ନୂଆଦିଲ୍ଲୀ: କାର୍ଗିଲ ଯୁଦ୍ଧରେ ପାକିସ୍ତାନକୁ ପରାସ୍ତ କରିବା ସହିତ ଯେଉଁମାନେ ସହିଦ ହୋଇଛନ୍ତି, ସେମାନଙ୍କ ଉଦ୍ଦେଶ୍ୟରେ ୨୦୦୦ ମସିହା ଜୁଲାଇ ୨୬ ତାରିଖ ଠାରୁ ପ୍ରତିବର୍ଷ ଜୁଲାଇ ୨୬ରେ କାର୍ଗିଲ ବିଜୟ ଦିବସ ପାଳନ କରାଯାଇଛି। ଦେଶବାସୀ ଏହି ଦିନକୁ ଯବାନଙ୍କ ସାହସ ଓ କର୍ତ୍ତବ୍ୟକୁ ସଲାମ କରିଥାନ୍ତି। ଅପରେଶନ ବିଜୟରେ ଭାରତୀୟ ସଶସ୍ତ୍ର ବଳ ଜମ୍ମୁ କଶ୍ମୀରର କାର୍ଗିଲ ଜିଲ୍ଲାରେ ନିଜର ଆଧିପତ୍ୟ ବିସ୍ତାର କରିଥିଲେ। ଆଜି କାର୍ଗିଲ ବିଜୟ ଦିବସ ଅବସରରେ ଦେଶବାସୀ ସହିଦ ଯବାନମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରୁଛନ୍ତି।
ଗୃହମନ୍ତ୍ରୀ ଅମିତ ଶାହ କାର୍ଗିଲ ବିଜୟ ଦିବସ ଅବସରରେ ଶ୍ରଦ୍ଧାଞ୍ଜଳି ଦେଇଛନ୍ତି। ସେ କହିଛନ୍ତି, କାର୍ଗିଲ ବିଜୟ ଦିବସ ସେନାର ବୀର ଯବାନଙ୍କ ଶୌର୍ଯ୍ୟର ଅତୁଟ ସଂକଳ୍ପର ପ୍ରତୀକ। କାର୍ଗିଲ ଯୁଦ୍ଧରେ ବୀର ଯବାନ ହିମାଳୟର ଦୁର୍ଗମ ପାହାଡ଼ରେ ପରାକ୍ରମର ପରାକାଷ୍ଠାର ପରିଚୟ ଦେଇ ଶତ୍ରୁଙ୍କୁ ବିନାଶ କରିଥିଲେ। କାର୍ଗିଲରେ ପୁଣି ଥରେ ଜାତୀୟ ପତାକା ଉଡାଇ ଦେଶକୁ ଗୌରବାନ୍ବିତ କରିଥିଲେ। ଆଜି କାର୍ଗିଲ ବିଜୟ ଦିବସରେ ଏହି ଯୁଦ୍ଧରେ ସାହସ ଜୁଟାଇ ମାତୃଭୂମିର ରକ୍ଷା କରୁଥିବା ଯବାନଙ୍କୁ ପ୍ରଣାମ ଜଣାଉଛି। ଆପଣଙ୍କ ତ୍ୟାଗ, ସମର୍ପଣ ଓ ବଳିଦାନକୁ କୃତଜ୍ଞ ରାଷ୍ଟ୍ର କେବେ ଭୁଲିପାରିବ ନାହିଁ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅବସରରେ କାର୍ଗିଲ ଗସ୍ତ କରିଥିବା ବେଳେ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ (ସିଡିଏସ୍) ଜେନେରାଳ ଅନିଲ ଚୌହାନ କାର୍ଗିଲ ବିଜୟ ଦିବସ ଅବସରରେ କହିଛନ୍ତି, ୧୯୯୯ର ଯୁଦ୍ଧରେ ସୈନିକମାନଙ୍କ ଦ୍ବାରା ଦିଆଯାଇଥିବା ବଳିଦାନ ବ୍ୟର୍ଥ ଯିବ ନାହିଁ। ପ୍ରତିରକ୍ଷା ମନ୍ତ୍ରାଳୟ ଏକ ବୟାନରେ କହିଛି ଯେ, ପ୍ରମୁଖ ପ୍ରତିରକ୍ଷା ଅଧ୍ୟକ୍ଷ କାର୍ଗିଲ ଯୁଦ୍ଧର ୨୫ବର୍ଷ ପୂର୍ତ୍ତି ଅବସରରେ ସଶସ୍ତ୍ର ବଳର ସମସ୍ତ କର୍ମୀଙ୍କୁ ଶୁଭେଚ୍ଛା।
ସେହିପରି ଭାରତୀୟ ସେନା ମୁଖ୍ୟ ଉପେନ୍ଦ୍ର ଦ୍ବିବେଦୀ, ବାୟୁସେନା ମୁଖ୍ୟ ବିଆର ଚୌଧୁରୀ, ନୌସେନା ମୁଖ୍ୟ ଆଡମିରାଲ ଦିନେଶ କୁମାର ତ୍ରିପାଠୀ ଦ୍ରାସସ୍ଥିତ କାର୍ଗିଲ ଯୁଦ୍ଧ ସ୍ମାରକୀରେ ଶ୍ରଦ୍ଧାଞ୍ଜଳି ଜଣାଇଉନ୍ତି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ରାଜସ୍ତାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମା, ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ସହିଦ ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି।