ବେଙ୍ଗାଲୁରୁ: ବିରାଟ କୋହଲି ଓ ଦେବଦତ୍ତ ପାଡିକଲଙ୍କ ବିସ୍ଫୋରକ ଅର୍ଦ୍ଧଶତକ ଆଗରେ ଫିକା ପଡିଲା ସାଇ ସୁଦର୍ଶନଙ୍କ ଶତକ । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଗୁଜରାଟ ଟାଇଟାନ୍ସକୁ ୫ ୱିକେଟରେ ପରାସ୍ତ କରିଛି। ଚଳିତ ସିଜିନର ବେଙ୍ଗାଲୁରୁର ପଞ୍ଚମ ବିଜୟ। ସାଇ ସୁଦର୍ଶନଙ୍କ ଶତକ ମଧ୍ୟ ଗୁଜରାଟକୁ ପରାଜୟରୁ ରକ୍ଷା କରି ପାରିନି । ଆରସିବି  ପାଇଁ ବିରାଟ କୋହଲି ଏବଂ ଦେବଦତ୍ତ ପାଡିକ୍କଲ ଦ୍ରୁତ ଅର୍ଦ୍ଧଶତକ ହାସଲ କରିଥିଲେ। କୋହଲି ୪୪ ବଲରେ ୮୧ ରନର ଏକ ଧମାକାଦାର ଇନିଂସ ଖେଳିଥିଲେ। ଏହି ଇନିଂସ ପରେ ବିରାଟଙ୍କ ଆଇପିଏଲ୍ ୨୦୨୬ ଅରେଞ୍ଜ କ୍ୟାପ୍ ନିଜ ପାଖକୁ ଆଣି ପାରିଛନ୍ତି । 

ବେଙ୍ଗାଲୁରୁର ଏମ୍ ଚିନ୍ନାସ୍ୱାମୀ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚରେ  ଗୁଜରାଟ ଟାଇଟାନ୍ସ ପ୍ରଥମେ ବ୍ୟାଟିଂ କରି ୨୦୫ ରନ୍ କରିଥିଲା। ଜବାବରେ, ଆରସିବି୭ ବଲ୍ ବାକି ଥାଇ ୫ ୱିକେଟରେ ମ୍ୟାଚ୍ ଜିତିଥିଲା। ଏହି ବିଜୟ ସହ ବେଙ୍ଗାଲୁରୁକୁ ପଏଣ୍ଟ ଟେବୁଲରେ ଦ୍ୱିତୀୟ ସ୍ଥାନକୁ ଉଠିଛି ।

ବେଙ୍ଗାଲୁରୁ ବଡ଼ ଟାର୍ଗେଟ ପିଛା କରିବା ସମୟରେ ଚଳିତ ସିଜିନରେ ନିଜର ପ୍ରଥମ ମ୍ୟାଚ୍ ଖେଳୁଥିବା  ଜାକବ୍ ବେଥେଲ୍ ୧୦ ବଲରେ ୧୪ ରନ୍ କରିଥିଲେ। ତା’ପରେ ବିରାଟ କୋହଲି ଏବଂ ଦେବଦତ୍ତ ପାଡିକ୍କଲ୍ ୫୯ ବଲରେ ୧୧୫ ରନର ପାର୍ଟନରସିପ୍ କରିଥିଲେ। ପାଡିକ୍କଲ୍ ମାତ୍ର ୨୦ ବଲରେ ତାଙ୍କର ଅର୍ଦ୍ଧଶତକ ପୂରଣ କରିଥିଲେ। ସେ ମ୍ୟାଚରେ ୨୭ ବଲରେ ୫୫ ରନ୍ କରିଥିଲେ। କୋହଲି ମଧ୍ୟ ବିସ୍ଫୋରକ ବ୍ୟାଟିଂ କରି ୪୪ ବଲରେ ୮୧ ରନ୍ କରିଥିଲେ।

ଏକଦା ବେଙ୍ଗାଲୁରୁ ମାତ୍ର ଗୋଟିଏ ୱିକେଟ୍ ହରାଇ ୧୪୧ ରନ୍ କରିଥିଲା। ଦଳ ଏକ ସହଜ ବିଜୟ ଆଡ଼କୁ ଅଗ୍ରସର ହେଉଥିଲା। ତଥାପି, ବେଙ୍ଗାଲୁରୁ ମାତ୍ର ୧୬ ବଲରେ ଚାରିଟି ୱିକେଟ୍ ହରାଇଥିଲା। କିନ୍ତୁ କୃଣାଲ୍ ପାଣ୍ଡ୍ୟା ଏବଂ ଟିମ୍ ଡେଭିଡ୍ ଦାୟିତ୍ୱପୂର୍ଣ୍ଣ ଇନିଂସ ଖେଳିଥିଲେ ଏବଂ ଆରସିବିର ବିଜୟ ସୁନିଶ୍ଚିତ କରିଥିଲେ। ପାଣ୍ଡ୍ୟା ୧୨ ବଲରେ ୨୩ ରନ୍ କରିଥିବା ବେଳେ ଟିମ୍ ଡେଭିଡ ୧୦ ରନ୍ କରି ଅପରାଜିତ ରହିଥିଲେ।