ମାଟ୍ରିକ ପରୀକ୍ଷାର୍ଥୀଙ୍କ ସନ୍ଦେହ ଜନକ ମୃତ୍ୟୁ। ବଲାଙ୍ଗିର ସଦର ଥାନା ଅନ୍ତର୍ଗତ ଖୁଜେନପାଲି ବିଶ୍ୱତ୍ମା ବିଦ୍ୟାମନ୍ଦିର ହଷ୍ଟେଲରେ ଘଟିଛି ଏଭଳି ଅଭାବନୀୟ ଘଟଣା। ହଷ୍ଟେଲ ଭିତରେ ଏକ ଛାତ୍ରଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି।

ଚଳିତ ବର୍ଷ ଫେବୃଆରୀ ୨୦ରୁ ମାଟ୍ରିକ ପରୀକ୍ଷା ଆରମ୍ଭ ହୋଇଥିବା ବେଳେ ଏହା ପୂର୍ବରୁ ବଲାଙ୍ଗିରରେ ଘଟିଛି ଏକ ଦୁଃଖଦ ଘଟଣା।  ପରୀକ୍ଷା ପୂର୍ବରୁ ବେକରେ ଗାମୁଛା ଲଗାଇ ସ୍କୁଲ ହଷ୍ଟେଲ ପରିସରରେ ଆତ୍ମହତ୍ୟା କରିଛନ୍ତି ଜଣେ ଛାତ୍ର। ମୃତକ ଛାତ୍ର ଜଣକ ତାଲିଉଡ଼ା ଗାଁର ବିନାୟକ ପ୍ରଧାନ ବୋଲି ଜଣା ପଡିଛି। ତେବେ ପରୀକ୍ଷା ଚାପରୁ ଛାତ୍ରଜଣକ ଆତ୍ମହତ୍ୟା କରିଥିବା ଚର୍ଚ୍ଚା ହେଉଥିବା ବେଳେ ପୁଅକୁ ହତ୍ୟା କରି କେହି ଝୁଲାଇ ଦେଇଥିବା ଉକ୍ତ ଛାତ୍ରଙ୍କ ବାପା ରାତ୍ର ପ୍ରଧାନ ଅଭିଯୋଗ କରିଛନ୍ତି।   

ସୂଚନାଯୋଗ୍ୟ ଯେ, ମୃତକ ବିନାୟକ ପ୍ରଧାନ ବଲାଙ୍ଗିର ସଦର ଥାନା ଅନ୍ତର୍ଗତ ଖୁଜେନପାଲିସ୍ଥିତ ଏକ ଘରୋଇ ସ୍କୁଲ ବିଶ୍ୱତ୍ମା ବିଦ୍ୟାମନ୍ଦିରର ଛାତ୍ର। ବିଦ୍ୟାଳୟର ହଷ୍ଟେଲରେ ରହୁଥିବା ବିନାୟକ ପରୀକ୍ଷା ପୂର୍ବଦିନ ରାତି ୧୨ ଟା ପର୍ଯ୍ୟନ୍ତ  ସାଙ୍ଗ ମାନଙ୍କ ସହ ପାଠ ପଢିଥିବା ପରେ ସମସ୍ତେ ଶୋଇବାକୁ ଯାଇଥିଲେ। ତେବେ ଆଜି ଭୋର ପ୍ରାୟ ୪ଟା ପରେ ହଷ୍ଟେଲ ବାଥରୁମ୍‌ରୁ ତାଙ୍କର ଝୁଲନ୍ତା ମୃତଦେହ ଉଦ୍ଧାର ହୋଇଛି। ସକାଳେ ପରୀକ୍ଷା ଥିବାରୁ ପିଲାମାନେ ଭୋରରୁ ହଷ୍ଟେଲ ପଛପଟେ ଥିବା ବାଥ୍‌ରୁମ୍‌କୁ ଯାଇଥିଲେ। ମାତ୍ର ସେଠାରେ ସେମାନେ ବିନାୟକଙ୍କ ଝୁଲନ୍ତା ମୃତଦେହ ଦେଖିବାକୁ ପାଇଥିଲେ। ଗୋଟିଏ ଗାମୁଛାରେ ସେ ବେକରେ ଫାଶୀ ଲଗାଇ ଆତ୍ମହତ୍ୟା କରିଥିବା ଦେଖିବାକୁ ମିଳିଥିଲା। ଅନ୍ୟ ଛାତ୍ରମାନେ ଏନେଇ ହଷ୍ଟେଲ କର୍ତ୍ତୃପକ୍ଷଙ୍କୁ ଖବର ଦେବା ପରେ ତାଙ୍କୁ ଭୀମଭୋଇ ମେଡିକାଲ କୁ ଅଣାଯାଇଥିଲା।। ହେଲେ ଡାକ୍ତରଖାନାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର। ଏହାକୁ ନେଇ ହସ୍ପିଟାଲ ପରିସରରେ ଚାପା ଉତ୍ତେଜନା ଦେଖାଦେଇଛି।ଏହା ଆତ୍ମହତ୍ୟା ନୁହେ ହତ୍ୟା କରାଯାଇଥିବା ସନ୍ଦେହ କରି ଅଭିଯୋଗ କରିଛନ୍ତି ମୃତ ଛାତ୍ରଙ୍କ ବାପା। ତେବେ ଘଟଣା ସ୍ଥଳରେ ସଦର ଥାନା ପୋଲିସ ପହଁଚି ତଦନ୍ତ ଆରମ୍ଭ କରିଛି।

ଅଧିକ ପଢନ୍ତୁ: ଆଜିଠୁ ଆରମ୍ଭ ମାଟ୍ରିକ୍ ପରୀକ୍ଷା