ନୂଆଦିଲ୍ଲୀ: ଦେଶର ଅଧିକାଂଶ ରାଜ୍ୟରେ ଏବେ ମୌସୁମୀ ବର୍ଷା ଲାଗି ରହିଛି। ରାଜସ୍ଥାନ, ଗୁଜରାଟ, ମହାରାଷ୍ଟ୍ର, ମଧ୍ୟପ୍ରଦେଶ, ଉତ୍ତରପ୍ରଦେଶ, ଉତ୍ତରାଖଣ୍ଡ, ବିହାରରେ ବର୍ଷା ହେଉଛି। ଗୁଜରାଟ, ମହାରାଷ୍ଟ୍ର ଓ ମଧ୍ୟପ୍ରଦେଶରେ ପ୍ରବଳ ବର୍ଷା ଜନଜୀବନ ଅସ୍ତବ୍ୟସ୍ତ କରୁଛି। ଏହି ତିନି ରାଜ୍ୟର ଅନେକ ସହରରେ ଜଳାର୍ଣ୍ଣବ ପରିସ୍ଥିତି ଦେଖାଯାଇଛି। ଗୁରୁବାର ଦିନସାରା ବର୍ଷା ଯୋଗୁଁ ତଳିଆ ଅଞ୍ଚଳରେ ନଦୀ ଓ ସମୁଦ୍ରର ଭ୍ରମ ସୃଷ୍ଟି ହୋଇଥିଲା। ସଡ଼କଗୁଡ଼ିକରେ ନଦୀ ଭଳି ଜଳ ପ୍ରବାହିତ ହେଉଥିଲା। ପୁଣେରେ ବର୍ଷା ଯୋଗୁଁ ସ୍କୁଲ-କଲେଜ ଛୁଟି ଘୋଷଣା କରାଯାଇଥିଲା।
ପୁଣେରେ ପ୍ରବଳ ବର୍ଷା କାରଣରୁ ସଡ଼କଭାସଲା ଜଳଭଣ୍ଡାରରୁ ୪୦ ହଜାର କ୍ୟୁସେକ ଜଳ ନିଷ୍କାସନ କରାଯାଇଥିଲା। ଜଳଭଣ୍ଡାରରୁ ପାଣି ଛାଡ଼ିବା ନେଇ ସ୍ଥାନୀୟ ଲୋକଙ୍କୁ ପୂର୍ବରୁ ସୂଚନା ମିଳି ନଥିଲା ବୋଲି ଅଭିଯୋଗ ହୋଇଛି। ଅଚାନକ ପାଣି ଛଡ଼ାଯିବା ଦ୍ବାରା ତଳିଆ ଅଞ୍ଚଳର ଲୋକେ ପ୍ରଭାବିତ ହୋଇଥିଲେ। ପରିସ୍ଥିତି ଖରାପ ହେବାରୁ ବିଦ୍ୟୁତ ସରବରାହ ଅସ୍ଥାୟୀ ଭାବେ ବନ୍ଦ କରିଦିଆଯାଇଥିଲା ପୁଣେରେ ବର୍ଷା ପରେ ଉପମୁଖ୍ୟମନ୍ତ୍ରୀ ଅଜିତ ପାୱାର ଲଗାତାର ବୈଠକ କରୁଛନ୍ତି।
ପୁଣେ ଭଳି ମୁମ୍ବାଇରେ ରାସ୍ତାଗୁଡ଼ିକ ଜଳାର୍ଣ୍ଣବ ଦେଖାଯାଇଛି। ମୁମ୍ବାଇରେ ଆଜି ମଧ୍ୟ ବର୍ଷା ନେଇ ଚେତାବନୀ ଜାରି କରାଯାଇଛି। ବର୍ଷା କାରଣରୁ ମୁମ୍ବାଇରୁ ପୁଣେ ମଧ୍ୟରେ ସଂଯୋଗ କରୁଥିବା ୩ ଏକ୍ସପ୍ରେସ୍ ଟ୍ରେନ୍ ବାତିଲ କରିଦିଆଯାଇଛି। ଅନ୍ଧେରୀରେ ସର୍ବାଧିକ ୧୫୭ମିମି ବର୍ଷା ହୋଇଛି। ଏଥି ସହିତ ବିଏମ୍ସିର ସମସ୍ତ ସ୍କୁଲ ଓ କଲେଜକୁ ଆଜି ବନ୍ଦ କରିଦିଆଯାଇଛି। ପାଣିପାଗ ବିଭାଗ ପାଳଘର, ଥାଣେ ଓ ମୁମ୍ବାଇ ପାଇଁ ରେଡ ଆଲର୍ଟ ଜାରି କରାଯାଇଛି।
ମହାରାଷ୍ଟ୍ରକୁ ଲାଗିଥିବା ଗୁରାଟରେ ମଧ୍ୟ ପ୍ରବଳ ବର୍ଷା ହୋଇଛି। କଚ୍ଛ ଓ ସୌରାଷ୍ଟ୍ରରେ ସର୍ବାଧିକ ବର୍ଷା ହୋଇଛି। ରାଜ୍ୟର ୭ ଜିଲ୍ଲାରୁ ୪ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି। ଗୁଜରାଟରେ ବନ୍ୟା ଓ ବର୍ଷାରେ ଏପର୍ଯ୍ୟନ୍ତ ୬୩ ଜଣଙ୍କର ମୃତ୍ୟୁ ହୋଇସାରିଛି। ବନାସକାଣ୍ଠାରେ ବର୍ଷାରେ ଜନଜୀବନ ଅସ୍ତବ୍ୟସ୍ତ ହୋଇଛି। ମଧ୍ୟପ୍ରଦେଶର ଅନେକ ଅଞ୍ଚଳରେ ବର୍ଷା ହୋଇଛି। କଟନୀ ଜିଲ୍ଲାରେ ମୁସଲଧାରା ବର୍ଷା ହୋଇଛି।