ହାଇଦ୍ରାବାଦ: ସନରାଇଜର୍ସ ହାଇଦ୍ରାବାଦ ଆଇପିଏଲ ୨୦୨୬ର ୩୧ ତମ ମ୍ୟାଚରେ ଦିଲ୍ଲୀ କ୍ୟାପିଟାଲ୍ସକୁ ୪୭ ରନରେ ପରାସ୍ତ କରିଛି। ପ୍ରଥମେ ବ୍ୟାଟିଂ କରି ହାଇଦ୍ରାବାଦ ଅଭିଷେକ ଶର୍ମାଙ୍କ ଦ୍ରୁତ ୧୩୫ ରନର ଶତକୀୟ ଇନିଂସ ବଳରେ ୨୦ ଓଭରରେ ୨ ୱିକେଟ ହରାଇ ୨୪୨ ରନର ବିଶାଳ ସ୍କୋର କରିଥିଲା। ଜବାବରେ ଦିଲ୍ଲୀ ଏକଦା ୯.୧ ଓଭରରେ ୧୦୦ ରନରେ ପହଞ୍ଚିଥିଲା। କିନ୍ତୁ, ପରେ ଶୀଘ୍ର ୱିକେଟ ହରାଇ ୪୭ ରନରେ ପରାଜୟ ବରଣ କରିଛି । ଘରୋଇ ମାଟିରେ ଏହା ହାଇଦ୍ରାବାଦର କ୍ରମାଗତ ତୃତୀୟ ବିଜୟ ଥିଲା। ବିଜୟ ସହ ପଏଣ୍ଟ ଟେବୁଲର ତୃତୀୟକୁ ଉଠିଛି ହାଇଦ୍ରାବାଦ । ଦିଲ୍ଲୀ ନିଜର ଷଷ୍ଠ ମ୍ୟାଚରୁ ତୃତୀୟ ପରାଜୟ ଭୋଗିଛି।

୨୪୩ ରନର ବିଜୟ ଲକ୍ଷ୍ୟ ପିଛା କରିବା ସମୟରେ ଦିଲ୍ଲୀର ଆରମ୍ଭ ଖରାପ ଥିଲା। ଦଳ ମାତ୍ର ୨୧ ରନରେ ପ୍ରଥମ ୱିକେଟ୍ ପାଥୁମ୍ ନିସାଙ୍କା (୦୮) ହରାଇଥିଲା। ନୀତିଶ ରାଣା ଏବଂ କେଏଲ ରାହୁଲ ଦ୍ୱିତୀୟ ୱିକେଟ୍ ପାଇଁ ୪୫ ବଲରେ ୮୬ ରନ୍ ଯୋଡ଼ିଥିଲେ । ତେବେ ୧୦୭ ରନରେ ଦିଲ୍ଲୀ ଲଗାତାର ୩ ୱିକେଟ୍ ହରାଇବା ଦଳକୁ ମ୍ୟାଚରେ ବ୍ୟାକଫୁଟକୁ ଠେଲି ଦେଇଥିଲା । ରାହୁଲ ୧୦୭ ରନ ସ୍କୋରରେ ଆଉଟ୍ ହୋଇଥିଲେ। ଦିଲ୍ଲୀ ୧୦୭ ରନରେ  ଦ୍ୱିତୀୟ, ତୃତୀୟ ଏବଂ ଚତୁର୍ଥ ୱିକେଟ୍ ହରାଇଥିଲା।

ରାହୁଲ ୨୩ ବଲରେ ୧ ଚୌକା ଏବଂ ୩ ଛକା ସହିତ ୩୭ ରନ୍ କରିଥିଲେ। ରାହୁଲଙ୍କ ପରେ ନୀତିଶ ରାଣା ୩୦ ବଲରେ ୭ ଚୌକା ଏବଂ ୩ ଛକା ସହିତ ୫୭ ରନ୍ କରିବା ପରେ ପ୍ୟାଭିଲିୟନ୍ ଫେରିଥିଲେ। ଏହାପରେ ଚତୁର୍ଥ ୱିକେଟ୍ ଡେଭିଡ୍ ମିଲରଙ୍କ ରୂପରେ ପଡ଼ିଥିଲା, ଯିଏ ଗୋଲ୍ଡେନ ଡକର ଶିକାର ହୋଇଥିଲେ । 

ଚାରିଟି ୱିକେଟ ହରାଇବା ପରେ ଟ୍ରିଷ୍ଟନ ଷ୍ଟବସ୍ ଏବଂ ସମୀର ରିଜଭି ପଞ୍ଚମ ୱିକେଟ ପାଇଁ ୩୩ ବଲରେ ୫୯ ରନ୍ ଯୋଡ଼ିଥିଲେ। ତଥାପି, ଉଭୟ ବ୍ୟାଟରଙ୍କ ଭାଗୀଦାରୀ ଦିଲ୍ଲୀ ପାଇଁ ବିଜୟର ବ୍ୟବଧାନକୁ କେବଳ ହ୍ରାସ କରିଥିଲା, କିନ୍ତୁ ବିଜୟ ସୁନିଶ୍ଚିତ କରିପାରି ନଥିଲା। ଷ୍ଟବସ୍ ୧୬୬ ର ରେ ଆଉଟ୍ ହେବା ସହିତ ଏହି ଭାଗୀଦାରୀ ଶେଷ ହୋଇଥିଲା। ଷ୍ଟବସ୍ ୧୬ ବଲରେ ୨୭ ରନ୍ କରିଥିଲେ, ଯେଉଁଥିରେ ତିନୋଟି ଚୌକା ଏବଂ ଗୋଟିଏ ଛକା ଥିଲା।

ଏହିଠାରୁ, ଦଳର ୱିକେଟ ପତନ ଆରମ୍ଭ ହୋଇଥିଲା। ଷଷ୍ଠ ୱିକେଟ ୧୮୬ ରନରେ, ସପ୍ତମ ୱିକେଟ ୧୯୨ ରନରେ, ଅଷ୍ଟମ ୱିକେଟ ୧୯୫ ରନରେ ଏବଂ ନବମ ୱିକେଟ ୧୯୫ ରନରେ ପତନ ହୋଇଥିଲା। ଦଳ ୨୦ ଓଭରରେ ନଅ ୱିକେଟ ହରାଇ କେବଳ ୧୯୫ ରନରେ ପହଞ୍ଚିପାରିଲା। ହାଇଦ୍ରାବାଦ ପାଇଁ ମାଲିଙ୍ଗା ଚାରିଟି ଏବଂ ହର୍ଷ ଦୁବେ ତିନୋଟି ୱିକେଟ ନେଇ ଗୁରୁତ୍ୱପୂର୍ଣ୍ଣ ଅବଦାନ ଦେଇଥିଲେ।