ବୌଦ୍ଧ ଜିଲ୍ଲା ସରସରାରର ୫୭ ନମ୍ବର ଜାତୀୟ ରାଜପଥ ଠାରୁ ବଡ଼ବଙ୍କାପାଡା ଦେଇ ଯାଇଥିବା ୬ କିଲୋମିଟରରୁ ଉର୍ଦ୍ଧ୍ୱ ଲମ୍ବ ରାସ୍ତାରେ ମୁଖ୍ୟମନ୍ତ୍ରୀ ସଡ଼କ ଯୋଜନାରେ ବୌଦ୍ଧର ନିର୍ବାହୀ ଯନ୍ତ୍ରୀ ଗ୍ରାମ୍ୟ ଉନ୍ନୟନ ବିଭାଗର ପ୍ରତ୍ୟକ୍ଷ ତତ୍ତ୍ୱାବଧାନରେ ରାସ୍ତା ୨୦୨୨-୨୩ ଆର୍ଥିକ ବର୍ଷ ନିର୍ମିତ ହେବାର ଥିଲେ ମଧ୍ୟ ତାହା ଗତବର୍ଷ ଶେଷ ହୋଇଥଲା ବୋଲି ସୂଚନା ମିଳିଛି । ୨୦୨୨-୨୩ ଆର୍ଥିକ ବର୍ଷରେ ନିର୍ମାଣ ହୋଇଥିବା ଏହି ରାସ୍ତା କାର୍ଯ୍ୟ ଅତ୍ୟନ୍ତ ନିମ୍ନ ମାନର ବୋଲି ଅଭିଯୋଗ ହୋଇଛି । ୫ କୋଟି ୩୨ ଲକ୍ଷ ୬୦ ହଜାର ବ୍ୟୟ ଅଟକଳରେ ନିର୍ମିତ ହେଇଥିବା ସରସରା ଠାରୁ ବଘାର ପାଲି ରାସ୍ତା ର ଇଣ୍ଡିଆନ୍ ଗ୍ୟାସ ଅଫିସ ସାମ୍ନାରେ ପ୍ରାୟ ୫୦ ମିଟର ଗାର୍ଡ ୱାଲ୍ ଗଳି ପଡ଼ିଥିବା ଦେଖିବାକୁ ମିଳିଛି । ଉକ୍ତ ଗାର୍ଡ ୱାଲ୍ ପାଇଁ ନା ମୂଳଦୁଆ ଖୋଲାଯାଇଛି ନା ରଡ ବ୍ୟବହାର କରାଯାଇଛି ବୋଲି ସ୍ଥାନୀୟ ଜନସାଧାରଣ ଓ ଚାଷୀ ଅଭିଯୋଗ କରିଛନ୍ତି । କେବଳ ନାମକୁ ମାତ୍ର ଅଳ୍ପ ସିମେଣ୍ଟ ରେ ବାଲି ମିଶାଇ ଗାର୍ଡ ୱାଲ୍ ନିର୍ମାଣ ହୋଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ଏପରିକି ଏହି ନିର୍ମାଣ କାର୍ଯ୍ୟ ଚାଲୁଥିବା ବେଳେ ଠିକାଦାରଙ୍କୁ ଏ ବିଷୟରେ ଅବଗତ କରାଯାଇଥିଲେ ସୁଦ୍ଧା ସେ ଏ ସବୁକୁ କର୍ଣ୍ଣପାତ କରିନଥିବା ଅଭିଯୋଗ ହୋଇଛି । ସବୁଠାରୁ ଚିନ୍ତାର ବିଷୟ ଗାର୍ଡ ୱାଲ୍ ସାଗର ନାଳ ବା ମୂଳଗଛ ନାଳ ମଧ୍ୟକୁ ଗଳି ପଡ଼ିଥିବାରୁ ସେଇ ନାଳ ଦେଇ ଶହ ଶହ ଏକର ଜମିକୁ ଜଳସେଚନ ପାଇଁ ସାଗର ବନ୍ଧରୁ ପ୍ରବାହିତ ହେଉଥିବା ଜଳ ଚାଷଜମି ପର୍ଯ୍ୟନ୍ତ ଯିବାରେ ବାଧା ସୃଷ୍ଟି ହେବାର ଆଶଙ୍କା ସୃଷ୍ଟି ହୋଇଛି । ଫଳରେ ଅନିୟମିତ ମୌସୁମୀ ବର୍ଷା ଯୋଗୁଁ ସେଇ ନାଳ ଉପରେ ଜଳସେଚନ ପାଇଁ ନିର୍ଭର କରୁଥିବା ଚାଷୀ ମାନଙ୍କ ମୁଣ୍ଡରେ ଚଡ଼କ ପଡ଼ିଛି । ଏଣୁ ଏହି ସମସ୍ୟାର ତୁରନ୍ତ ସମାଧାନ କରିବା ଏବଂ ନିମ୍ନ ମାନର କାର୍ଯ୍ୟର ତଦନ୍ତ କରି ଉକ୍ତ ନିର୍ମାଣ କାର୍ଯ୍ୟରେ ସଂପୃକ୍ତ ବ୍ୟକ୍ତି ବିଶେଷଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସର୍ବସାଧାରଣରେ ଦାବି ହେଉଛି ।