ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୁନ୍ ୧୯ ତାରିଖରେ 'ପ୍ରଧାନମନ୍ତ୍ରୀ ବିକଶିତ ଭାରତ ରୋଜଗାର ଯୋଜନା' ଅଧୀନରେ ପ୍ରାୟ ୨,୪୦୦ କୋଟିର ପ୍ରୋତ୍ସାହନ ରାଶି ଜାରି କରିବେ। ପ୍ରଥମ ଥର ପାଇଁ ଚାକିରି ପାଇଥିବା କର୍ମଚାରୀଙ୍କୁ ୧୫,୦୦୦ ପର୍ଯ୍ୟନ୍ତ ପ୍ରୋତ୍ସାହନ ରାଶି ମିଳିବ। କ୍ରମାଗତ ଭାବରେ ରୋଜଗାର ସୃଷ୍ଟିକୁ ପ୍ରୋତ୍ସାହନ ଦେବା ପାଇଁ, ନିଯୁକ୍ତିଦାତାମାନେ ପ୍ରତ୍ୟେକ ଅତିରିକ୍ତ କର୍ମଚାରୀଙ୍କ ପାଇଁ ମାସିକ ୩,୦୦୦ ପର୍ଯ୍ୟନ୍ତ ପ୍ରୋତ୍ସାହନ ରାଶି ପାଇବାକୁ ଯୋଗ୍ୟ ହେବେ।

ପ୍ରଧାନମନ୍ତ୍ରୀ ମୋଦୀ ୧୯ ଜୁନ୍, ୨୦୨୬ ରିଖ ସନ୍ଧ୍ୟା ୫:୦୦ ଟାରେ ନୂଆଦିଲ୍ଲୀର ବିଜ୍ଞାନ ଭବନରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ 'ପ୍ରଧାନମନ୍ତ୍ରୀ ବିକଶିତ ଭାରତ ରୋଜଗାର ଯୋଜନା' (PM-VBRY) ଅଧୀନରେ ପ୍ରାୟ ୨,୪୦୦ କୋଟିର ପ୍ରୋତ୍ସାହନ ରାଶି ବିତରଣ କରିବେ। PM-VBRY କୁ ଲାଗୁ କରିବା ଦିଗରେ ଏହି ବିତରଣ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ।

PM-VBRY ହେଉଛି ଭାରତ ସରକାରଙ୍କ ରୋଜଗାର ସହ ଜଡ଼ିତ ଏକ ପ୍ରମୁଖ ପ୍ରୋତ୍ସାହନ ଯୋଜନା, ଯାହାର ଉଦ୍ଦେଶ୍ୟ ହେଉଛି ସମସ୍ତ କ୍ଷେତ୍ରରେ ରୋଜଗାରର ନୂତନ ଅବସର ସୃଷ୍ଟି କରିବା, ରୋଜଗାରକୁ ଆନୁଷ୍ଠାନିକ ରୂପ ଦେବା, ଲୋକଙ୍କ ରୋଜଗାର ପାଇବାର କ୍ଷମତା ବୃଦ୍ଧି କରିବା ଏବଂ ସାମାଜିକ ସୁରକ୍ଷାର ପରିସର ବଢ଼ାଇବା। ଏହି ଯୋଜନା ମାଧ୍ୟମରେ ଦେଶବ୍ୟାପୀ ପୂର୍ବରୁ ହିଁ ୧୫ ଲକ୍ଷ ରୋଜଗାର ଅବସର ସୃଷ୍ଟି କରାଯାଇସାରିଛି।

PM-VBRY ଯୋଜନାର ଉଦ୍ଦେଶ୍ୟ

PM-VBRY ଯୋଜନାର ଉଦ୍ଦେଶ୍ୟ ହେଉଛି କର୍ମଚାରୀ ଏବଂ ନିଯୁକ୍ତିଦାତା ଉଭୟଙ୍କୁ ଆନୁଷ୍ଠାନିକ ଅର୍ଥବ୍ୟବସ୍ଥାରେ ସାମିଲ ହେବା ପାଇଁ ପ୍ରୋତ୍ସାହିତ କରିବା। ଏହି ଯୋଜନା ଅଧୀନରେ, ପ୍ରଥମ ଥର ପାଇଁ ଚାକିରି ପାଇଥିବା କର୍ମଚାରୀଙ୍କୁ ୧୫,୦୦୦ ପର୍ଯ୍ୟନ୍ତ ପ୍ରୋତ୍ସାହନ ମିଳିଥାଏ, ଯାହା ସେମାନଙ୍କୁ କାର୍ଯ୍ୟକ୍ଷେତ୍ରରେ ସାମିଲ ହେବାରେ ବହୁତ ସାହାଯ୍ୟ କରେ। ଯେଉଁ ନିଯୁକ୍ତିଦାତାମାନେ ଅତିରିକ୍ତ ରୋଜଗାର ସୃଷ୍ଟି କରନ୍ତି, ସେମାନଙ୍କୁ ପ୍ରତି ଅତିରିକ୍ତ କର୍ମଚାରୀ ପିଛା ମାସିକ ୩,୦୦୦ ପର୍ଯ୍ୟନ୍ତ ପ୍ରୋତ୍ସାହନ ମିଳେ, ଯାହା ସ୍ଥାୟୀ ରୋଜଗାର ସୃଷ୍ଟିକୁ ପ୍ରୋତ୍ସାହିତ କରିଥାଏ।

କର୍ମଚାରୀ ଦୁଇ ବର୍ଷ ପାଇଁ ପ୍ରୋତ୍ସାହନର ଲାଭ ଉଠାଇପାରିବେ

ଏହା ବ୍ୟତୀତ ଆର୍ଥିକ ବିକାଶକୁ ଗତିଶୀଳ କରିବାରେ ମ୍ୟାନୁଫ୍ୟାକ୍ଚରିଂ ର ରଣନୈତିକ ଗୁରୁତ୍ୱକୁ ଦୃଷ୍ଟିରେ ରଖି, ମ୍ୟାନୁଫ୍ୟାକ୍ଚରିଂ କ୍ଷେତ୍ରର ନିଯୁକ୍ତିଦାତାମାନେ ଚାରି ବର୍ଷର ଅବଧି ପାଇଁ ପ୍ରୋତ୍ସାହନ ପାଇବାକୁ ଯୋଗ୍ୟ ଥିବାବେଳେ ଅନ୍ୟ ସମସ୍ତ କ୍ଷେତ୍ରର କର୍ମଚାରୀମାନେ ଦୁଇ ବର୍ଷ ପାଇଁ ପ୍ରୋତ୍ସାହନର ଲାଭ ଉଠାଇପାରିବେ। ଏହି ଯୋଜନା ରୋଜଗାର-ଭିତ୍ତିକ ବିକାଶ ପାଇଁ ଅନୁକୂଳ ପରିବେଶ ସୃଷ୍ଟି କରିବା ଏବଂ ଭାରତର ଆର୍ଥିକ ପ୍ରଗତିର ଲାଭ ଯେପରି ଯୁବପିଢ଼ିଙ୍କ ପାଇଁ ଗୁଣାତ୍ମକ ଆନୁଷ୍ଠାନିକ ରୋଜଗାର ଅବସରରେ ପରିଣତ ହେବ, ତାହା ନିଶ୍ଚିତ କରିବା ପ୍ରତି ସରକାରଙ୍କ ପ୍ରତିବଦ୍ଧତାକୁ ଦର୍ଶାଉଛି।