ଭୁବନେଶ୍ୱର: ସମ୍ଭାବ୍ୟ ସାମୁଦ୍ରିକ ଝଡ଼ ‘ଅର୍ଣ୍ଣବ’ ବର୍ତ୍ତମାନ ଉପକୂଳ ନିକଟତର ହେବା ସହ ଏହାର ବାହ୍ୟ ସର୍ପିଳ ବଳୟ ସ୍ଥଳଭାଗରେ ପ୍ରବେଶ କରିସାରିଛି। ବାତ୍ୟାର ଗତି ବୃଦ୍ଧି ପାଇଥିବାରୁ ଏହା ପୂର୍ବାନୁମାନ କରାଯାଇଥିବା ସମୟଠାରୁ ଆଗୁଆ ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଛି। ଭାରତୀୟ ପାଣିପାଗ ବିଭାଗ (IMD)ର ସୂଚନା ଅନୁସାରେ, ଆସନ୍ତା ଅକ୍ଟୋବର ୨୮ ତାରିଖ ରାତି ୨ଟାରୁ ଭୋର ୪ଟା ମଧ୍ୟରେ ଏହା ଅତି ଭୀଷଣ ରୂପ ଧାରଣ କରି ଲ୍ୟାଣ୍ଡଫଲ୍ କରିବ।

ଗତ ୬ ଘଣ୍ଟା ମଧ୍ୟରେ ଏହି ଅତି ଭୀଷଣ ସାମୁଦ୍ରିକ ଝଡ଼ ଘଣ୍ଟାପ୍ରତି ୧୮ କିଲୋମିଟର ବେଗରେ ପଶ୍ଚିମ-ଉତ୍ତରପଶ୍ଚିମ ଦିଗକୁ ଆଗେଇ ଚାଲିଛି। ବର୍ତ୍ତମାନର ସ୍ଥିତି ଅନୁଯାୟୀ, ଏହା ଆନ୍ଧ୍ରପ୍ରଦେଶର କାକିନାଡ଼ାଠାରୁ ପ୍ରାୟ ୯୦ କିଲୋମିଟର ଦକ୍ଷିଣ-ପୂର୍ବରେ, ବିଶାଖାପାଟଣାଠାରୁ ୧୭୦ କିଲୋମିଟର ଦକ୍ଷିଣ-ଦକ୍ଷିଣପଶ୍ଚିମରେ, ମଚ୍ଛଲିପଟନମଠାରୁ ୧୭୦ କିଲୋମିଟର ପୂର୍ବ-ଉତ୍ତରପୂର୍ବରେ, ବାପଟଲାଠାରୁ ୨୪୦ କିଲୋମିଟର ପୂର୍ବ-ଉତ୍ତରପୂର୍ବରେ ଏବଂ ଓଡ଼ିଶାର ଗୋପାଳପୁରଠାରୁ ପ୍ରାୟ ୪୧୦ କିଲୋମିଟର ଦକ୍ଷିଣ-ପଶ୍ଚିମରେ କେନ୍ଦ୍ରୀଭୂତ ହୋଇ ରହିଛି।

କେଉଁଠି ଓ କେବେ ହେବ ଲ୍ୟାଣ୍ଡଫଲ୍ ?

ପାଣିପାଗ ବିଭାଗର ବୁଲେଟିନ୍ ଅନୁସାରେ, ଏହି ବାତ୍ୟା ଆଗାମୀ କିଛି ଘଣ୍ଟା ପର୍ଯ୍ୟନ୍ତ ନିଜର ବର୍ତ୍ତମାନର ଦିଗ (ପଶ୍ଚିମ-ଉତ୍ତରପଶ୍ଚିମ) ବଜାୟ ରଖିବ। ଏହାପରେ ଏହା ଉତ୍ତର-ପଶ୍ଚିମ ଦିଗକୁ ଗତି କରି ଅକ୍ଟୋବର ୨୮ ଭୋର ସମୟରେ ଆନ୍ଧ୍ରପ୍ରଦେଶ ଓ ୟାନାମ୍ ଉପକୂଳ ଅତିକ୍ରମ କରିବ। ବିଶେଷ କରି ବାପଟଲା ଏବଂ ବିଶାଖାପାଟଣା ମଧ୍ୟବର୍ତ୍ତୀ ଅଞ୍ଚଳରେ, ୟାନାମର ଠିକ୍ ଦକ୍ଷିଣ ପାର୍ଶ୍ୱ ଦେଇ ଏହା ସ୍ଥଳଭାଗକୁ ଛୁଇଁବ।

ପବନର ବେଗ ରହିବ ଅତ୍ୟନ୍ତ ଭୟଙ୍କର

ସ୍ଥଳଭାଗ ସଂସ୍ପର୍ଶରେ ଆସିବା ସମୟରେ ‘ଅର୍ଣ୍ଣବ’ ଏକ ଅତି ଭୀଷଣ ସାମୁଦ୍ରିକ ଝଡ଼ ଭାବେ ସକ୍ରିୟ ରହିବ। ଲ୍ୟାଣ୍ଡଫଲ୍ ପ୍ରକ୍ରିୟା ବେଳେ ଉପକୂଳବର୍ତ୍ତୀ ଅଞ୍ଚଳରେ ପବନର ନିରବଚ୍ଛିନ୍ନ ବେଗ ଘଣ୍ଟାପ୍ରତି ୧୨୫ରୁ ୧୩୫ କିଲୋମିଟର ରହିବା ସହ ସାମୟିକ ଝଟକା ପବନର ବେଗ ଘଣ୍ଟାପ୍ରତି ୧୫୦ କିଲୋମିଟର ପର୍ଯ୍ୟନ୍ତ ପହଞ୍ଚିବାର ଆଶଙ୍କା ରହିଛି। ଏହା ଯୋଗୁଁ ଉପକୂଳ ଜିଲ୍ଲାଗୁଡ଼ିକରେ ପ୍ରବଳରୁ ଅତି ପ୍ରବଳ ବର୍ଷା ସହ ବ୍ୟାପକ କ୍ଷୟକ୍ଷତି ହେବାର ସମ୍ଭାବନା ରହିଥିବାରୁ ପ୍ରଶାସନ ପକ୍ଷରୁ ସତର୍କତାମୂଳକ ପଦକ୍ଷେପ ଗ୍ରହଣ କରାଯାଇଛି।