ଭୁବନେଶ୍ୱର: ୱକଫ୍ ସଂଶୋଧନ ବିଲ୍ କୁ ନେଇ ଏବେ ବିଜୁ ଜନତା ଦଳ ଉଠୁଛି ପଡ଼ୁଛି । ଦଳୀୟ ସାଂସଦ ସସ୍ମିତ ପାତ୍ରଙ୍କ ଗୋଟିଏ ନିଷ୍ପତ୍ତି ତାଙ୍କ ପାଇଁ ଅଡ଼ୁଆ ପରିସ୍ଥିତି ସୃଷ୍ଟି କରିଛି । ଦଳର ବହୁ ବରିଷ୍ଠ ନେତାମାନେ ସୁପ୍ରିମୋ ନବୀନ ପଟ୍ଟନାୟକ ପ୍ରଶ୍ନ ପଚାରିବା ଆରମ୍ଭ କରିଦେଲେଣି । ସେପଟେ କଂଗ୍ରେସ ମଧ୍ୟ ଟିକେ ଟିକେ କରି ଘିଅ ଢାଳିବାରେ ବ୍ୟସ୍ତ । ସସ୍ମିତ ଏବଂ ଦଳର ଆଭିମୁଖ୍ୟକୁ ନେଇ ତମାମ ପ୍ରଶ୍ନବାଚୀ ସୃଷ୍ଟି ହୋଇଥିବାବେଳେ ସସ୍ମିତଙ୍କ ବିରୋଧରେ ଦଳର ଆଉ ଜଣେ ବରିଷ୍ଠ ନେତା ମୁହଁ ଖୋଲିଛନ୍ତି । ପୂର୍ବତନ ମନ୍ତ୍ରୀ ପ୍ରତାପ ଜେନା ସସ୍ମିତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଜେଡ଼ି ସଭାପତିଙ୍କୁ ଚିଠି ଲେଖିଥିବା ଜଣାପଡ଼ିଛି । 

ପ୍ରତାପ ଜେନା ତାଙ୍କ ଚିଠିରେ କହିଛନ୍ତି ଯେ ବିଜେଡ଼ି ସର୍ବଦା ମୁସଲମାନ ସଂଖ୍ୟା ଲଘୁ ସମ୍ପ୍ରଦାୟଙ୍କ ସ୍ୱାର୍ଥ ପାଇଁ କାର୍ଯ୍ୟ କରି ଆସୁଛି । ମୁସଲମାନଙ୍କ ସାମିଜିକ ଏବଂ ଅର୍ଥନେତିକ ବିକାଶ ଦିଗରେ ଦଳ ପ୍ରୟାସ କରିଆସିଛି ଆଗକୁ ମଧ୍ୟ ଏହା ବଜାୟ ରଖିବ ବୋଲି ସେ ଆଶାବ୍ୟକ୍ତ କରିଛନ୍ତି । କିନ୍ତୁ ସାଂସଦ ସସ୍ମିତ ପାତ୍ର ୱକଫ୍ ସଂଶୋଧନ ବିଲ୍ କୁ ନେଇ ଏକ୍ସରେ କରିଥିବା ଏକ ପୋଷ୍ଟ ଦଳର ଆଭିମୁଖ୍ୟ ବିରୋଧୀ ଥିଲା । ବିଲକୁ ବିଜେଡ଼ି ବିରୋଧ କରିବ ବୋଲି ଆପଣ (ନବୀନ ପଟ୍ଟନାୟକ) ଆରମ୍ଭରୁ ମତ ସ୍ପଷ୍ଟ ଭାବେ ରଖିଥିଲେ । କିଭଳି ଆଉ କେଉଁ ପରିସ୍ଥିତିରେ ଶ୍ରୀ ପାତ୍ର ସୋସିଆଲ୍ ମିଡିଆରେ ଦଳ ବିରୋଧ ଆଭିମୁଖ୍ୟ ରଖିଲେ ତାହା ସଭିଙ୍କୁ ଆଶ୍ଚର୍ଯ୍ୟ କରିଛି ବୋଲି କହିଛନ୍ତି ଶ୍ରୀଯୁକ୍ତ ଜେନା । 

ଅଧିକ ପଢ଼ନ୍ତୁ: ରାଷ୍ଟ୍ରୀୟ ମର୍ଯ୍ୟାଦା ସହିତ ମନୋଜ କୁମାରଙ୍କ ଶେଷ କୃତ୍ୟ ସମ୍ପନ୍ନ

ଏହା ପଛରେ ଷଡ଼ଯନ୍ତ୍ରର ଗନ୍ଧ ବାରିଛନ୍ତି ପ୍ରତାପ ଜେନା । ଏହି ମାମଲାର ତର୍ଜମା ସହିତ ସମସ୍ତ ସାଂସଦଙ୍କୁ କାରଣ ଦର୍ଶାଅ ନୋଟିସ ଜାରି କରିବାକୁ ସେ ଚିଠି ଜରିଆରେ ଦାବି କରିଛନ୍ତି । ଘଟଣାକୁ ଗୁରୁତ୍ୱର ସହିତ ନେଇ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି ।