କନ୍ଧମାଳ ଜିଲ୍ଲାର ଘନ ଜଙ୍ଗଲ ଭିତରେ ଲୁଚାଇ ରଖାଯାଇଥିବା ମାଓବାଦୀଙ୍କ ଏକ ବିରାଟ ଅସ୍ତ୍ରଭଣ୍ଡାର ଠାବ କରିଛି ସୁରକ୍ଷା ବାହିନୀ। ଏହି ଅଭିଯାନରେ ବିପୁଳ ପରିମାଣର ଅସ୍ତ୍ରଶସ୍ତ୍ର, ଗୁଳିଗୋଳା ଓ ବିସ୍ଫୋରକ ଜବତ ହୋଇଥିବାରୁ ମାଓବାଦୀଙ୍କ ଏକ ବଡ଼ ଷଡଯନ୍ତ୍ର ପଣ୍ଡ ହୋଇଯାଇଛି ବୋଲି ପୋଲିସ କହିଛି।

ସୂଚନା ଅନୁଯାୟୀ, କୋଟଗଡ଼ ଥାନା ଅଞ୍ଚଳରେ ମାଓବାଦୀମାନେ ଅସ୍ତ୍ରଶସ୍ତ୍ର ଲୁଚାଇ ରଖିଥିବା ନେଇ ଗୁପ୍ତଚର ବିଭାଗ ପକ୍ଷରୁ ନିର୍ଦ୍ଦିଷ୍ଟ ସୂଚନା ମିଳିଥିଲା। ଏହାପରେ ପୋଲିସ ଓ ସୁରକ୍ଷା ବାହିନୀର ଏକ ମିଳିତ ଟିମ୍ ଜଙ୍ଗଲ ଭିତରେ ସର୍ଚ୍ଚ ଅପରେସନ ଆରମ୍ଭ କରିଥିଲେ। ଦୀର୍ଘ ସମୟ ଧରି ଚାଲିଥିବା ତଲାସି ବେଳେ ଜଙ୍ଗଲ ମଧ୍ୟରେ ଲୁଚାଇ ରଖାଯାଇଥିବା ଏକ ଗୁପ୍ତ ଅସ୍ତ୍ରଭଣ୍ଡାର ଠାବ ହୋଇଥିଲା।

ଅଭିଯାନ ସମୟରେ ୬ଟି ଅଗ୍ନେୟାସ୍ତ୍ର, ବହୁ ପରିମାଣର ଜୀବନ୍ତ ଗୁଳି ଏବଂ ବିସ୍ଫୋରକ ସାମଗ୍ରୀ ଜବତ କରାଯାଇଛି। ଜବତ ସାମଗ୍ରୀକୁ ସୁରକ୍ଷିତ ଭାବେ ଥାନାକୁ ଅଣାଯାଇ ଯାଞ୍ଚ ପ୍ରକ୍ରିୟା ଆରମ୍ଭ ହୋଇଛି।

ବରିଷ୍ଠ ପୋଲିସ ଅଧିକାରୀଙ୍କ କହିବା ଅନୁସାରେ, କନ୍ଧମାଳ ସମେତ ପଡ଼ୋଶୀ ଜିଲ୍ଲାଗୁଡ଼ିକରେ ହିଂସାତ୍ମକ କାର୍ଯ୍ୟକଳାପ ଚଳାଇବା ପାଇଁ ମାଓବାଦୀମାନେ ଏହି ଅସ୍ତ୍ରଶସ୍ତ୍ର ମହଜୁଦ ରଖିଥିଲେ। କିନ୍ତୁ ସୁରକ୍ଷା ବାହିନୀର ତତ୍ପରତା ଫଳରେ ସେମାନଙ୍କ ଯୋଜନାକୁ ବଡ଼ ଧକ୍କା ଲାଗିଛି। ଏହି ଘଟଣା ପରେ ସମ୍ବେଦନଶୀଳ ଅଞ୍ଚଳଗୁଡ଼ିକରେ ପାଟ୍ରୋଲିଂ ବଢ଼ାଯାଇଛି ଓ ନକ୍ସଲ ଗତିବିଧି ଉପରେ କଡ଼ା ନଜର ରଖାଯାଇଛି।

ଏହି ସଫଳ ଅପରେସନ ପରେ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଥିବା ବେଳେ, ପୋଲିସ ଲୋକଙ୍କୁ ଭୟଭୀତ ନହେବାକୁ ପରାମର୍ଶ ଦେଇଛି। ଏବେ ଜବତ ଅସ୍ତ୍ର ଓ ବିସ୍ଫୋରକର ଉତ୍ସ ଖୋଜିବା ସହ ଏଥିରେ ସଂପୃକ୍ତ ମାଓବାଦୀ ସଂଗଠନ ଓ ସଦସ୍ୟଙ୍କ ଚିହ୍ନଟ ପାଇଁ ତଦନ୍ତ ଜୋରଦାର କରାଯାଇଛି।