ଗଞ୍ଜାମ: ଗଞ୍ଜାମ ଜିଲ୍ଲା ପାଟପୁର ଥାନା ଅଧୀନ ପଳାଶପୁର ଗାଁରେ ଥିବା କାଳୀ ମନ୍ଦିରରୁ ଚୋରି ଅଭିଯୋଗ। ମଙ୍ଗଳବାର ବିଳମ୍ବିତ ରାତିରେ ଦୁର୍ବୃତ୍ତମାନେ ମନ୍ଦିରରେ ପଶି ମୁଖ୍ୟ ଦ୍ୱାରର ତାଲା ଭାଙ୍ଗିବା ସହ ଦାନ ହୁଣ୍ଡି ଭାଙ୍ଗି ଟଙ୍କା ଲୁଟି ନେଇଛନ୍ତି।

ବୁଧବାର ଭୋରୁ ମନ୍ଦିରର ପୂଜକ ପୂଜା ପାଇଁ ଆସିବା ପରେ ଘଟଣା ସାମ୍ନାକୁ ଆସିଥିଲା। ମନ୍ଦିରର ମୁଖ୍ୟ ଦ୍ୱାରର ତାଲା ଭଙ୍ଗା ଥିବା ଦେଖିବା ସହ ଭିତରେ ଥିବା ଦାନ ହୁଣ୍ଡି ମଧ୍ୟ ଭଙ୍ଗା ଯାଇଥିବା ସେ ଦେଖିଥିଲେ। ଏନେଇ ପୂଜକ ତୁରନ୍ତ ମନ୍ଦିର କମିଟିକୁ ଖବର ଦେଇଥିଲେ।

ସୂଚନା ପାଇ ମନ୍ଦିର କମିଟିର ସଦସ୍ୟମାନେ ଘଟଣାସ୍ଥଳରେ ପହଞ୍ଚି ଯାଞ୍ଚ କରିବା ପରେ ପାଟପୁର ପୋଲିସକୁ ଜଣାଇଥିଲେ। ପୋଲିସ ମନ୍ଦିରରେ ପହଞ୍ଚି ଘଟଣାସ୍ଥଳ ଯାଞ୍ଚ କରିବା ସହ ଚୋରି ଘଟଣାର ତଦନ୍ତ ଆରମ୍ଭ କରିଛି।

ତେବେ ହୁଣ୍ଡିରୁ ଠିକ୍ କେତେ ଟଙ୍କା ଚୋରି ହୋଇଛି, ତାହା ଏଯାଏଁ ସ୍ପଷ୍ଟ ହୋଇନାହିଁ। ପ୍ରାଥମିକ ତଦନ୍ତରୁ ଦୁର୍ବୃତ୍ତମାନେ ମୁଖ୍ୟ ଦ୍ୱାରର ତାଲା ଭାଙ୍ଗି ମନ୍ଦିର ଭିତରକୁ ପ୍ରବେଶ କରିବା ପରେ ହୁଣ୍ଡି ଭାଙ୍ଗି ଟଙ୍କା ନେଇ ଫେରାର ହୋଇଥିବା ପୋଲିସ ଅନୁମାନ କରୁଛି।

ଚୋରିରେ କେତେ ଜଣ ସମ୍ପୃକ୍ତ ଥିଲେ ଏବଂ କେତେ ଟଙ୍କା ଲୁଟ୍ ହୋଇଛି, ସେନେଇ ତଦନ୍ତ ଚାଲିଛି। ଦୁର୍ବୃତ୍ତମାନଙ୍କୁ ଧରିବା ପାଇଁ ପାଟପୁର ପୋଲିସ ବିଭିନ୍ନ ଦିଗରୁ ଖୋଳତାଡ଼ ଜାରି ରଖିଛି।