ପୁରୀ: ଶ୍ରୀକ୍ଷେତ୍ର ପୁରୀର ବିକାଶ କାର୍ଯ୍ୟକୁ ଆହୁରି ତ୍ୱରାନ୍ୱିତ କରିବାକୁ ରାଜ୍ୟ ସରକାର ନେଇଛନ୍ତି ବଡ଼ ପଦକ୍ଷେପ। ପୁରୀରେ ଚାଲିଥିବା ବିଭିନ୍ନ ବିକାଶମୂଳକ କାର୍ଯ୍ୟ ପାଇଁ ଅତିରିକ୍ତ ୧୦୦ କୋଟି ଟଙ୍କା ମଞ୍ଜୁର କରିଛନ୍ତି ସରକାର। ଅଧାପନ୍ତରିଆ ପ୍ରକଳ୍ପଗୁଡ଼ିକୁ ଶେଷ କରିବା ସହ ଭକ୍ତ ଓ ପର୍ଯ୍ୟଟକଙ୍କ ପାଇଁ ଅଧିକ ସୁବିଧା ସୃଷ୍ଟି କରିବା ଉପରେ ଦିଆଯିବ ଗୁରୁତ୍ୱ। ଶୁକ୍ରବାର ଏନେଇ ସୂଚନା ଦେଇଛନ୍ତି ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ।

ଅବଢ଼ା ଯୋଜନାକୁ ମିଳିବ ଅତିରିକ୍ତ ଅନୁଦାନ

ମନ୍ତ୍ରୀଙ୍କ ସୂଚନା ଅନୁସାରେ, ପୂର୍ବରୁ ଅବଢ଼ା ଯୋଜନା ସମେତ ବିଭିନ୍ନ ପ୍ରକଳ୍ପ ପାଇଁ EFC ପ୍ରସ୍ତାବ ପ୍ରସ୍ତୁତ ହୋଇଥିଲା। କିନ୍ତୁ ଏହି କାର୍ଯ୍ୟଗୁଡ଼ିକ ପାଇଁ ଉପଲବ୍ଧ ଅର୍ଥ କମି ଆସୁଥିବାରୁ ଅତିରିକ୍ତ ୧୦୦ କୋଟି ଟଙ୍କା ଦେବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିର୍ଦ୍ଦେଶ ଦେଇଛନ୍ତି। ଏହାଦ୍ୱାରା ଚାଲୁ ରହିଥିବା ବିକାଶ କାର୍ଯ୍ୟଗୁଡ଼ିକ ଆଗକୁ ବଢ଼ିପାରିବ।

ଜଗନ୍ନାଥ ବଲ୍ଲଭ ପାର୍କିଂ ପ୍ରକଳ୍ପ ଉପରେ ଫୋକସ୍

ଶ୍ରୀମନ୍ଦିର ନିକଟରେ ଥିବା ଜଗନ୍ନାଥ ବଲ୍ଲଭ ପାର୍କିଂ ଅଞ୍ଚଳର ଅସମ୍ପୂର୍ଣ୍ଣ କାର୍ଯ୍ୟ ସମେତ ଅନ୍ୟାନ୍ୟ ଚାଲୁ ପ୍ରକଳ୍ପରେ ଏହି ଅର୍ଥ ବ୍ୟବହାର ହେବାର ସମ୍ଭାବନା ରହିଛି। ଏଥିସହ ଶ୍ରୀମନ୍ଦିର ସହ ଜଡ଼ିତ ଅନ୍ୟାନ୍ୟ ବିକାଶମୂଳକ ପ୍ରକଳ୍ପ ହାତକୁ ନେବାକୁ ମଧ୍ୟ ଯୋଜନା ରହିଛି।

ଆସିବ ନୂଆ ଯୋଜନା, ୨୦୨୯ ସୁଦ୍ଧା ବିକାଶ ଲକ୍ଷ୍ୟ

ଅବଢ଼ା ଯୋଜନା ସହ ଆଗାମୀ ଦିନରେ ପୁରୀର ବିକାଶ ପାଇଁ ଆଉ ଏକ ନୂଆ ଯୋଜନା ଆଣିବାକୁ ସରକାର ପ୍ରସ୍ତୁତି କରୁଛନ୍ତି। ଏଥିପାଇଁ ଆଉ ଏକ EFC ପ୍ରସ୍ତାବ ପ୍ରସ୍ତୁତ କରାଯିବ। ଭକ୍ତଙ୍କ ଦର୍ଶନ ବ୍ୟବସ୍ଥାକୁ ସହଜ କରିବା, ପର୍ଯ୍ୟଟକଙ୍କ ପାଇଁ ସୁବିଧା ବଢ଼ାଇବା ଏବଂ ଜଗନ୍ନାଥ ସଂସ୍କୃତିର ପ୍ରଚାରପ୍ରସାର ଏହି ଯୋଜନାର ମୁଖ୍ୟ ଲକ୍ଷ୍ୟ ରହିବ।

୨୦୨୯ ସୁଦ୍ଧା ପୁରୀର ବିକାଶମୂଳକ କାର୍ଯ୍ୟ ଜାରି ରଖିବା ସହ ନିର୍ଦ୍ଧାରିତ ସମୟ ମଧ୍ୟରେ ୯୦ ପ୍ରତିଶତ କାମ ଶେଷ କରିବାକୁ ସରକାର ଲକ୍ଷ୍ୟ ରଖିଥିବା ସୂଚନା ମିଳିଛି।