ବାଲେଶ୍ୱର: ଓଡ଼ିଶା ଭିଜିଲାନ୍ସ ପୁଣିଥରେ ଦୁର୍ନୀତି ବିରୋଧୀ ଅଭିଯାନକୁ ଜୋରଦାର କରିଛି। ଓଡ଼ିଶା ଲିଫ୍ଟ ଇରିଗେସନ କର୍ପୋରେସନ (OLIC)ର ଜୁନିୟର ଇଞ୍ଜିନିୟର ସୁବ୍ରତ ମହାନ୍ତିଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି (DA) ମାମଲା ରୁଜୁ କରି ତାଙ୍କୁ ଗିରଫ କରାଯାଇଛି।

ସୁବ୍ରତ ମହାନ୍ତି ପୂର୍ବରୁ ମୟୂରଭଞ୍ଜ ଜିଲ୍ଲାର ଉଦଳା ସବ୍-ଡିଭିଜନରେ କାର୍ଯ୍ୟରତ ଥିବାବେଳେ ବର୍ତ୍ତମାନ ବାଲେଶ୍ୱର OLIC ଡିଭିଜନରେ ନିଯୁକ୍ତ ଅଛନ୍ତି। ଭିଜିଲାନ୍ସ ତଦନ୍ତରେ ତାଙ୍କ ନାମରେ ଜଣାଶୁଣା ଆୟଠାରୁ ୧୨୩ ପ୍ରତିଶତ ଅଧିକ ସମ୍ପତ୍ତି ଥିବା ଅଭିଯୋଗ ସାମ୍ନାକୁ ଆସିଛି।

ଭିଜିଲାନ୍ସ ସୂଚନା ଅନୁଯାୟୀ, ସୁବ୍ରତ ମହାନ୍ତି ଓ ତାଙ୍କ ପତ୍ନୀଙ୍କ ବିରୋଧରେ ବାଲେଶ୍ୱର ଭିଜିଲାନ୍ସ ଥାନାରେ ଦୁର୍ନୀତି ନିବାରଣ (ସଂଶୋଧନ) ଆଇନ-୨୦୧୮ର ଧାରା ୧୩(୨), ୧୩(୧)(ବି) ଓ ୧୨ ଅନୁଯାୟୀ ମାମଲା ରୁଜୁ ହୋଇଛି। ସୋମବାର ତାଙ୍କୁ ଗିରଫ କରାଯାଇ ବାଲେଶ୍ୱର ସ୍ୱତନ୍ତ୍ର ଭିଜିଲାନ୍ସ ବିଚାରପତିଙ୍କ ଅଦାଲତକୁ ପଠାଯାଉଛି।

ଉଲ୍ଲେଖଯୋଗ୍ୟ, ଏହା ସୁବ୍ରତଙ୍କ ବିରୋଧରେ ପ୍ରଥମ ମାମଲା ନୁହେଁ। ଚଳିତ ବର୍ଷ ଜାନୁଆରୀ ୬ ତାରିଖରେ ସେ ଜଣେ ଠିକାଦାରଙ୍କଠାରୁ ୬୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଜାଲରେ ପଡ଼ିଥିଲେ। ଅଭିଯୋଗ ଥିଲା, କାମର ବକେୟା ବିଲ୍ ଛାଡ଼ କରିବା ପାଇଁ ସେ ଏହି ଟଙ୍କା ଦାବି କରିଥିଲେ।

ବର୍ତ୍ତମାନ ଆୟ ବହିର୍ଭୂତ ସମ୍ପତ୍ତି ମାମଲା ରୁଜୁ ହେବା ପରେ ଭିଜିଲାନ୍ସ ତାଙ୍କ ଚଳ ଓ ଅଚଳ ସମ୍ପତ୍ତି, ବ୍ୟାଙ୍କ ଜମା ଓ ଅନ୍ୟାନ୍ୟ ଆର୍ଥିକ କାରବାରର ଗଭୀର ତଦନ୍ତ ଜାରି ରଖିଛି।