ସୁନ୍ଦରଗଡ଼ ଜିଲ୍ଲାର ବୀରମିତ୍ରପୁର ଥାନା ଅଞ୍ଚଳରେ ଏକ ଭୟାବହ ସଡ଼କ ଦୁର୍ଘଟଣା ଘଟି ଦୁଇ ଜଣଙ୍କ ଜୀବନ ଯାଇଛି। ଏହି ଘଟଣା ରବିବାର ମଧ୍ୟରାତ୍ରି ସମୟରେ ୧୪୩ ନମ୍ବର ଜାତୀୟ ରାଜପଥର ଯମୁନାନାଖି ନିକଟରେ ଘଟିଥିବା ଜଣାପଡ଼ିଛି। ଏକ ଦ୍ରୁତଗାମୀ କାର ରାସ୍ତା କଡ଼ରେ ଥିବା ଏକ ଢାବା ଉପରକୁ ଚଢ଼ିଯିବାରୁ ଏହି ମର୍ମନ୍ତୁଦ ଦୁର୍ଘଟଣା ଘଟିଛି।

ସୂଚନା ଅନୁଯାୟୀ, ବୀରମିତ୍ରପୁର ପଟୁ ଆସୁଥିବା ଏକ କ୍ରିଏଟା କାର ଅତ୍ୟଧିକ ବେଗରେ ଚଳାଯାଉଥିଲା କିନ୍ତୁ ଯମୁନାନାଖି ନିକଟରେ ଚାଳକ ଗାଡ଼ି ଉପରୁ ନିୟନ୍ତ୍ରଣ ହରାଇଥିଲେ। ଫଳରେ କାରଟି ସିଧାସଳଖ ରାସ୍ତା ପାଖରେ ଥିବା ‘ସୋନୁ ଢାବା’ ଉପରକୁ ମାଡ଼ିଯାଇଥିଲା। ଦୁର୍ଘଟଣା ଏତେ ବେଶି ଥିଲା ଯେ ଢାବାରେ ବ୍ୟାପକ କ୍ଷୟକ୍ଷତି ଘଟିଥିଲା।

ଦୁର୍ଘଟଣା ପରେ ସ୍ଥାନୀୟ ଲୋକେ ତୁରନ୍ତ ଘଟଣାସ୍ଥଳକୁ ଧାଇଯାଇ ଗାଡ଼ିରେ ଫସିଥିବା ତିନି ଜଣଙ୍କୁ ବାହାର କରିଥିଲେ। ସେମାନେ ଗୁରୁତର ଆହତ ଅବସ୍ଥାରେ ଥିବାରୁ ତୁରନ୍ତ ରାଉରକେଲା ସରକାରୀ ଡାକ୍ତରଖାନାକୁ ପଠାଯାଇଥିଲେ। କିନ୍ତୁ ଡାକ୍ତର ସେଠାରେ ଦୁଇ ଜଣଙ୍କୁ ମୃତ ଘୋଷଣା କରିଥିଲେ। ଅନ୍ୟ ଜଣେ ଗୁରୁତର ଆହତ ଅବସ୍ଥାରେ ଚିକିତ୍ସାଧୀନ ଅଛନ୍ତି।

ଏହି ଦୁର୍ଘଟଣାର ପ୍ରମୁଖ କାରଣ ଭାବେ ଅତ୍ୟଧିକ ବେଗ ଓ ଅବହେଳାପୂର୍ଣ୍ଣ ଡ୍ରାଇଭିଂକୁ ଅନୁମାନ କରାଯାଉଛି। ରାତ୍ରି ସମୟରେ ଦୃଶ୍ୟମାନତା କମ୍ ଥିବା ଓ ଗତି ନିୟନ୍ତ୍ରଣ ନଥିବାରୁ ଏପରି ଘଟଣା ଘଟିଛି। ଖବର ପାଇ ବୀରମିତ୍ରପୁର ପୁଲିସ ତୁରନ୍ତ ଘଟଣାସ୍ଥଳକୁ ପହଞ୍ଚି ଗାଡ଼ିକୁ ଜବତ କରିବା ସହ ତଦନ୍ତ ଆରମ୍ଭ କରିଛନ୍ତି। ବର୍ତ୍ତମାନ୍ ପର୍ଯ୍ୟନ୍ତ ମୃତକଙ୍କ ପରିଚୟ ଜଣାପଡିନାହିଁ।  

ଅଧିକ ପଢନ୍ତୁ: ଟ୍ରକକୁ ପଛରୁ ପିଟିଲା ଟ୍ରକ ; ଚାଲିଗଲା ୩ ଜୀବନ