ମୁମ୍ବାଇ: ପଞ୍ଚଭୂତରେ ଲୀନ ହୋଇଛି ବଲିଉଡର ଦିଗ୍ଗଜ ଅଭିନେତା ମନୋଜ କୁମାରଙ୍କ ପାର୍ଥିବ ଶରୀର । ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହିତ ମୁମ୍ବାଇସ୍ଥିତ ଜୁହୁ ଶ୍ମଶାନରେ ଶନିବାର ତାଙ୍କର ଶେଷ କୃତ୍ୟ ହୋଇଛି । ତାଙ୍କର ପରିବାର ସଦସ୍ୟ ଭାରତ ବାହାରେ ରହୁଥିବାରୁ ଶୁକ୍ରବାର ବଦଳରେ ଶିନିବାର ତାଙ୍କର ଅନ୍ତେଷ୍ଟି କ୍ରିୟା ହୋଇଛି ।

ଆଜି ସକାଳେ ମୁମ୍ବାଇର କୋକିଲା ବେନ୍ ମେଡ଼ିକାଲରୁ ମନୋଜ କୁମାରଙ୍କ ପାର୍ଥିବ ଶରୀରକୁ ତାଙ୍କ ବାସଭବନକୁ ଅଣାଯାଇଥିଲା । ସେଠାରେ ହିନ୍ଦୀ ଚଳଚ୍ଚିତ୍ର ଦୁନିଆର ବହୁ ନାମୀଦାମୀ କଳାକାର ତାଙ୍କର ଅନ୍ତିମ ଦର୍ଶନ କରିଛନ୍ତି । ଏହା ପରେ ତାଙ୍କ ମରଶରୀରକୁ ଶ୍ମଶାନକୁ ନିଆଯାଇଥିଲା । ପୂର୍ବାହ୍ନ ପ୍ରାୟ ୧୧.୫୦ ମିନିଟରେ ସେଠାରେ ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହିତ ଅନ୍ତିମ ସଂସ୍କାର କରାଯାଇଛି । ଏହି ସମୟରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ବିଗ୍ ବି ଅମିତାଭ ବଚ୍ଚନ, ଅଭିଷେକ ବଚ୍ଚନ ଏବଂ ଅନେକ ଅଭିନେତା ଅଭିନେତ୍ରୀ ଉପସ୍ଥିତ ଥିଲେ ।  

ଏଠାରେ ଉଲ୍ଲେଖ ଯୋଗ୍ୟ, ମନୋଜ କୁମାର ଗୁରୁବାର ମୁମ୍ବାଇର କୋକିଲା ବେନ ମେଡ଼ିକାଲରେ ଶେଷ ନିଶ୍ୱାସ ତ୍ୟାଗ କରିଥିଲେ । ୧୯୩୭ ମସିହା ଜୁଲାଇ ୨୪ରେ ଜନ୍ମଗ୍ରହଣ କରିଥିଲେ । ତାଙ୍କର ପ୍ରକୃତ ନାମ ଥିଲା ହରିକୃଷ୍ଣ ଗିରି ଗୌସ୍ୱାମୀ । ଫିଲ୍ମ ଦୁନିଆକୁ ଆସିବାକୁ ସେ ନିଜର ନାମ ହରିକୃଷ୍ଣରୁ ମନୋଜ କୁମାରକୁ ପରିବର୍ତ୍ତନ କରିଥିଲେ । ମନୋଜ ଏକା ଧାରାରେ ଜଣେ ଅଭିନେତା, ନିର୍ଦ୍ଦେଶକ, ସ୍କ୍ରିନ୍ ରାଇଟର୍ ଏବଂ ଏଡିଟର୍ ମଧ୍ୟ ଥିଲେ । ମନୋଜ ଅନେକ ଚଳଚ୍ଚିତ୍ର ଅଭିନୟ କରିବା ସହିତ ନିର୍ଦ୍ଦେଶନା ମଧ୍ୟ ଦେଇଛନ୍ତି । ମନୋଜ ୧୯୫୭ ମସିହାରେ ଫିଲ୍ମ ‘ଫ୍ୟାଶନ୍’ ମାଧ୍ୟମରେ ତାଙ୍କର ଅଭିନୟ ଜୀବନ ଆରମ୍ଭ କରିଥିଲେ । ୧୯୬୫ ଶହୀଦ ଚଳଚ୍ଚିତ୍ର ତାଙ୍କ କ୍ୟାରିଅରର ମୋଡ଼ ବଦଳାଇ ଦେଇଥିଲା । ଏଥିରେ ସେ ବଡ଼ ସଫଳତା ହାସଲ କରିଥିଲେ । ଦେଶାତ୍ମବୋଧକ ଚଳଚ୍ଚିତ୍ର ପାଇଁ ସେ ବେଶ ଖ୍ୟାତି ଅର୍ଜନ କରିଥିଲେ । ଶହିଦ୍, ଉପକାର, ପୂରବ ଅର୍ ପଶ୍ଚିମ୍ ଏବଂ ରୋଟି କପଡା ଅର୍ ମକାନ୍ ଭଳି ଦେଶ ପ୍ରେମ ଚଳଚ୍ଚିତ୍ର ଲୋକଙ୍କ ମନ କିଣି ଥିଲା । ଦେଶପ୍ରେମୀ ଚଳଚ୍ଚିତ୍ର ବ୍ୟତୀତ ସେ ହରିୟାଲୀ ଅର୍ ରାସ୍ତା, ୱୋ କୌନ୍ ଥି, ହିମାଳୟ କି ଗୌଦ୍ ମେ, ଦୋ ବଦନ୍, ନୀଲ୍ କମଲ୍ ଏବଂ କ୍ରାନ୍ତି ଭଳି ଚଳଚ୍ଚିତ୍ର ଅଭିନୟ କରିଥିଲେ ଏବଂ ନିର୍ଦ୍ଦେଶନା ଦେଇଥିଲେ । 

ଭାରତୀୟ ସିନେମାରେ ଅବଦାନ ପାଇଁ ମନୋଜ କୁମାରଙ୍କୁ ୧୯୯୨ ମସିହାରେ ପଦ୍ମଶ୍ରୀ ଏବଂ ୨୦୧୫ ମସିହାରେ ଦାଦାସାହେବ ଫାଲକେ ପୁରସ୍କାରରେ ସମ୍ମାନିତ କରାଯାଇଥିଲା।