ଲକ୍ଷ୍ନୌ ସୁପର ଜାଏଣ୍ଟ୍ସ ଓ ରାଜସ୍ଥାନ ରୟାଲ୍ସ ମଧ୍ୟରେ ଖେଳାଯାଉଥିବା ମ୍ୟାଚରେ ହାତାହାତି ହେଲେ ଦର୍ଶକ । ମ୍ୟାଚ ଚାଲିଥିବା ସମୟରେ ପରସ୍ପରକୁ ମାଡ ମାରିବାର ଦୃଶ୍ୟ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଏହି ମ୍ୟାଚ ଲକ୍ଷ୍ନୌର ଘରୋଇ ମୈଦାନ ଅଟଳ ବିହାରୀ ବାଜପେୟୀ ଏକାନା ଷ୍ଟାଡିୟମରେ ଖେଳାଯାଇଥିଲା। ମ୍ୟାଚ ଚାଲିଥିବା ସମୟରେ ଗ୍ୟାଲେରୀରେ ବସିଥିବା କିଛି ଦର୍ଶକ ପରସ୍ପର ସହ ଝଗଡା କରୁଥିବାର ନଜର ଆସିଥିଲା । 

ଏହାର ଭିଡିଓ କେହି ଜଣେ ନିଜ ମୋବାଇଲ କ୍ୟାମେରାରେ କଏଦ କରିବା ସହ ସୋସିଆଲ ମିଡିଆରେ ପୋଷ୍ଟ ମଧ୍ୟ କରିଛନ୍ତି । ଭିଡିଓରେ କିଛି ଦର୍ଶକ ଝଗଡା ଲାଗିଥିବାବେଳେ ହଟାତ ଜଣେ ବ୍ୟକ୍ତି ଅନ୍ୟ ଜଣଙ୍କୁ ଗୋଇଠା ମାରିଥିଲେ ଓ ସେହି ବ୍ୟକ୍ତି କିଛି ତଳେ ପଡ଼ିଥିଲେ। ତଳେ ପଡିଥିବା ବ୍ୟକ୍ତି ପୁନର୍ବାର ଉଠିବା ସହ ଉକ୍ତ ବ୍ୟକ୍ତିଙ୍କୁ ମାଡ଼ ମାରିବାକୁ ଲାଗିଥିଲେ । ସେମାନଙ୍କ ପାଖରେ ବସିଥିବା ଲୋକ ଭୟଭୀତ ହୋଇ ସେଠାରୁ ଉଠିଯିବା ସହ ଭିଡିଓ ସେଠାରେ ବନ୍ଦ ହୋଇଯାଇଥିଲା । 

ଷ୍ଟାଡିୟମ ଭିତରେ ଏଭଳି ଘଟଣା ପ୍ରଥମ ନୁହେଁ, ପୂର୍ବରୁ ମଧ୍ୟ ଏଭଳି ଘଟଣା ଅନେକ ସମୟରେ ସାମ୍ନାକୁ ଆସିଛି । ପୂର୍ବରୁ ଲକ୍ଷ୍ନୌ ଓ ଦିଲ୍ଲୀର ମ୍ୟାଚ ସମୟରେ ଏଭଳି ଏକ ଭିଡିଓ ସୋସିଆଲ ମିଡ଼ିଆରେ ଭାଇରଲ ହୋଇଥିଲା । ସେ ଭିଡିଓରେ ମଧ୍ୟ ଦର୍ଶକ ହାତାହାତି ହେବାର ନଜର ଆସିଥିଲା । 

ଏଭଳି ଘଟଣା କ୍ରିକେଟ ଷ୍ଟାଡିୟମରେ ନିନ୍ଦାଜନକ ବିଷୟ । କ୍ରିକେଟ ଷ୍ଟାଡିୟମକୁ ଫ୍ୟାନ୍ସ ମନୋରଞ୍ଜନ ପାଇଁ ଯାଉଥିବାବେଳେ ଏଭଳି ଘଟଣା ଭୟର ବାତାବରଣ ସୃଷ୍ଟି କରିପାରେ । ମ୍ୟାଚ ସମୟରେ ପୋଲିସ ପ୍ରଶାସନ  ଗ୍ରାଉଣ୍ଡରେ ମୁତୟନ ଥିଲେ ମଧ୍ୟ ଏଭଳି ସ୍ଥିତି ଦର୍ଶକଙ୍କୁ ଭୟବିତ୍ତ କରିପାରେ । ଏହା ବ୍ୟତୀତ ଆଇପିଏଲ ସମୟରେ ଅନେକ ବିଦେଶୀ ଦର୍ଶକ ମଧ୍ୟ ମ୍ୟାଚ ଦେଖିବାକୁ ଆସିଥାନ୍ତି । ତେଣୁ ଏଭଳି ସ୍ଥିତି ଉପୁଜିଲେ ପୁନର୍ବାର ମ୍ୟାଚ ଦେଖିବାକୁ ଇଚ୍ଛା ପ୍ରକାଶ ନକରିପାରନ୍ତି। ତେଣୁ ଅନେକ ସମୟର ଶାନ୍ତିଶୃଙ୍ଖଳା ବଜାୟ ରଖିବାକୁ ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯିବା ସହ ଶାନ୍ତିଶୃଙ୍ଖଳା ବଜାୟ ରଖିବା ଆମ କର୍ତବ୍ୟ ଭାବି ଗ୍ରାଉଣ୍ଡକୁ ଯିବା ଆବଶ୍ୟକ ।