ପୁରୀ ସମୁଦ୍ରରେ ସ୍ନାନ କରିବା ସମୟରେ ଭାସିଗଲେ ପର୍ଯ୍ୟଟକ। ପୁରୀର ସ୍ୱର୍ଗଦ୍ୱାର ସମୁଦ୍ର ବେଳାଭୂମି ସେକ୍ଟର ୧୦ ଅଞ୍ଚଳରେ ସୋମବାର ସକାଳେ ଗାଧୋଇବା ସମୟରେ ଏକ ବଡ଼ ଲହରୀରେ ପାଞ୍ଚ ଜଣ ପର୍ଯ୍ୟଟକ ଭାସିଯିବାରୁ ଅଳ୍ପକେ ବର୍ତ୍ତି ଯାଇଛନ୍ତି। ପର୍ଯ୍ୟଟକଙ୍କ ମଧ୍ୟରେ ରହିଛନ୍ତି ଛତିଶଗଡର ସ୍ୱାତୀ କାନୋଜୀ, ଭାବନା କାନୋଜୀ, ଶିଖା କାନୋଜିତ୍ ଏବଂ ଖଗେଶ୍ୱର କାନୋଜୀ ଏବଂ ମହାରାଷ୍ଟ୍ରର କୃଷ୍ଣ କାନୋଜୀ ରହିଛନ୍ତି। 

ଗାଧୋଉଥିବାବେଳେ ସମୁଦ୍ରର ଉଚ୍ଚ ଲହଡ଼ିରେ ମାଡ଼ ହୋଇ ବୁଡି ଯାଇଥିଲେ।ଭାସିଯିବା ସମୟରେ ସେଠାରେ ଉପସ୍ଥିତ ଥିବା ଲାଇଫଗାର୍ଡମାନେ ତୁରନ୍ତ ସମୁଦ୍ର ପାଣିକୁ ଲମ୍ଫ ମାରି ସମସ୍ତଙ୍କୁ ଉଦ୍ଧାର କରି ସୁରକ୍ଷିତ ଭାବରେ କୂଳକୁ ଆଣିଥିଲେ।

ସୂଚନା ଅନୁଯାୟୀ, ହଠାତ୍ ଏକ ବଡ଼ ଲହରୀ ସ୍ରୋତ ଗଭୀର ଜଳରାଶି ଭିତରକୁ ସେମାନଙ୍କୁ ଟାଣି ନେଇଥିଲା। ଜୀବନ ବଞ୍ଚାଇବା ପାଇଁ ସଂଘର୍ଷ କରୁଥିବା ସମୟରେ ନିକଟରେ ନିୟୋଜିତ ସଜାଗ ଲାଇଫ ଗାର୍ଡ ମହେନ୍ଦ୍ର ବେହେରା, ପି ତିରୁପତି, କେ ଡି ବେହେରା ଏବଂ ଏ. ଭଗବାନ ତୁରନ୍ତ ସେମାନଙ୍କୁ ଉଦ୍ଧାର କରିଥିଲେ। ଉଦ୍ଧାର ହୋଇଥିବା ପର୍ଯ୍ୟଟକମାନଙ୍କୁ ଡାକ୍ତରୀ ପରୀକ୍ଷା ପାଇଁ ନିଆଯିବା ପୂର୍ବରୁ ବେଳାଭୂମିରେ ପ୍ରାଥମିକ ଚିକିତ୍ସା କରାଯାଇଥିଲା। ସମସ୍ତ ପାଞ୍ଚ ଜଣ ବର୍ତ୍ତମାନ ବିପଦମୁକ୍ତ ଥିବା ନେଇ ଜଣାପଡ଼ିଛି।

ଅଧିକ ପଢନ୍ତୁ: ମହାପ୍ରସାଦକୁ ଅପମାନ; ଡାଇନିଂ ଟେବୁଲ୍ ରେ ବସି ମହାପ୍ରଭୁଙ୍କ ମହାପ୍ରସାଦ ସେବନର ଭିଡିଓ ଭାଇରାଲ