ଓଡ଼ିଶାରେ ପାଣିପାଗ ପୂର୍ବାନୁମାନକୁ ଆହୁରି ଅଧିକ ସୁଦୃଢ଼ କରାଯିବା ନେଇ ସୂଚନା ଦେଇଛନ୍ତି ଭାରତୀୟ ପାଣିପାଗ ବିଭାଗର ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର। ସେଥିପାଇଁ ଓଡ଼ିଶାରେ ଅତ୍ୟାଧୁନିକ ସୂଚନା ପ୍ରଦାନକାରୀ ରାଡାର ଲାଗିବ। ନିକଟରେ ସମ୍ବଲପୁରରେ ରାଡାର ଲାଗିବାକୁ ଯାଉଥିବା ବେଳେ ଚଳିତ ବର୍ଷ ଶେଷ ସୁଦ୍ଧା କିମ୍ବା ଆସନ୍ତା ବର୍ଷ ପ୍ରାରମ୍ଭରେ ବାଲେଶ୍ବରରେ ଆଉ ଗୋଟିଏ ରାଡର ଲାଗିବ ବୋଲି ସୂଚନା ଦେଇଛନ୍ତି। ଏହା ଦ୍ୱାରା ପ୍ରାକୃତିକ ଦୁର୍ବିପାକ ଆସିବା ପୂର୍ବରୁ ପ୍ରତି ମୁହୂର୍ତ୍ତରେ ସଠିକ୍ ତଥ୍ୟ ସାଧାରଣ ଜନତାଙ୍କ ପାଖରେ ପହଂଚିବ। ଏବେ ରାଜ୍ୟରେ ୨ଟି ରାଡ଼ାର ରହିଥିବା ବେଳେ ଆଗକୁ ଆହୁରି ୨ଟି ଆସିବାର ଯୋଜନା ରହିଛି।
ସୂଚନାଯୋଗ୍ୟଯେ, ପାଣିପାଗର ପୂର୍ବାନୁମାନକୁ ଅଧିକ ସୁଦୃଢ଼ କରିବାକୁ ସମ୍ବଲପୁର ଓ ବାଲେଶ୍ବରରେ ରାଡାର ଲାଗିବାକୁ ଯାଉଛି। ସମ୍ବଲପୁରରେ ଲାଗିଥିବା ରାଡାର ପାଇଁ ଅର୍ଡର ଦିଆସରିଥିବା ବେଳେ ୨୦୨୪ ଶେଷ ସୁଦ୍ଧା ସମ୍ବଲପୁରରେ ରାଡାର ଲଗାଇବା ଲକ୍ଷ୍ୟ ରହିଛି। ସେହିପରି ଭୁବନେଶ୍ବରରେ ମଧ୍ୟ ଏକ ରାଡାର ଲଗାଇବାକୁ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଏହି ରାଡାର ଦ୍ୱାରା ବିଜୁଳି ଘଡ଼ଘଡ଼ି ଜନିତ ବର୍ଷା, କାଳବୈଶାଖୀ, ବଜ୍ରପାତ ଓ ପ୍ରବଳ ବର୍ଷା ସମ୍ପର୍କରେ ୩ ଘଣ୍ଟା ପୂର୍ବରୁ ସୂଚନା ମିଳିଯିବ। ଏହା ସାଧାରଣ ଲୋକଙ୍କ ସହ ଚାଷୀ ଏବଂ ସମୁଦ୍ରକୁ ଯାଉଥିବା ମତ୍ସ୍ୟଜୀବୀମାନଙ୍କ ପାଇଁ ଏହା ଫଳପ୍ରଦ ହେବ। ଏହା ଦ୍ବାରା ପୂର୍ବାନୁମାନ ଭାବରେ ଆଲର୍ଟ କରାଯିବ ଯାହା ଅନେକ ଧନଜୀବନ କ୍ଷୟ କ୍ଷତିରୁ ସାଧାରଣ ଜନତାଙ୍କୁ ବଞ୍ଚାଇପାରିବ।
ପାଣିପାଗର ଆଗୁଆ ପୂର୍ବାନୁମାନ ସହ ତାହାର ପ୍ରଭାବ କ’ଣ ହୋଇପାରେ ସେଦିଗରେ କାର୍ଯ୍ୟ ଚାଲିଥିବା ବେଳେ ବାତ୍ୟା, ଅତିପ୍ରବଳ ବର୍ଷା, କାଳବୈଶାଖୀ, ହିଟ୍ୱେଭ୍ ପରି ପାଣିପାଗ ସମ୍ପର୍କିତ ବିପର୍ଯ୍ୟୟ ପାଇଁ ହେଉଥିବା ପୂର୍ବାନୁମାନର ତଥ୍ୟ ସଂଗ୍ରହ ସହ ଆର୍ଟିଫିସିଆଲ୍ ଇଣ୍ଟେଲିଜେନ୍ସ(ଏଆଇ), ଜିଓ ସ୍ପେସାଲ ଟେକ୍ନୋଲୋଜି, ରିମୋର୍ଟ ସେନସେନିଂ ପରି ଟେକ୍ନୋଲୋଜିକୁ ବ୍ୟବହାର କରିବା ଦିଗରେ ପଦକ୍ଷେପ ନିଆଯାଉଛି ଏବଂ କେନ୍ଦ୍ର ସରକାର, ସମସ୍ତ ରାଜ୍ୟ ସରକାର, ଶିକ୍ଷାନୁଷ୍ଠାନ, ଗଣମାଧ୍ୟମ, ସାମାଜିକ ସଙ୍ଗଠନଗୁଡ଼ିକ ସହାୟତାରେ ପାଣିପାଗ ବିବରଣୀକୁ ସବୁ ସମୟରେ ସମସ୍ତଙ୍କ ଘରେ ପହଞ୍ଚାଇବା ଦିଗରେ କାମ ଚାଲିଛି ବୋଲି କହିଛନ୍ତି ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର।
ଗତ ଗୁରୁବାର ଉତ୍କଳ ବିଶ୍ଵବିଦ୍ୟାଳୟର ସମାବର୍ତ୍ତନ ଉତ୍ସବରେ ଡକ୍ଟରେଟ ଉପାଧି ପାଇବା ଅବସରରେ ଆଇଏମଡି ଡିଜି ଡ଼ ମୃତ୍ୟୁଞ୍ଜୟ ମହାପାତ୍ର କହିଥିଲେ ଯେ, "ମୁଁ ଆଜି ଏହି ସମ୍ମାନରେ ସମ୍ମାନିତ ହୋଇ ବେଶ ଖୁସି । ସେଥିପାଇଁ ସମସ୍ତଙ୍କୁ ଧନ୍ୟବାଦ ଦେଉଛି। ଆଜି ଯେଉଁ ସଫଳତା ପାଇଛି ତାହା ପରିବାର, ଭାରତୀୟ ପାଣିପାଗ ବିଭାଗର ସମସ୍ତ କାର୍ଯ୍ୟରତ ବିଜ୍ଞାନୀ ତଥା ସହ ଧର୍ମିଣୀଙ୍କ ସହଯୋଗ ପାଇଁ ସମ୍ଭବ ହୋଇଛି । ବିଶ୍ୱବିଦ୍ୟାଳୟର କୁଳପତି, ମନ୍ତ୍ରୀଙ୍କୁ ମୋର ଧନ୍ୟବାଦ। ମହାମହିମ ରାଷ୍ଟ୍ରପତିଙ୍କ ଠାରୁ ଏହି ପୁରସ୍କାର ପାଇବା ମୋ ପାଇଁ ସୌଭାଗ୍ୟ । ଏହି ଆୱାର୍ଡ ମୋତେ କାମ କରିବାକୁ ଆହୁରି ଅନୁପ୍ରାଣିତ କରିବ।"
ଅଧିକ ପଢନ୍ତୁ: ଓଡିଶା ଗସ୍ତର ତୃତୀୟ ଦିନରେ ଗଞ୍ଜାମ ଓ କଟକ ଯିବେ ମହାମହିମ