ନୂଆଦିଲ୍ଲୀ: ଅକ୍ଷୟ କୁମାରଙ୍କ ‘କେଶରୀ ଚାପ୍ଟର ୨’ ବର୍ଷର ବହୁ ପ୍ରତୀକ୍ଷିତ ଫିଲ୍ମ ମଧ୍ୟରୁ ଏକ । ଏହ ଫିଲ୍ମର ଟିଜର ପରେ ପ୍ରଶଂସକ ଏହାର ଟ୍ରେଲରକୁ ଅପେକ୍ଷା କରିଥିଲେ । ଶେଷରେ ନିର୍ମାତା କେଶରୀ ଚାପ୍ଟର ୨ର ଜବରଦସ୍ତ ଟ୍ରେଲର ରିଲିଜ ହୋଇଛି । ଯେଉଁଥିରେ ଜାଲିଆନାୱାଲା ବାଗର ଭୟଙ୍କର ଦୃଶ୍ୟ ଦେଖିବାକୁ ମିଳିଛି । 

କେଶରୀ ଚାପ୍ଟର ୨ର ଟ୍ରେଲର ୩ ଏପ୍ରିଲରେ ରିଲିଜ୍ ହୋଇଛି। ଏହା ଭାରତର ସବୁଠାରୁ ଗୁରୁତ୍ୱପୂର୍ଣ୍ଣ ଆଇନଗତ ଲଢ଼େଇ ମଧ୍ୟରୁ ଗୋଟିଏ । ସତ୍ୟ ଘଟଣା ଉପରେ ଆଧାରିତ  ଏହି ଚଳଚ୍ଚିତ୍ର ଜାଲିଆନାୱାଲା ବାଗ ହତ୍ୟାକାଣ୍ଡ ପରବର୍ତ୍ତୀ ଘଟଣାକୁ ନେଇ ଚିତ୍ରିତ । ଫିଲ୍ମଟି ଜଣେ ଆଇନଜୀବୀ ଏବଂ ଭାରତୀୟ ଜାତୀୟ କଂଗ୍ରେସର ପୂର୍ବତନ ସଭାପତି ସି ଶଙ୍କରନ ନାୟାରଙ୍କ ନେତୃତ୍ୱରେ ନ୍ୟାୟ ପାଇଁ ଲଢ଼େଇ ଉପରେ ଆଧାରିତ।

୧୯୧୯ ଏପ୍ରିଲ ୧୩ରେ ଜାଲିଆନାୱାଲା ବାଗରେ ହୋଇଥିବା ଗୁଳିକାଣ୍ଡର ଏକ ଝଲକରୁ ଟ୍ରେଲର ଆରମ୍ଭ ହୋଇଛି । ଫିଲ୍ମରେ ସାର୍ ସିଏସ ନାୟାର ଭୂମିକାରେ ଅଭିନୟ କରୁଥିବା ଅକ୍ଷୟ କୁମାରଙ୍କୁ ଦେଖିବାକୁ ମିଳିଛି। ସେ କୋର୍ଟରେ ଜେନେରାଲ ଡାୟାରଙ୍କୁ ପ୍ରଶ୍ନ କରୁଥିବା ଦେଖିବାକୁ ମିଳିଛି । କୋର୍ଟରେ ଠିଆ ହୋଇ ଅକ୍ଷୟ ଜେନେରାଲ ଡାୟରଙ୍କୁ ପ୍ରଶ୍ନ କରୁଛନ୍ତି ଯେ, ଜାଲିଆନାୱାଲା ବାଗରୁ ଭିଡ଼ ହଟାଇବା ପାଇଁ ତୁମେ କିପରି ଚେତାବନୀ ଦେଇଥିଲ? ତୁମେ ସେଠାରେ ଲୁହ ବୁହା ଗ୍ୟାସ ଫିଙ୍ଗିଥିଲ ନା ପବନରେ ଗୁଳି ଚଳାଇଥିଲ? ପ୍ରଶ୍ନର ଉତ୍ତର ଦେଇ ଜେନେରାଲ ଡାୟାର ସଂକ୍ଷିପ୍ତ ଉତ୍ତର ଦେଉଥିବା ଦେଖିବାକୁ ମିଳିଛି । ଏହାର ଜବାବରେ ଅକ୍ଷୟ କୁମାର କହିଛନ୍ତି  କୌଣସି ଚେତାବନୀ ନ ଦେଇ ଭିଡ଼ ଉପରେ ଗୁଳି ଚଳାଇଲ। ଏହା ଶୁଣି ଜେନେରାଲ ଡାୟାର ସେମାନେ  ଭିଡ଼ ନୁହେଁ ବରଂ ଆତଙ୍କବାଦୀ ଥିଲେ ବୋଲି କହୁଥିବା ଟ୍ରେଲରେ ଦେଖିବାକୁ ମିଳିଛି ।

ଟ୍ରେଲରରେ  ଆର ମାଧବନଙ୍କୁ ବିରୋଧୀ ଓକିଲ ଭାବରେ ଦର୍ଶାଯାଇଛି ଯିଏ କୋର୍ଟରେ କ୍ରାଉନଙ୍କ ପକ୍ଷରୁ କେସ୍ ଲଢୁଛନ୍ତି। ଅନନ୍ୟା ପାଣ୍ଡେଙ୍କୁ ସେହି ସମୟରେ ଆଇନ ପାଠପଢ଼ାରେ ନାମ ଲେଖାଇଥିବା ପ୍ରଥମ ମହିଳା ଭାବରେ ମଧ୍ୟ ଦର୍ଶାଯାଇଛି । ଇଂରେଜ ଅମଳରେ ଓକିଲାତିକୁ ପୁରୁଷଙ୍କ ଚାକିରି ବୋଲି ବିବେଚନା କରାଯାଉଥିଲା। ସାମଗ୍ରିକ ଭାବରେ, ଟ୍ରେଲର ବହୁତ ଜବରଦସ୍ତ ରହିଛି । ଫିଲ୍ମକୁ ନେଇ ପ୍ରଶଂସକଙ୍କ ଉତ୍ସାହ ଦ୍ୱିଗୁଣିତ ହୋଇଛି ।