ରବିବାର ବାଲେଶ୍ୱର ଜିଲ୍ଲା ଖଇରା ଥାନା ଅନ୍ତର୍ଗତ ହରିପୁର ଗ୍ରାମରେ ଘର ଛାତ କାମକୁ ନେଇ ଦୁଇ ଗୋଷ୍ଟି ମୁହାଁମୁହିଁ ହୋଇଥିଲେ। ଗ୍ରାମର ସୁରେନ୍ଦ୍ର ସେଠିଙ୍କ ଘର କାମ ଚାଲିଥିଲାବେଳେ ପଡୋଶୀ ଘର ସହ ଝଗଡା ହୋଇଥିଲା । ଘଟଣାରେ ଉତ୍ତ୍ୟକ୍ତ ହୋଇ ପଡୋଶୀ ଘର ବାପା ପୁଅ ସୁରେନ୍ଦ୍ର ସେଠି ଓ ତାଙ୍କ ପରିବାର ଲୋକଙ୍କ ଉପରେ କଟୁରୀରେ ଆକ୍ରମଣ କରିଥିଲେ । ଘଟଣାରେ ସୁରେନ୍ଦ୍ର ସେଠିଙ୍କ ପତ୍ନୀ ଓ ଭଉଣୀ ଗୁରୁତର ଆହତ ହୋଇଥିଲେ । କଟକ ମେଡିକାଲରେ ଚିକିତ୍ସାଧୀନ ଅବସ୍ଥାରେ ସୁରେନ୍ଦ୍ରଙ୍କର ଭଉଣୀ କମଳା ସେଠୀଙ୍କ ମୃତ୍ୟୁ ହୋଇଥିଲା ।

ମହିଳାଙ୍କ ମୃତ୍ୟୁ ପରେ ଖଇରା ଥାନା ପୋଲିସ ଘଟଣାର ତଦନ୍ତ କରିବା ସହ ଜଣଙ୍କୁ ଅଟକ ରଖି ତଦନ୍ତ କରୁଥିଲା । ଏହି ଘଟଣାରେ ଆକ୍ରମଣ କରିଥିବା ଅନ୍ୟ ଆକ୍ରମଣକାରୀକୁ ଗିରଫ ଦାବିରେ ପରିବାର ଲୋକ ମୃତ କମଳାଙ୍କ ମୃତଦେହକୁ ସାଇକଲରେ ବାନ୍ଧି ୧୫ କିମି ଦୂରରେ ଥିବା ଖଇରା ଥାନା ପର୍ଯ୍ୟନ୍ତ ଆଣିଥିଲେ । ଗତ କିଛି ଦିନ ତଳେ ଜିତୁ ମୁଣ୍ଡା ନିଜ ଭଉଣୀ ମୃତ ଦେହକୁ ଆଣିଥିବା ଖବର ସାରା ଦେଶରେ ଚହଳ ସୃଷ୍ଟି କରିଥିଲା । ଆଜି ସେହିଭଳି ଭାବେ ସାଇକଲରେ ମୃତଦେହ ବୁହା ହେବା ଚିତ୍ର ବେଶ ହୃଦୟବିଦାରକ ହୋଇଥିବାବେଳେ ଖଇରା ପୋଲିସ ସୁରେନ୍ଦ୍ର ସେଠି ଓ ତାଙ୍କ ପରିବାର ଲୋକଙ୍କ ପାଖରେ ପହଞ୍ଚିଥିଲେ । ମୃତଦେହକୁ ଆମ୍ବୁଲାନ୍ସରେ ନେବା ପାଇଁ ଅନୁରୋଧ କରିଥିଲେ ମଧ୍ୟ ଜିଦରେ ଅଟଳ ଥିଲେ ପରିବାର ଲୋକ ।