ୱିତୀୟ ବିଜୟ ହାସଲ କରିଛି । ଏହି ବିଜୟ ସହ ରାଜସ୍ଥାନ ନିଜର ପଏଣ୍ଟ ଟେବୁଲରେ ସୁଧାର କରି ସପ୍ତମ ସ୍ଥାନକୁ ଉଠିଥିବା ବେଳେ ପଞ୍ଜାବ କିଙ୍ଗସ ଚଳିତ ସିଜିନରେ ପ୍ରଥମ ପରାଜୟ ସହ ଦ୍ୱିତୀୟ ସ୍ଥାନରେ ରହିଛି । ରାଜସ୍ଥାନ ରୟାଲ୍ସ ବିଜୟରେ ଯଶସ୍ୱୀ ଜୟସ୍ୱାଲ ଓ ଜୋଫ୍ରା ଆର୍ଚର ହିରୋ ସାଜିଛନ୍ତି ।

ଟସ୍ ହାରି ପ୍ରଥମେ ବ୍ୟାଟିଂ କରିଥିବା ରାଜସ୍ଥାନ ରୟାଲ୍ସକୁ ଦୁଇ ଓପନର ଯଶସ୍ୱୀ ଜୟସ୍ୱାଲ ଓ ସଞ୍ଜୁ ସାମସନ ଦମଦାର ଆରମ୍ଭ ଦେଇଥିଲେ । ଦୁହେଁ ପ୍ରଥମ ୱିକେଟ୍ ଭାଗିଦାରୀରେ ୮୯ ରନ ଯୋଡିଥିଲେ । ସଞ୍ଜୁ ସାମସନ ୩୮ ରନ କରି ଆଉଟ୍ ହୋଇଥିଲେ । ନୀତିଶ ରାଣା ୧୨ ରନ କରିଥିଲେ । ମଧ୍ୟକ୍ରମରେ ହେଟ୍ ମାୟର ୧୨ ରନ କରି ପାଭିଲିୟନ ଫେରିଥିଲେ । ଦମଦାର ବ୍ୟାଟିଂ କରି ଜୟସ୍ୱାଲ ଚଳିତ ସିଜିନରେ ପ୍ରଥମ ଅର୍ଦ୍ଧଶତକ ହାସଲ କରିବା ସହ ୪୫ ବଲରୁ ୩ ଚୌକା ଓ ୫ ଛକା ସହ ୬୭ ରନ କରି ପାଭିଲିୟନ ଫେରିଥିଲେ । ତେବେ ରିୟାନ ପରାଗ ୨୫ ବଲରୁ ୪୩ ରନର ଇନିଂସ ଖେଳିବାରୁ ଦଳ ୪ ୱିକେଟ୍ ହରାଇ ବିଶାଳ ୨୦୫ ରନ କରିଥିଲା । 

ଜବାବରେ ପଞ୍ଜାବ କିଙ୍ଗସର ଆରମ୍ଭ ଖରାପ ଥିଲା । ପ୍ରଥମ ଓଭରରେ ହିଁ ଜୋଫ୍ରା ଆର୍ଚର ପ୍ରିୟାଂଶ ଆର୍ଯ୍ୟ ଓ ଅଧିନାୟକ ଶ୍ରେୟସ ଅ ।ୟର(୧୦ ରନ)ଙ୍କୁ ଆଉଟ୍ କରି ପଞ୍ଜାବକୁ ଡବଲ ଝଟକା ଦେଇଥିଲେ । ଏହା ପରେ ଦଳ ନିୟମିତ ବ୍ୟବଧାନରେ ୱିକେଟ୍  ହରାଇ ଚାଲିଥିଲା । କେବଳ ମଧ୍ୟକ୍ରମରେ ନେହଲ ବଢେରା ଦମଦାର ୬୨ ରନର ଇନିଂସ ଖେଳିଥିଲେ । ଗ୍ଲେନ ମ୍ୟାକ୍ସୱେଲ ୩୦ ରନ କରିଥିଲେ । ଶେଷ ପଞ୍ଜାବ ୯ ୱିକେଟ୍  ବିନିମୟରେ ୧୫୫ ରନ କରିବାକୁ ସକ୍ଷମ ହୋଇଥିଲା । ରାଜସ୍ଥାନ ପକ୍ଷରୁ ଜୋଫ୍ରା ଆର୍ଚର ୨୫ ରନ ଦେଇ ୩ ୱିକେଟ୍  ନେଇ ମ୍ୟାନ୍ ଅଫ ଦ ମ୍ୟାଚ ବିବେଚିତ ହୋଇଥିଲେ ।