ଭୁବନେଶ୍ୱର: ଯାତ୍ରା ଦୁନିଆର ହାସ୍ୟ ଅଭିନେତା ନରେନ୍ଦ୍ର ପଣ୍ଡା ଓରଫ୍ ନରି ପଣ୍ଡାଙ୍କୁ ବୟକଟ୍ କରାଯାଇଛି । ଯାତ୍ରା ମାଲିକଙ୍କୁ ଅଶାଳୀନ ଭାଷାରେ ମନ୍ତବ୍ୟ ଦେବାକୁ ନେଇ ମାଲିକ ସଂଘ ଆଗାମୀ ଏକ ବର୍ଷ ଅର୍ଥାତ ୨୦୨୫-୨୬ ବର୍ଷ ପାଇଁ ବୟକଟ୍ କରାଯାଇଛି । ପରବର୍ତ୍ତୀ ଆଲୋଚନାରେ ତାଙ୍କୁ ଅନିର୍ଦ୍ଦିଷ୍ଟ କାଳ ପାଇଁ ବ୍ୟାନ୍ କରାଯିବ ବୋଲି ଯାତ୍ରା ମାଲିକ ସଂଘର ସଭାପତି ଭାରତ ଭୂଷଣ ଦେଓ ଏହି ସୂଚନା ଦେଇଛନ୍ତି । ଆଜି ଭୁବନେଶ୍ୱର ଖଣ୍ଡଗିରି ମାଲିକ ସଂଘ ପକ୍ଷରୁ ବସିଥିବା ବୈଠକରେ ଏହି ନିଷ୍ପତ୍ତି ନିଆଯାଇଛି । 

ଗତ କିଛି ଦିନ ତଳେ ନରି ପଣ୍ଡା ତୁଳସୀ ଗଣନାଟ୍ୟର ମାଲିକ ଅନନ୍ତ ନାରାୟଣ ଧଳଙ୍କ ନାଁରେ ସଙ୍ଗୀନ ଅଭିଯୋଗ ଆଣିଥିଲେ । ତୁଳସୀ ଗଣନାଟ୍ୟର ମାଲିକ ତାଙ୍କୁ ଏକ ବନ୍ଦ ଘର ଭିତରେ ମାଡ଼ ମାରିଥିବା ସେ କରିଥିଲେ ଅଭିଯୋଗ । ଏହା ପରେ ଯାତ୍ରା ମାଲିକ ସଂଘ ପକ୍ଷରୁ ନରିଙ୍କୁ ବ୍ୟାନ୍ କରାଯାଇଛି । 

ସେ ପୂର୍ବରୁ ସ୍ୱପ୍ନ ମହଲରେ ଥିଲେ । ଏହା ପରେ ତୁଳସୀ ଗଣନାଟ୍ୟରେ ଅଭିନୟ କରିବାକୁ ସେ ଅଗ୍ରୀମ ୧୦ ଲକ୍ଷ ଟଙ୍କା ନେଇଥିଲେ । ପରବର୍ତ୍ତୀ ସମୟରେ ସେ ଅଗ୍ରୀମ ଟଙ୍କାଙ୍କୁ ଫେରାଇବାକୁ ଯାଇଥିବାବେଳେ ତାଙ୍କୁ ମାଡ଼ ମରାଯାଇଥିବା ସେ କହିଥିଲେ । ଏହା ପରେ ନରି ବିଭିନ୍ନ ଗଣମାଧ୍ୟମରେ ପ୍ରତିକ୍ରିୟା ମଧ୍ୟ ଦେଇଥିଲେ । ନରି ପଣ୍ଡା ଦୀର୍ଘ ୩୦ ବର୍ଷ ହେଲା ଯାତ୍ରାରେ କାମ କରୁଛନ୍ତି । ତାଙ୍କର କମେଡ଼ି ଚରିତ୍ର ସମସ୍ତଙ୍କୁ ବେଶ ପସନ୍ଦ ଆସେ ।