ଭୁବନେଶ୍ୱର: ରାଜ୍ୟର ସ୍କୁଲଗୁଡ଼ିକ ଖୋଲିଯାଇଛି, ପିଲାମାନେ ନୂଆ ଶିକ୍ଷାବର୍ଷକୁ ସ୍ୱାଗତ କରିଛନ୍ତି। କିନ୍ତୁ ଏଥର ପାଠ୍ୟପୁସ୍ତକକୁ ନେଇ ଉଠିଛି ବଡ଼ ପ୍ରଶ୍ନ। ବହିରେ ରହିଥିବା ବିଭିନ୍ନ ତ୍ରୁଟି ଯୋଗୁଁ ଛାତ୍ରଛାତ୍ରୀଙ୍କ ପଢ଼ାଶୁଣା ଉପରେ ପ୍ରଭାବ ପଡ଼ିବା ଆଶଙ୍କା ଦେଖାଦେଇଥିବାବେଳେ, ଏନେଇ ସ୍ପଷ୍ଟୀକରଣ ଦେଇଛି SCERT।

SCERT ନିର୍ଦ୍ଦେଶିକା ମଧୁସ୍ମିତା ସାହୁ କହିଛନ୍ତି, ଚଳିତ ବର୍ଷ ପାଇଁ ନୂଆ ବହି ଛପା ହେବ ନାହିଁ। ବର୍ତ୍ତମାନ ଛପା ହୋଇଥିବା ବହିରେ ଯେଉଁ ତ୍ରୁଟି ଚିହ୍ନଟ ହୋଇଛି, ସେଗୁଡ଼ିକୁ ସଂଶୋଧନ କରି ଏକ ବିଶେଷ ‘ସଂଶୋଧନ ପୁସ୍ତିକା’ ପ୍ରସ୍ତୁତ କରାଯାଇ ସମସ୍ତ ଜିଲ୍ଲା ଶିକ୍ଷା ଅଧିକାରୀ (DEO)ଙ୍କୁ ପଠାଯାଇଛି। ଶିକ୍ଷକମାନଙ୍କୁ ମଧ୍ୟ ଏନେଇ ଅବଗତ କରାଯାଇଛି।

ଛୋଟ କ୍ଲାସର ପିଲାମାନଙ୍କ କ୍ଷେତ୍ରରେ ଶିକ୍ଷକମାନେ ଶ୍ରେଣୀଗୃହରେ ସିଧାସଳଖ ଭାବେ ଭୁଲ ସଂଶୋଧନ କରି ପଢ଼ାଇବେ। ବଡ଼ କ୍ଲାସର ଛାତ୍ରଛାତ୍ରୀମାନେ ନିଜେ ଶିକ୍ଷକଙ୍କ ସହାୟତାରେ ବହିରେ ତ୍ରୁଟି ସୁଧାରି ପାଠ ପଢ଼ିବେ। ବିଭାଗର କହିବା ଅନୁଯାୟୀ, ଏହା ଛାତ୍ରଛାତ୍ରୀଙ୍କ ତଥ୍ୟ ଯାଞ୍ଚ କରିବାର ଦକ୍ଷତା ଓ ବୁଦ୍ଧିଗତ ବିକାଶକୁ ମଧ୍ୟ ସହାୟତା କରିବ।

ତେବେ ପାଠ୍ୟପୁସ୍ତକରେ ଏତେ ବଡ଼ ଧରଣର ତ୍ରୁଟି କିପରି ହେଲା, ତାହାକୁ ନେଇ ରାଜ୍ୟ ସରକାର ଗୁରୁତ୍ୱ ସହ ନେଇଛନ୍ତି। ମୁଖ୍ୟମନ୍ତ୍ରୀ ନିଜେ ପାଠ୍ୟବହି ମଗାଇ ସମୀକ୍ଷା କରିଥିବାବେଳେ ଘଟଣାର ତଦନ୍ତ ପାଇଁ ୩ ଜଣିଆ ଉଚ୍ଚସ୍ତରୀୟ କମିଟି ଗଠନ କରାଯାଇଛି। ରିପୋର୍ଟ ଆସିବା ପରେ ଦାୟୀ ଅଧିକାରୀ ଓ ସଂସ୍ଥା ବିରୋଧରେ କଠୋର ପଦକ୍ଷେପ ନିଆଯିବ ବୋଲି ସଙ୍କେତ ମିଳିଛି।

SCERT ପକ୍ଷରୁ ଆଶ୍ୱାସନ ଦିଆଯାଇଛି ଯେ ୨୦୨୭-୨୮ ଶିକ୍ଷାବର୍ଷରୁ ସମ୍ପୂର୍ଣ୍ଣ ସଂଶୋଧିତ ଓ ତ୍ରୁଟିମୁକ୍ତ ପାଠ୍ୟପୁସ୍ତକ ପ୍ରକାଶ ପାଇବ। ସେପର୍ଯ୍ୟନ୍ତ ପିଲାଙ୍କ ପାଠ ଚାଲିବ ପୁରୁଣା ବହି ଓ ସଂଶୋଧନ ପୁସ୍ତିକାର ସହାୟତାରେ। ଏବେ ଦେଖିବାକୁ ବାକି, ଏହି ବ୍ୟବସ୍ଥା ଶିକ୍ଷାର ଗୁଣବତ୍ତାକୁ କେତେ ଦୂର ସୁରକ୍ଷିତ ରଖିପାରୁଛି।