ବରଗଡ ଆମ୍ବପାଲି ଛକରେ ଭାରସାମ୍ୟ ହରାଇ ଦୁର୍ଘଟଣାର ସମ୍ମୁଖୀନ ହୋଇଛି ଯାତ୍ରୀବାହୀ ଅଟୋ। ଫଳରେ ଅନେକ ଜଣ ଆହତ ହୋଇଥିଲେ। ଆହତ ମାନଙ୍କୁ ସାମାଜିକ ଅନୁଷ୍ଠାନ ସଂକଳ୍ପ ପରିବାର ଓ ସ୍ଥାନୀୟ ଲୋକଙ୍କ ସହଯୋଗରେ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ଖବର ପାଇ ପୋଲିସ ଘଟଣାସ୍ଥଳରେ ପହଂଚି ଦୁର୍ଘଟଣାଗ୍ରସ୍ତ ଗାଡିକୁ ଜବତ କରି ଘଟଣାର ତଦନ୍ତ କରୁଛି।
ସୂଚନା ମୁତାବକ, ବରଗଡ଼ ବ୍ଲକ ଅନ୍ତର୍ଗତ ବରଡୋଲ ଗ୍ରାମର ଦୁଇଟି ପରିବାର ତାଙ୍କ ସମ୍ପର୍କୀୟ ଜଣକର ଦଶାହ କାର୍ଯ୍ୟରେ ଯୋଗଦେବା ପାଇଁ ବରଡୋଲ ଗ୍ରାମରୁ ବେହେରା ଗ୍ରାମକୁ ଯାଇଥିଲେ। ତେବେ ଫେରିବା ସମୟରେ ଅଟୋ ଚାଳକ ବରଗଡ଼ ଅମ୍ବାପାଳି ଛକରେ ଥିବା ବୁଲାଣି ରାସ୍ତାରେ ଭାରସାମ୍ୟ ହରାଇ ବସିଥିଲେ ଯେଉଁଥିରେ ଅଟୋ ସିଧାସଳଖ ରାସ୍ତା ମଝିରେ ଓଲଟି ପଡି ଦୁର୍ଘଟଣାର ସମ୍ମୁଖୀନ ହୋଇଥିଲା।
ଫଳରେ ଅଟୋରେ ବସିଥିବା ଲୋକ ମାନେ ଗୁରୁତର ଭାବେ ଆହତ ହୋଇଥିଲେ । ଆହତ ଲୋକ ମାନଙ୍କ ମଧ୍ୟରୁ ଜଣକର ଗୋଡ଼ ଭାଙ୍ଗି ଯାଇଥିବା ବେଳେ ଆଉ ଜଣକର ମୁଣ୍ଡରେ ମାଡ଼ ହୋଇଥିଲା ଓ ଅନ୍ୟ ମାନେ ସାମାନ୍ୟ ଆହତ ହୋଇଥିଲେ ସମସ୍ତ ଆହତ ମାନଙ୍କୁ ଘଟଣା ସ୍ଥଳରେ ଉପସ୍ଥିତ ଥିବା ସଂକଳ୍ପ ପରିବାରର ସଦସ୍ୟ ସ୍ଥାନୀୟ ଲୋକଙ୍କ ସହିତ ମିଶି ୧୦୮ ଆମ୍ବୁଲାନ୍ସ ଓ ସଂକଳ୍ପ ପରିବାରର ଏକ ଆମ୍ବୁଲାନ୍ସ ସାହାଯ୍ୟରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ।