ନୂଆଦିଲ୍ଲୀ: ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ଇତିହାସର ସବୁଠୁ ମହଙ୍ଗା ଖେଳାଳି ହେଉଛନ୍ତି ଋଷଭ ପନ୍ତ । ଏହି ବାମହାତୀ ୱିକେଟ୍ କିପର ବ୍ୟାଟରଙ୍କୁ ଗତ ବର୍ଷ ନିଲାମରେ ଲଖଉନ ସୁପର ଜାଏଣ୍ଟସ ୨୭ କୋଟି ଟଙ୍କାରେ କିଣିଥିଲା । ହେଲେ ପନ୍ତ ଚଳିତ ସଂସ୍କରଣରେ ଯେଉଁଭଳି ପ୍ରଦର୍ଶନ କରୁଛନ୍ତି ଏହାକୁ ନେଇ ତାଙ୍କୁ ଟ୍ରୋଲର ଶିକାର ହେବାକୁ ପଡୁଛି । ଏ ପର୍ଯ୍ୟନ୍ତ ଏଲଏସଜି ଖେଳିଥିବା ୪ଟି ମ୍ୟାଚରେ ପନ୍ତଙ୍କ ବ୍ୟାଟରୁ ମାତ୍ର ୧୯ ରନ ବାହାରିଛି । ନା ଅଧିନାୟକତ୍ୱ ଢଙ୍ଗରେ କରି ପାରୁଛନ୍ତି ନା ତାଙ୍କ ବ୍ୟାଟରୁ ରନ ଆସୁଛି । ଗତକାଲି ମୁମ୍ବାଇ ଇଣ୍ଡିଆନ୍ସ ମ୍ୟାଚରେ ପନ୍ତ ୨ ରନ କରି ଆଉଟ୍ ହୋଇଥିଲେ । ଆଉ ଏହା ଉପରେ ସଞ୍ଜୀବ ଗୋଏଙ୍କାଙ୍କ ରିଆକ୍ସନ ଭାଇରାଲ୍ ହେବାରେ ଲାଗିଛି ।
ପନ୍ତଙ୍କୁ ଏଲଏସଜି ୨୭ କୋଟିରେ ନିଜ ଦଳରେ ରଖିଛି । ଆଉ ସିଜିନରେ ୧୪ଟି ମ୍ୟାଚ୍ ଖେଳାଯିବ । ଏହାକୁ ହିସାବ କଲେ ପନ୍ତଙ୍କୁ ପ୍ରତି ମ୍ୟାଚ୍ ପିଛା ଖେଳିବା ପାଇଁ ୧.୯୨ କୋଟି ଟଙ୍କା ମିଳୁଛି । ଏହି ହିସାବରେ ପନ୍ତ ଚଳିତ ଆଇପିଏଲରେ ୪ଟି ମ୍ୟାଚରେ ୭.୬୮ କୋଟି ଟଙ୍କା ଆୟ କରି ସାରିଛନ୍ତି ।
ଗୋଟିଏ ପଟେ ନିକୋଲାସ ପୂରନ, ମିଚେଲ୍ ମାର୍ଶ ଓ ଆଡନ ମାରକ୍ରମ ଲଖଉନର ବ୍ୟାଟିଂ ଭାର ସମ୍ଭାଳୁଥିବା ବେଳେ ଅନ୍ୟପଟେ ପନ୍ତ ଫ୍ଲପ୍ ପରେ ଫ୍ଲପ୍ ହୋଇ ଚାଲିଛନ୍ତି । ଯେବେ ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚରେ ପନ୍ତ ୬ ବଲରୁ ୨ ରନ କରି ଆଉଟ୍ ହେଲେ ସେହି ସମୟରେ ସଞ୍ଜୀବ ଗୋଏଙ୍କାଙ୍କ ଚେହେରାରେ ସ୍ମିତହାସ୍ୟ ଦେଖିବାକୁ ମିଳିଥିଲା ।
ଲୋକେ ସୋସିଆଲ ମିଡିଆରେ ଋଷଭ ପନ୍ତଙ୍କୁ ଜୋରଦାର ଟ୍ରୋଲ କରିବାରେ ଲାଗିଛନ୍ତି । ପନ୍ତଙ୍କୁ ଲୋକେ ଫ୍ରଡ କହିବା ସହ ଲଖନଉର ସେ ଚୂନା ଲଗାଉଥିବା ଲୋକେ କହୁଛନ୍ତି । ଏଥିସହ ଗତ ବର୍ଷ କେଏଲ ରାହୁଲଙ୍କୁ ସଞ୍ଜୀବ ଗୋଏଙ୍କା ତାଗିଦ କରୁଥିବାର ଚିତ୍ର ଭାଇରାଲ୍ ହେବାରେ ଲାଗିଛି ।