ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳରେ ଚୋରି ସନ୍ଦେହକୁ କେନ୍ଦ୍ର କରି ଜଣେ ଯୁବକଙ୍କ ମୃତ୍ୟୁ ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ଏହି ଘଟଣାରେ ପୋଲିସ ୨ ଜଣଙ୍କୁ ଗିରଫ କରିଥିବା ବେଳେ ମାମଲାର ତଦନ୍ତକୁ ଜୋରଦାର କରିଛି।

ମୃତ ଯୁବକ ହେଲେ ବାଣପୁର ଥାନା ଅଧୀନ ଭୀମପୁର ଗାଁର ୩୨ ବର୍ଷୀୟ ତୋଫାନ ନାୟକ। ସୂଚନା ଅନୁସାରେ, ଜୁନ୍ ୨୮ ତାରିଖରେ ଖଣାଟ ଗାଁରେ ତାଙ୍କୁ ଚୋରି ସନ୍ଦେହରେ କିଛି ଲୋକ ଆକ୍ରମଣ କରିଥିଲେ। ଗୁରୁତର ଆହତ ହେବା ପରେ ତାଙ୍କର ମୃତ୍ୟୁ ଘଟିଥିଲା।

ଘଟଣା ପରେ ମୃତକଙ୍କ ପତ୍ନୀ ସସ୍ମିତା ନାୟକଙ୍କ ଅଭିଯୋଗ ଆଧାରରେ ଜୁନ୍ ୨୯ ତାରିଖରେ ବାଣପୁର ଥାନାରେ ମାମଲା ରୁଜୁ ହୋଇଥିଲା। ପୋଲିସ ଭାରତୀୟ ନ୍ୟାୟ ସଂହିତା (BNS)ର ବିଭିନ୍ନ ଧାରା ସହ ଏସସି/ଏସଟି ଅତ୍ୟାଚାର ନିବାରଣ ଆଇନରେ ମାମଲା ରୁଜୁ କରିଛି।

ଏହି ଘଟଣାରେ ଖଣାଟ ଗାଁର ପବିତ୍ର ରାଉତ (୫୧) ଓ ଶରତ କୁମାର ସ୍ୱାଇଁ (୬୦)ଙ୍କୁ ପୋଲିସ ଗିରଫ କରିଛି। ଉଭୟଙ୍କୁ ପଚରାଉଚରା କରାଯାଉଥିବା ବେଳେ ଘଟଣାରେ ଆଉ କିଏ କିଏ ସମ୍ପୃକ୍ତ ଥିଲେ, ସେନେଇ ମଧ୍ୟ ତଦନ୍ତ ଚାଲିଛି।

ବାଣପୁର ଥାନା ଆଇଆଇସି ଜୟପ୍ରକାଶ ପରିଡାଙ୍କ କହିବା ଅନୁସାରେ, ୧୧୨ ହେଲ୍ପଲାଇନ୍‌ରେ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ତୋଫାନଙ୍କୁ ଗୁରୁତର ଆହତ ଅବସ୍ଥାରେ ପାଇଥିଲା। ତାଙ୍କୁ ହସ୍ପିଟାଲକୁ ନେବାକୁ ଚେଷ୍ଟା କରାଯାଇଥିଲେ ମଧ୍ୟ ସେ ମନା କରିଥିବା ପୋଲିସ କହିଛି।

ଅନ୍ୟପଟେ ମୃତକଙ୍କ ପରିବାର ଚୋରି ଅଭିଯୋଗକୁ ସମ୍ପୂର୍ଣ୍ଣ ଖଣ୍ଡନ କରିଛନ୍ତି। ତୋଫାନଙ୍କର କୌଣସି ଅପରାଧିକ ରେକର୍ଡ ନଥିବା ସେମାନେ କହିବା ସହ ଜାତିଗତ ବିଦ୍ୱେଷରୁ ତାଙ୍କୁ ଆକ୍ରମଣ କରାଯାଇଥିବା ଅଭିଯୋଗ ଆଣିଛନ୍ତି। ସେମାନେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ପୋଲିସ ପକ୍ଷରୁ ସିସିଟିଭି ଫୁଟେଜ୍‌ ଯାଞ୍ଚ ସହ ଫରେନ୍ସିକ୍‌ ଟିମ୍‌ ମଧ୍ୟ ପ୍ରମାଣ ସଂଗ୍ରହ କରୁଛି। ମୃତଦେହକୁ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲକୁ ପଠାଯାଇଛି। ବ୍ୟବଚ୍ଛେଦ ରିପୋର୍ଟ ଓ ସିସିଟିଭି ଫୁଟେଜ୍‌ ଆଧାରରେ ଘଟଣାର ପ୍ରକୃତ ସତ୍ୟ ସାମ୍ନାକୁ ଆସିବ ବୋଲି ପୋଲିସ କହିଛି।