ନୂଆଦିଲ୍ଲୀ: ଜୁନ୍ ମାସ ଆରମ୍ଭରୁ ଭଲ ଖବର ଆସିଛି। ଦେଶର ତେଲ କଂପାନୀଗୁଡ଼ିକ ଏଲପିଜି ଗ୍ୟାସ୍ ଦର ହ୍ରାସ କରିଛନ୍ତି। ଓଏମ୍ସି ୧୯ କିଲୋ ଓଜନର ଏଲ୍ପିଜି ସିଲିଣ୍ଡର ଦାମ ୬୯ଟଙ୍କା ୫୦ ପଇସା ହ୍ରାସ କରିଛି। ନୂଆ ଦର ଆଜିଠାରୁ ଲାଗୁ ହୋଇଯାଇଛି। ମାତ୍ର ଘରୋଇ ସିଲିଣ୍ଡରର ଦରରେ କୌଣସି ପରିବର୍ତ୍ତନ ଦେଖାଯାଇନାହିଁ।
ଏୟାରଲାଇନ୍ସ କଂପାନୀକୁ ମଧ୍ୟ ଆଶ୍ୱସ୍ତି ମିଳିଛି। ଦେଶରେ ବିମାନ ଇନ୍ଧନ ହ୍ରାସ ପାଇଛି। ଫଳରେ ଏବେ ବିମାନ ଯାତ୍ରା ଶସ୍ତା ହୋଇପାରେ। ଓଏମ୍ସି ବିମାନ ଇନ୍ଧନ ଦର କମ୍ କରିଛି। ଏବେ କିଲୋ ଲିଟର ୬୬୭୩ଟଙ୍କା ୮୭ ପଇସା କମ୍ ହୋଇଛି। ନୂଆ ଦର ଆଜିଠାରୁ ଲାଗୁ ହୋଇଛି। ବିମାନ ଇନ୍ଧନ ଗତମାସ କିଲୋଲିଟର ୭୪୯ ଟଙ୍କା ବୃଦ୍ଧି ପାଇଥିଲା।
ତୈଳ ମାର୍କେଟିଂ କମ୍ପାନୀଗୁଡିକ ଦେଶରେ ୧୯ କିଲୋଗ୍ରାମ କମର୍ସିଆଲ ଏଲପିଜି ସିଲିଣ୍ଡର ମୂଲ୍ୟରେ ହ୍ରାସ କରିଛନ୍ତି । ଫଳରେ ଦିଲ୍ଲୀରେ ୬୯.୫୦ ଟଙ୍କା, କୋଲକାତାରେ ୭୨ ଟଙ୍କା, ମୁମ୍ବାଇରେ ୬୯.୫୦ ଟଙ୍କା ଏବଂ ଚେନ୍ନାଇରେ ୭୦.୫୦ ଟଙ୍କା ଶସ୍ତା ହୋଇଛି।
ଦାମ୍ କମିବା ପରେ ଆଜିଠାରୁ ଦିଲ୍ଲୀରେ ୧୯ କିଲୋଗ୍ରାମ ବ୍ୟବସାୟିକ ଏଲପିଜି ସିଲିଣ୍ଡରର ମୂଲ୍ୟ ୧୭୪୫.୫୦ ଟଙ୍କାରୁ ଏହା ୧,୬୭୬ ଟଙ୍କାରେ ପହଞ୍ଚିଛି । ସେହିପରି ସିଲିଣ୍ଡର ଦର କମିବା ପରେ କୋଲକାତାରେ ଏହା ଏବେ ୧୮୫୯ ଟଙ୍କା ବଦଳରେ ୧୭୮୭ ଟଙ୍କାରେ ମିଳିବ ।
ମୁମ୍ବାଇରେ ପୂର୍ବରୁ କମର୍ସିଆଲ ଏଲପିଜି ସିଲିଣ୍ଡର ୧୬୯୮.୫୦ ଟଙ୍କାରେ ବିକ୍ରି ହେଉଥିଲା, ଯାହା ବର୍ତ୍ତମାନ ୧୬୨୯ ଟଙ୍କାରେ ଉପଲବ୍ଧ ହେବ । ଚେନ୍ନାଇରେ ୧୯୧୧ ଟଙ୍କାରେ ବିକ୍ରି ହୋଇଥିବା ସିଲିଣ୍ଡରର ମୂଲ୍ୟ ୧୮୪୦.୫୦ ଟଙ୍କାକୁ ଖସି ଆସିଛି।