ଭୁବନେଶ୍ୱର: ପବିତ୍ର ଚୈତ୍ର ମାସ ଅଶୋକାଷ୍ଟମୀରେ ପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରା ଆରମ୍ଭ ହୋଇଛି । ନିର୍ଦ୍ଧାରିତ ସମୟଠାରୁ ପାଖାପାଖି ୨ ଘଣ୍ଟା ବିଳମ୍ବରେ ରଥ ଟଣା ଆରମ୍ଭ ହୋଇଛି । ଲକ୍ଷାଧିକ ଶ୍ରଦ୍ଧାଳୁଙ୍କ ଗହଣରେ ରଥ ଆଗକୁ ବଢ଼ିଛି । ନାମ ସଙ୍କୀର୍ତ୍ତନର ତାଳେ ତାଳେ ଗଡ଼ି ଚାଲିଛି ରଥ । ଆଜି ରାତିରେ ତିନି ମୁଣ୍ଡିଆ ଛକ ପର୍ଯ୍ୟନ୍ତ ରଥକୁ ଟାଣି ଟାଣି ନିଆଯିବାକୁ ଧାର୍ଯ୍ୟ କରାଯାଇଛି । 

ଆଜି ସକାଳୁ ମହାପ୍ରଭୁଙ୍କ ସମସ୍ତ ନୀତିକାନ୍ତି ସୁରୁଖୁରେ ସମ୍ପର୍ଣ୍ଣ ହୋଇଥିଲା । ମାତ୍ର ମଧ୍ୟାହ୍ନ ପରେ କିଛି ସମୟ ପାଇଁ ସେବାୟତମାନଙ୍କ ମଧ୍ୟରେ ବିଶୃଙ୍ଖଳା ସୃଷ୍ଟି ହୋଇଥିଲା । ଏହା ପରେ ସମସ୍ତ ନୀତିକାନ୍ତି ସ୍ୱାଭାବିକ ହୋଇଥିଲା । ତେବେ ପ୍ରଭୁ ଶ୍ରୀଲିଙ୍ଗରାଜଙ୍କ ପହଣ୍ଡିରେ ସାମାନ୍ୟ ବିଳମ୍ବ ହୋଇଥିଲା । ପରବର୍ତ୍ତୀ ସମୟରେ ପହଣ୍ଡି ସମ୍ପାଦନ ହେବା ପରେ ଡାହୁକଙ୍କ ଡାକରାରେ ସନ୍ଧ୍ୟା୫ଟା ୨୧ରେ ରଥ ଗଡ଼ିଥିଲା । ପୂର୍ବରୁ ସାଢ଼େ ୩ଟା ରେ ରଥ ଟଣା ହେବାକୁ ସମୟ ଧାର୍ଯ୍ୟ ହୋଇଥିଲା । ତେବେ ଆଜି ତିନି ମୁଣ୍ଡିଆ ଛକ ପର୍ଯ୍ୟନ୍ତ ରଥ ଟଣାଯିବା । ଏହାପରେ ଆସନ୍ତାକାଲି ପୁନର୍ବାର ରଥ ଟଣା ହୋଇ ମାଉସୀ ମାଆ ମନ୍ଦିର ନିକଟକୁ ଯିବ । 

ରଥ ଯାତ୍ରାକୁ ଶାନ୍ତି ଶୃଙ୍ଖଳାର ସହିତ କରିବାକୁ କମିଶନରେଟ୍ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥାକୁ ଗ୍ରହଣ କରାଯାଇଛି । ପ୍ରାୟ  ୧୬ ପ୍ଲାର୍ଟୁନ୍ ଫୋର୍ସ ନିୟୋଜିତ ହୋଇଛନ୍ତି । ପୋଲିସ କମିଶନର ଓ ଭୁବନେଶ୍ୱର ଡିସିପି ସୁରକ୍ଷା ବ୍ୟବସ୍ଥା ତଦାରଖ କରୁଥିବାବେଳେ ବିଧାୟକ ବାବୁ ସିଂହ, ମେୟର ସୁଲୋଚନା ଦାସ ପ୍ରମୁଖ ଉପସ୍ଥିତ ରହିଛନ୍ତି ।