ଭୁବନେଶ୍ୱର : ବଙ୍ଗୋପସାଗରରେ ସୃଷ୍ଟ ଅତି ଭୀଷଣ ବାତ୍ୟା 'ଅର୍ଣ୍ଣବ’ ସ୍ଥଳଭାଗ ମୁହାଁ ହେଉଛି। ଘଣ୍ଟାକୁ ୧୮କିମି ବେଗରେ ଆଗକୁ ଵଢୁଛି ବାତ୍ଯା । ବିଶାଖାପାଟନମ ଠାରୁ ୧୭୦ କିମି , କାକିନାଡ଼ା ଠାରୁ ୧୪୦କିମି ଏବଂ ଗୋପାଳପୁର ଠାରୁ ୩୮୦କିମି କିମି ଦୂରରେ କେନ୍ଦ୍ରୀଭୁତ ରହିଛି। ବର୍ତ୍ତମାନ କେନ୍ଦ୍ର ନିକଟରେ ସ୍ଥାୟୀ ପବନର ବେଗ ୧୫୫ ରୁ ୧୬୫କିମି ଝଟକା ପବନ ୧୮୫ କିମି ପ୍ରବାହିତ ହେଉଛି । 

ଆସନ୍ତା ୨୮ ଅକ୍ଟୋବର (ବୁଧବାର) ମଧ୍ୟାହ୍ଣ ସୁଦ୍ଧା ବାତ୍ୟା ‘ଅର୍ଣ୍ଣବ ଆନ୍ଧ୍ରପ୍ରଦେଶର ବାପଟଲା ଓ ବିଶାଖାପଟଣା ମଧ୍ୟରେ ଥିବା ୟାନମ୍ ପାଖରେ ସ୍ଥଳଭାଗ ଛୁଇଁବାର ସମ୍ଭାବନା ରହିଛି। ସ୍ଥଳଭାଗ ଛୁଇଁବା ସମୟରେ ପବନର ବେଗ ଘଣ୍ଟାପ୍ରତି ୧୧୫-୧୨୫ କିଲୋମିଟର ରହିପାରେ ଏବଂ ଏହା ଝଟକା ସହ ୧୪୦ କିଲୋମିଟର ପର୍ଯ୍ୟନ୍ତ ବୃଦ୍ଧି ପାଇପାରେ। 

ଏହାର ପ୍ରଭାବରେ ଦକ୍ଷିଣ ଓଡ଼ିଶାର ଜିଲ୍ଲାଗୁଡ଼ିକରେ ବିଶେଷ କରି ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି ଓ ନବରଙ୍ଗପୁରରେ ଘଣ୍ଟା ପ୍ରତି ୬୦ ରୁ ୮୦ କିମି ବେଗରେ ପବନ ବହିବା ସହ ପ୍ରବଳରୁ ଅତି ପ୍ରବଳ ବର୍ଷା ହେବାର ଆଶଙ୍କା ରହିଛି। 

 ଓଡ଼ିଶା ସରକାରଙ୍କ ପକ୍ଷରୁ ପ୍ରଭାବିତ ହେବାକୁ ଥିବା ଜିଲ୍ଲାଗୁଡ଼ିକରେ ହାଇ ଆଲର୍ଟ ଜାରି କରାଯାଇଛି । ତଳିଆ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରାଯାଉଛି ଏବଂ ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରାଯାଇଛି. ୫ଟି ଜିଲ୍ଲାରେ ସ୍କୁଲ ଓ କଲେଜଗୁଡ଼ିକୁ ମଧ୍ୟ ବନ୍ଦ ରଖାଯାଇଛି। 

 ଏହି ପ୍ରକାରର ପ୍ରାକୃତିକ ବିପର୍ଯ୍ୟୟ ସମୟରେ ସତର୍କ ଓ ସୁରକ୍ଷିତ ରହିବା ସବୁଠାରୁ ଗୁରୁତ୍ୱପୂର୍ଣ୍ଣ।

ଏହି ସ୍ଥିତିରେ ଆପଣଙ୍କ ନିଜର ସୁରକ୍ଷା ପାଇଁ ସରକାରୀ ପାଣିପାଗ ବିଭାଗ (IMD) ଏବଂ ନିର୍ଭରଯୋଗ୍ୟ ଗଣମାଧ୍ୟମରୁ ବାତ୍ୟାର ସାମ୍ପ୍ରତିକ ସ୍ଥିତି ଓ ଗତିପଥ ବିଷୟରେ ଅପଡେଟ୍ ରୁହନ୍ତୁ। ଘରେ ପର୍ଯ୍ୟାପ୍ତ ପରିମାଣର ଶୁଖିଲା ଖାଦ୍ୟ, ପିଇବା ପାଣି, ଔଷଧ, ଟର୍ଚ୍ଚ ଏବଂ ବ୍ୟାଟେରୀ ମହଜୁଦ ରଖନ୍ତୁ। ଯଦି ଆପଣ କଞ୍ଚାଘର କିମ୍ବା ତଳିଆ ଅଞ୍ଚଳରେ ରହୁଛନ୍ତି, ତେବେ ତୁରନ୍ତ ନିକଟସ୍ଥ ବାତ୍ୟା ଆଶ୍ରୟସ୍ଥଳୀ କିମ୍ବା ପକ୍କାଘରକୁ ଚାଲିଯାଆନ୍ତୁ। ନିଜର ମୋବାଇଲ୍ ଫୋନ୍ ଏବଂ ପାୱାର୍ ବ୍ୟାଙ୍କୁ ସମ୍ପୂର୍ଣ୍ଣ ଚାର୍ଜ କରି ରଖନ୍ତୁ।