ନୂଆଦିଲ୍ଲୀ: ପାକିସ୍ତାନ ଆଜିକାଲି ସବୁ ଦିଗରୁ ଆକ୍ରମଣର ସମ୍ମୁଖୀନ ହେଉଛି । ସିନ୍ଧୁ ଜଳ ଚୁକ୍ତିକୁ ନେଇ ବିଶ୍ୱ ବ୍ୟାଙ୍କରୁ ପାକିସ୍ତାନକୁ ଝଟକା ଲାଗିଛି । କେବଳ ମଧ୍ୟସ୍ଥି ବ୍ୟତୀତ ବିଶ୍ୱ ବ୍ୟାଙ୍କ ଏଥିରେ ଆଉ କିଛି କରି ପାରିବ ନାହିଁ ବୋଲି ସଫା ସଫା ଶୁଣାଇ ଦେଇଛି । 

ବିଶ୍ୱ ବ୍ୟାଙ୍କ ସଭାପତି ଅଜୟ ବଙ୍ଗା କହିଛନ୍ତି, "ଆମର ଭୂମିକା କେବଳ ଏକ ମଧ୍ୟସ୍ଥିର। ବିଶ୍ୱ ବ୍ୟାଙ୍କ ଏହି ସମସ୍ୟାର ସମାଧାନ କିପରି କରିବ ସେ ବିଷୟରେ ଗଣମାଧ୍ୟମରେ ବହୁତ କଳ୍ପନାଜଳ୍ପନା ଚାଲିଛି, କିନ୍ତୁ ଏସବୁ ଅର୍ଥହୀନ। ବିଶ୍ୱ ବ୍ୟାଙ୍କର ଭୂମିକା କେବଳ ଏକ ମଧ୍ୟସ୍ଥିର।"

ଅଧିକ ପଢନ୍ତୁ: ଖୁବଶୀଘ୍ର ଲାହୋରରେ ବ୍ରେକଫାଷ୍ଟ, ଇସଲାମାବାଦରେ ଲଞ୍ଚ୍ ଓ କରାଚୀ ଡିନର୍ କରିବା: ସୁପ୍ରିମକୋର୍ଟ ପୂର୍ବତନ ବିଚାରପତି

ଗୁରୁବାର ଦିନ ଅଜୟ ବଙ୍ଗା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଭେଟିଥିଲେ। ବୈଠକରେ କ’ଣ ଆଲୋଚନା ହୋଇଥିଲା ସେ ବିଷୟରେ ସୂଚନା ମିଳି ପାରି ନାହିଁ । କିନ୍ତୁ CNBC-TV18 ସହିତ କଥାବାର୍ତ୍ତା ସମୟରେ ବଙ୍ଗା କହିଥିଲେ ଯେ ଚୁକ୍ତିନାମା ଦୁଇ ଦେଶ ମଧ୍ୟରେ ଏବଂ ଯଦି ସେମାନେ ମତଭେଦ କରନ୍ତି, ତେବେ ବିଶ୍ୱ ବ୍ୟାଙ୍କର ଭୂମିକା କେବଳ ବିବାଦର ସମାଧାନ ପାଇଁ ଜଣେ ନିରପେକ୍ଷ ବିଶେଷଜ୍ଞ କିମ୍ବା ମଧ୍ୟସ୍ଥି ବ୍ୟବସ୍ଥା କରିବା । ସେ କହିଥିଲେ, 'ଆମକୁ ଚୁକ୍ତିନାମା ସମୟରେ ବ୍ୟାଙ୍କରେ ପ୍ରତିଷ୍ଠିତ ଏକ ଟ୍ରଷ୍ଟ ପାଣ୍ଠିରୁ ବିଶେଷଜ୍ଞ କିମ୍ବା ମଧ୍ୟସ୍ଥିଙ୍କ ଫି ଦେବାକୁ ପଡିବ। ଏହା ଆମର ଭୂମିକା। ଏହା ବ୍ୟତୀତ, ଆମର କୌଣସି ଭୂମିକା ନାହିଁ।'

ପାକିସ୍ତାନ ଗତ ମାସ ଶେଷ ଭାଗରେ କହିଥିଲା ଯେ ଏହା ଭାରତର "ଏକପାକ୍ଷିକ ଏବଂ ଅବୈଧ" ନିଷ୍ପତ୍ତିକୁ ପ୍ରତ୍ୟାହାର କରିବା ପାଇଁ ବିଶ୍ୱ ବ୍ୟାଙ୍କ ସହିତ ଯୋଗାଯୋଗ କରିବ । ଗତକାଲି ବୈଦେଶିକ ସଚିବ ବିକ୍ରମ ମିଶ୍ର କହିଥିଲେ ଯେ ପାକିସ୍ତାନ ବହୁ ବର୍ଷ ଧରି ବାଧା ସୃଷ୍ଟି କରିଆସୁଛି, ଯାହା ଯୋଗୁଁ ଭାରତ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବାକୁ ବାଧ୍ୟ ହୋଇଛି । ସେମାନଙ୍କୁ ଏହି ଚୁକ୍ତିନାମାରେ ସଂଶୋଧନ ପାଇଁ ଆଲୋଚନା କରିବାକୁ ଅନୁରୋଧ କରି ଅନେକ ଚିଠି ପଠାଇଥିଲୁ । ଭାରତ ଛଅ ଦଶନ୍ଧିରୁ ଅଧିକ ସମୟ ଧରି ଏହି ଚୁକ୍ତିନାମାକୁ ସମ୍ମାନ କରିଆସୁଛି । ପାକିସ୍ତାନ ଏହି ଚୁକ୍ତିନାମାକୁ ଉଲ୍ଲଂଘନ କରୁଛି । ଏହା ପଶ୍ଚିମ ନଦୀଗୁଡ଼ିକ ଉପରେ ଭାରତର ବୈଧ ଅଧିକାର ବ୍ୟବହାରରେ ଜାଣିଶୁଣି ବାଧା ସୃଷ୍ଟି କରୁଛି ।

ଅଧିକ ପଢନ୍ତୁ: ଭାରତ ସହିତ ଲଢ଼େଇ କରିବା ପରେ ବିଶ୍ୱ ବ୍ୟାଙ୍କକୁ ଅଧିକ ଋଣ ଦେବାକୁ ଆବେଦନ କଲା ପାକିସ୍ତାନ

ପହଲଗାମ ଆକ୍ରମଣ ପରେ, ଭାରତ ପାକିସ୍ତାନ ବିରୁଦ୍ଧରେ ଅନେକ ପଦକ୍ଷେପ ନେଇଥିଲା, ଯାହା ମଧ୍ୟରୁ ସବୁଠାରୁ ଗୁରୁତ୍ୱପୂର୍ଣ୍ଣ ଥିଲା ସିନ୍ଧୁ ଜଳ ଚୁକ୍ତିନାମାକୁ ବାତିଲ କରିବା । ଭାରତ ତା'ପରେ ପାକିସ୍ତାନ ସହିତ ଅଟାରୀ-ୱାଘା ସୀମା ବନ୍ଦ କରିଦେଲା, ଭାରତରୁ ଶୀର୍ଷ ପାକିସ୍ତାନୀ କୂଟନୀତିଜ୍ଞଙ୍କୁ ବହିଷ୍କାର କଲା ଏବଂ ପାକିସ୍ତାନୀ ନାଗରିକଙ୍କୁ ଜାରି କରାଯାଇଥିବା ସମସ୍ତ କ୍ଷଣସ୍ଥାୟୀ ଭିସା ବାତିଲ କଲା। 

ବିଶ୍ୱ ବ୍ୟାଙ୍କର ମଧ୍ୟସ୍ଥତାରେ ୧୯ ସେପ୍ଟେମ୍ବର ୧୯୬୦ରେ ଭାରତ ଏବଂ ପାକିସ୍ତାନ ମଧ୍ୟରେ ସିନ୍ଧୁ ଜଳ ଚୁକ୍ତି ସ୍ୱାକ୍ଷରିତ ହୋଇଥିଲା। ତତ୍କାଳୀନ ପ୍ରଧାନମନ୍ତ୍ରୀ ଜବାହରଲାଲ ନେହେରୁ ଏବଂ ପାକିସ୍ତାନର ତତ୍କାଳୀନ ରାଷ୍ଟ୍ରପତି ଆୟୁବ ଖାନ କରାଚୀରେ ଏହି ଚୁକ୍ତି ସ୍ୱାକ୍ଷର କରିଥିଲେ। ଏହି ଚୁକ୍ତି ଅନୁଯାୟୀ, ଦୁଇ ଦେଶ ସିନ୍ଧୁ ଏବଂ ଏହାର ଶାଖା ନଦୀ - ରାବୀ, ବ୍ୟାସ, ସତଲେଜ, ଝେଲମ, ଚେନାବ ଏବଂ କାବୁଲର ଜଳ ବଣ୍ଟନ ପାଇଁ ସହମତ ହୋଇଥିଲେ । ଏହି ଚୁକ୍ତି ଅନୁଯାୟୀ, ଭାରତକୁ ତିନୋଟି ପୂର୍ବ ନଦୀ - ରାବୀ, ବ୍ୟାସ ଏବଂ ସତଲେଜର ଜଳ ବିନା କୌଣସି ପ୍ରତିବନ୍ଧକରେ ବ୍ୟବହାର କରିବାକୁ ଅନୁମତି ଦିଆଯାଇଥିଲା, ପାକିସ୍ତାନକୁ ପଶ୍ଚିମ ନଦୀ ସିନ୍ଧୁ, ଚେନାବ ଏବଂ ଝେଲମକୁ ବ୍ୟବହାର କରିବାକୁ ଅନୁମତି ।