ଭୁବନେଶ୍ୱର: ରାଜ୍ୟରେ ଝିଅମାନଙ୍କ ଭବିଷ୍ୟତ ସୁରକ୍ଷିତ କରିବା ଦିଗରେ ସରକାର ଆଣୁଛନ୍ତି ଏକ ନୂଆ ଏବଂ ଗୁରୁତ୍ୱପୂର୍ଣ୍ଣ ଯୋଜନା, ଯାହାର ନାଁ ହେଉଛି ‘କନ୍ୟା ସୁମଙ୍ଗଳ ଯୋଜନା’। ଏହା ସମ୍ପର୍କରେ ଆଜି ଉପ ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ସୂଚନା ଦେଇ କହିଛନ୍ତି ଯେ, ଏହି ଯୋଜନାର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜର (SOP) ଖୁବ୍‌ ଶୀଘ୍ର ଚୂଡାନ୍ତ ହେବ।

ଉପ ମୁଖ୍ୟମନ୍ତ୍ରୀଙ୍କ କହିବାନୁସାରେ, SOP ପ୍ରସ୍ତୁତ ହେବା ପରେ ଯୋଜନାର ପୂର୍ଣ୍ଣ ରୂପରେଖ ସାମ୍ନାକୁ ଆସିବ ଏବଂ ସେହି ଅନୁଯାୟୀ ଏହାକୁ କାର୍ଯ୍ୟକାରୀ କରାଯିବ। ଏହି ଯୋଜନାର ମୁଖ୍ୟ ଲକ୍ଷ୍ୟ ହେଉଛି ଝିଅ ଶିଶୁଙ୍କ ଜନ୍ମରୁ ଆରମ୍ଭ କରି ତାଙ୍କର ଶିକ୍ଷା ଓ ଭବିଷ୍ୟତ ପାଇଁ ଆର୍ଥିକ ସୁରକ୍ଷା ଯୋଗାଇବ।

ଯୋଜନା ଅନୁଯାୟୀ, ଝିଅ ଜନ୍ମ ହେବାର ଏକ ବର୍ଷ ମଧ୍ୟରେ ସରକାର ତାଙ୍କର ବ୍ୟାଙ୍କ ଖାତାକୁ ପ୍ରଥମ ଆର୍ଥିକ ସହାୟତା ପଠାଇବେ। ପରେ ବିଭିନ୍ନ ପର୍ଯ୍ୟାୟରେ ଏହି ସହାୟତା ଜାରି ରହିବ ଏବଂ ୨୧ ବର୍ଷ ବୟସ ହେବା ବେଳକୁ ସରକାର ତାଙ୍କ ଖାତାରେ ଲକ୍ଷାଧିକ ଟଙ୍କା ଜମା କରିଥିବେ।

ଏହି ଯୋଜନା ଦ୍ୱାରା ଝିଅମାନଙ୍କ ଶିକ୍ଷା, ସ୍ୱାସ୍ଥ୍ୟ ଓ ସ୍ୱାବଲମ୍ବନତାକୁ ବୃଦ୍ଧି ମିଳିବ ବୋଲି ଆଶା କରାଯାଉଛି। ଏଥିସହିତ ଏହା ଲୋକମାନଙ୍କ ମନୋଭାବରେ ପରିବର୍ତ୍ତନ ଆଣି ଝିଅ ଶିଶୁଙ୍କ ପ୍ରତି ସମ୍ମାନ ଓ ସୁରକ୍ଷା ବଢ଼ାଇବାରେ ମଧ୍ୟ ସହାୟକ ହେବ। ସରକାରଙ୍କ ଏହି ପଦକ୍ଷେପ ରାଜ୍ୟରେ ଝିଅମାନଙ୍କ ଭବିଷ୍ୟତକୁ ଆହୁରି ମଜବୁତ କରିବାରେ ଏକ ମାଇଲଷ୍ଟୋନ୍‌ ହେବ ବୋଲି ମନେ କରାଯାଉଛି।