ଭୁବନେଶ୍ୱର: ଓଡ଼ିଶାର ୧ କୋଟି ପରିବାର ପ୍ରତି ସଦସ୍ୟଙ୍କୁ ଭାରତ ସରକାରଙ୍କର ଆୟୁଷ୍ମାନ କାର୍ଡ ପ୍ରଦାନ କରାଯିବ । ପ୍ରାୟ ସାଢ଼େ ୩ କୋଟି ଲୋକଙ୍କୁ ଆୟୁଷ୍ମାନ କାର୍ଡ ଦିଆଯିବ । ଏ ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ମୁକେଶ ମହାଲିଙ୍ଗ । 

ଶନିବାର ଆୟୋଜିତ ସାମ୍ବାଦିକ ସମ୍ମିଳନୀରେ ମନ୍ତ୍ରୀ ସୂଚନା ଦେଇଛନ୍ତି ଯେ, ଆସନ୍ତା ଏପ୍ରିଲ ୧୧ ତାରିଖରେ କଟକର ବାଲିଯାତ୍ରା ପଡ଼ିଆରେ ‘ଆୟୁଷ୍ମାନ’ ଯୋଜନାର ଶୁଭାରମ୍ଭ ହେବ । କେନ୍ଦ୍ର ସ୍ଵାସ୍ଥ୍ୟ ମନ୍ତ୍ରୀ ଜଗତ ପ୍ରକାଶ ନଡ୍ଡା ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଜନାର ଶୁଭାରମ୍ଭ କରିବେ । ଏଥିରେ ୩ ଜଣ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଜୁଏଲ ଓରାମ ଓ ଅଶ୍ୱିନୀ ବୈଷ୍ଣବ , ଦୁଇ ଉପ ମୁଖ୍ୟମନ୍ତ୍ରୀ, କଟକ ଜିଲ୍ଲାର ସାଂସଦ ଏବଂ ବିଧାୟକମାନେ ପ୍ରମୁଖ ଯୋଗ ଦେବେ । ରାଜ୍ୟର ୧ କୋଟି ୩ ଲକ୍ଷ ପରିବାରକୁ ଯୋଜନାରେ ଅନ୍ତର୍ଭୁକ୍ତ କରାଯିବ । ପ୍ରତି ପରିବାର ପ୍ରତି ସଦସ୍ୟ ଅର୍ଥାତ୍ ରାଜ୍ୟର ୩.୫ କୋଟି ଲୋକଙ୍କୁ ମିଳିବ ଆୟୁଷ୍ମାନ କାର୍ଡ ପ୍ରଦାନ କରାଯିବ । ପୂର୍ବ ସ୍ୱାସ୍ଥ୍ୟ କାର୍ଡ଼ରେ କେବଳ ୯୦୦ଟି ମେଡ଼ିକାଲରେ ଚିକିତ୍ସା ସୁବିଧା ମିଳୁ ପାରୁଥିବାବେଳେ ଏହା ଫଳରେ ଦେଶର ୨୯ ହଜାରରୁ ଅଧିକ ମେଡ଼ିକାଲରେ ଚିକିତ୍ସା ସୁବିଧା ମିଳିବ । ଏହି କାର୍ଡ ହିତାଧିକାରୀଙ୍କୁ ୫ ଲକ୍ଷ ଟଙ୍କା ପର‌୍ୟ୍ୟନ୍ତ ମାଗଣା ଚିକିତ୍ସା କରିବାର ସୁଯୋଗ ପାଇପାରିବେ ।

୭୦ ବର୍ଷରୁ ଉର୍ଦ୍ଧ୍ୱ ବ୍ୟକ୍ତିଙ୍କ ପାଇଁ ‘ବାୟ ବନ୍ଦନ’ କାର୍ଡ

ସେହିପରି ୭୦ ବର୍ଷରୁ ଉର୍ଦ୍ଧ୍ୱ ବୃଦ୍ଧ ଓ ବୃଦ୍ଧାଙ୍କ ପାଇଁ ସ୍ୱତନ୍ତ୍ର ଭାବେ ଭାରତ ସରକାରଙ୍କ ‘ବାୟ ବନ୍ଦନ’ କାର୍ଡ ପ୍ରଦାନ କରାଯିବ । ଏହାକୁ ଅନଲାଇନରେ ଡାଉନଲୋଡ୍ କରିହେବ । ଏଥିରେ ଆଶାକର୍ମୀମାନେ ସାହାଯ୍ୟ କରିବେ । ଏଥିରେ ସବୁ ବର୍ଗର ବୟସ୍କ ବ୍ୟକ୍ତି ସାମିଲ ହୋଇପାରିବେ । ଏଥିରେ କାହାକୁ ବାଦ କରାଯିବା ନାହିଁ । ପେନସନ୍ ଭୋଗୀ, ସମ୍ଭ୍ରାନ୍ତ ଶ୍ରେଣୀ, ଟିକସ ଦାତା ଭଳି ବ୍ୟକ୍ତି ମଧ୍ୟ ସାମିଲ ହୋଇପାରିବେ । ଯାହାକି ଅତ୍ୟନ୍ତ ଲାଭ ଦାୟକ ହେବ ବୋଲି ଆଶାବ୍ୟକ୍ତ କରିଛନ୍ତି ମନ୍ତ୍ରୀ ଶ୍ରୀଯୁକ୍ତ ମହାଲିଙ୍ଗ । 

ମନ୍ତ୍ରୀ କହିଛନ୍ତି, ଗୋପବନ୍ଧୁ ଆରୋଗ୍ୟ ଯୋଜନା ଏବଂ ଆୟୁଷ୍ମାନ ଭାରତ ଯୋଜନାରେ ରାଜ୍ୟକୁ ଅଧିକ କେନ୍ଦ୍ରୀୟ ଆର୍ଥିକ ସହାୟତା ମିଳିବ । କେବଳ ପଶ୍ଚିମବଙ୍ଗ ରାଜ୍ୟକୁ ବାଦ ଦେଲେ ସମ୍ପୂର୍ଣ୍ଣ ଭାରତ ବର୍ଷରେ ଏହି କାର୍ଡର ବ୍ୟବହାର ହୋଇପାରିବ । ଯେଉଁ ରାଜ୍ୟ ନିଜର ଏବଂ କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଓ ପରିବାର ବିଭାଗ ସହିତ ଅନୁବନ୍ଧିତ ହୋଇଥିବେ ସେଠି ଆୟୁଷ୍ମାନ କାର୍ଡ ବ୍ୟବହାର କରିହେବ । ଯେଉଁମାନଙ୍କ ପାଖରେ ପୁରୁଣା ସରକାରୀ ସ୍ୱାସ୍ଥ୍ୟ କାର୍ଡ ରହିଛି ସେମାନଙ୍କୁ ମଧ୍ୟ ଏଥିରେ ସାମିଲ କରାଯାଇଛି । 

ଗଡ଼ିବ ଗାଁ ଗାଁ ବୁଲିବ ସଚେତନତା ରଥ 

ଏହି ଯୋଜନାର ପ୍ରଚାର ପ୍ରସାର ପାଇଁ ୧୪୦୫ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ କାର୍ଡ ବଣ୍ଟନର ବ୍ୟବସ୍ଥା କରାଯାଇଛି । ପ୍ରାୟ ୧୫ ଲକ୍ଷ ଏଥିରେ ଯୋଡ଼ି ହେବ । ସଚେତନା କାର୍ଯ୍ୟକ୍ରମ ପାଇଁ ୧୧ ତାରିଖରୁ ୭ ଦିନ ପାଇଁ ପ୍ରତି ଗାଁରେ ସ୍ୱାସ୍ଥ୍ୟ ଚେତନା ରଥ ଗଡ଼ିବ ।